गण्डकीका मन्त्री डोबाटेको राजनीतिक यात्राः बुबाले कांग्रेस बनाए, छोराले मन्त्री

गण्डकीका मन्त्री डोबाटेको राजनीतिक यात्राः बुबाले कांग्रेस बनाए, छोराले मन्त्री

A+ A A-

कांग्रेसका डोबाटे विश्वकर्माले गण्डकी प्रदेशको बिना विभागीय मन्त्रीको शपथ लिएका छन् ।

समानुपातिक सांसद उनले प्रदेश प्रमुख पृथ्वीमान गुरूङसमक्ष सोमबार साँझ शपथ लिएका हुन् । डोबाटे मन्त्रिमण्डलमा सहभागी भएसँगै गण्डकीमा मन्त्रालय संख्या १२ पुर्‍याउनु पर्ने अवस्था आएको छ ।

अहिले गण्डकीमा ११ मन्त्रालय रहेकोमा कुन मन्त्रालय नयाँ बनाइन्छ, त्यो भने तय भैसकेको छैन ।

गण्डकी प्रदेशको मुख्यमन्त्री कृष्णचन्द्र नेपाली पोखरेल डोबाटेलाई पहिल्यै आफू नेतृत्वको क्याबिनेटमा ल्याउन चाहन्थे । ७ साउनमा नै शपथ गराउने मुख्यमन्त्री पोखरेलको योजना थियो । त्यो दिन डोबाटे दौरासुरूवाल लिएर पोखरा आएका पनि थिए ।

तर माओवादीसँगको वार्ताले रात परेपछि त्यसदिन शपथ हुन सकेन । त्यो दिन घर फर्किएका उनी ८ साउनमा शपथ लिने भनेर पोखरा आए । तर, उनको ठाउँमा कास्कीका सांसद विन्दुकुमार थापा मन्त्री बने । थाप अहिले कानुनमन्त्री छन् ।

मन्त्री डोबाटेको शपथ ग्रहण समारोह । तस्वीरःअनुप/शिलापत्र

को हुन् डोबाटे ?

डोबाटे २०३६ सालदेखि कांग्रेसको राजनीतिमा सक्रिय छन् । २०१२ साल मंसिरमा जन्मिएका डोबाटेले २४ वर्षको हुँदा कांग्रेसको सदस्यता लिएका हुन् । ६६ वर्षीय सांसद विश्वकर्मा तनहुँको व्यास नगरपालिका २ अमरपुरिका स्थायी बासिन्दा हुन् । उनी कांग्रेसमा रामचन्द्र पौडेल पक्षका हुन् ।

मुख्यमन्त्री कृष्णचन्द्र नेपाली पोखरेलका बुबा गोबर्द्धन शर्मा र डोबाटेका बुबा चंखबीर एकसाथ कांग्रेसको राजनीतिमा थिए । कृष्णचन्द्रले डोबाटेको चिनजान बुबा गोबर्द्धनसँग गराइदिए । त्यसपछि २०३६ सालमा गोबर्द्धनको हातबाट डोबाटेले कांग्रेसको सदस्यता लिए ।

कृष्णचन्द्रको जन्म तनहुँमा भए पनि पछि बसाइँ सरेर नवलपुर गए ।

देशमा बहुदलीय व्यवस्था माग्दै २०४२ सालमा नेपाली कांग्रेसले सत्याग्रह घोषणा गर्‍यो । डोबाटे सत्याग्रहसँगै २०४६ सालको जनआन्दोलनमा पनि जोडिए । २०४९ देखि ०५९ सम्म गरेर दुईपटक व्यास नगरपालिकाको वडा सदस्य पनि भए ।

मन्त्री डोबाटेलाई बधाई दिन लामबद्ध शुभचिन्तक । तस्वीरः अनुप/शिलापत्र

२०६६ सालदेखि दुई वर्ष डोबाटे राष्ट्रिय दलित आयोगको सदस्य पनि बने । त्यसअघि २०५४ सालमा दलित संघ खुलेपछि तीन कार्यकाल तनहुँ जिल्ला सभापति भए । पार्टीका पछिल्लो दुई महाधिवेशनमा प्रतिनिधि भएर उनले काम पनि गरे । ठूला राजनीतिक घटनाक्रमसँग प्रत्यक्ष जोडिएर गत २०७४ सालमा समानुपातिक सांसद भएर संसद छिरेका हुन् ।

प्रकाशित मिति: सोमबार, असोज २५, २०७८ २१:०७