अल्पमतमा परेका मुख्यमन्त्री आचार्य कार्यकर्तालाई धमाधम नियुक्ति दिँदै, पर्शुरामलाई खेलकुद बोर्डको जिम्मेवारी

अल्पमतमा परेका मुख्यमन्त्री आचार्य कार्यकर्तालाई धमाधम नियुक्ति दिँदै, पर्शुरामलाई खेलकुद बोर्डको जिम्मेवारी

A+ A A-

अल्पमतमा परिसकेको प्रदेश १ सरकारले धमाधम राजनीतिक नियुक्ति गर्न थालेको छ । एमाले विभाजन भएपछि संसदमा अल्पमत परेका मुख्यमन्त्री भीम आचार्यले धमाधम राजनीतिक नियुक्ति गरिरहेका छन् ।

दसैँपछि मुख्यमन्त्री अचार्य नेतृत्वको सरकार ढल्ने निश्चित प्रायः छ । सरकार अल्पमतमा परेपछि ३० दिनभित्र विश्वासको मत लिनुपर्ने संवैधानिक व्यवस्था छ । दल विभाजनले मान्यता पाएको ३० दिन २४ असोजमा नै पुगेको छ ।

तर, मुख्यमन्त्री आचार्यले विश्वासको मतको प्रस्ताव टेबुल गरेका छैनन् । आइतबार सभामुख प्रदिपकुमार भण्डारीले ५ कात्तिकसम्मका लागि बैठक स्थगित गरेपछि प्रदेशको राजनीति तरंगित भएको छ ।

आइतबार सूचना टाँस गरी प्रदेशसभा बैठक स्थगित गरेपछि विपक्षी दलहरूले सभामुख भण्डारी मुख्यमन्त्री आचार्यको सरकार टिकाउन सहयोगी बनेको आरोप लगाएका छन् । अल्पमतमा परे पनि दसैँ बिदाको मौका छोपेर केही दिन सत्ता टिकाउन लागि परेका मुख्यमन्त्री आचार्य नेतृत्वको सरकारले बहुमत प्राप्त सरकारकै शैलीमा राजनीतिक नियुक्त गरेपछि सरकारको चर्को आलोचना सुरु भएको छ ।

कांग्रेसका प्रमुख सचेतक केदार कार्कीले भने, ‘अवैधानिक निर्णयलाई अर्को आउने सरकारले थाम्नै सक्दैन । चार दिनका लागि उहाँहरूले जुन नियुक्ति लिनुभएको छ । सगौरब त्यहाँबाट हट्नुपर्छ ।’

आइतबार बसेको मन्त्रिपरिषद्ुको बैठकले प्रदेश पर्यटन बोर्ड, खेलकुद विकास बोर्ड र प्रदेश श्रम सल्लाहकार नियुक्त गरेको थियो । बैठकले खुपु खोला जल विद्युत आयोजनाको शेयर लगानी गर्ने निर्णय गरेको छ ।

त्यस्तै मन्त्रिपरिषद् बैठकले प्रदेश पर्यटन बोर्डको सदस्यहरू नियुक्ति गरेको छ । ११ सदस्यीय कार्यसमिति रहेको बोर्डमा उद्योग, पर्यटन, वन तथा वातावरण मन्त्रालयको सचिव अध्यक्ष रहने छन् । बोर्डमा एक जना अर्थ मन्त्रालयका अधिकृत, एक जना मुख्यमन्त्री तथा मन्त्रिपरिषद्को कार्यालयका प्रतिनिधि र एक जना मन्त्रालयकै पर्यटन महाशाखाका प्रमुख रहने व्यवस्था छ ।

बैठकले मननोयन सिफारिस समितिको सिफारिस अनुसार विराटनगरका फणिन्द्र अधिकारी, सुनसरीका देवी गौतम, सोलुखुम्बुका भीमराज राई, धनकुटाका उमेश घिमिरे, इटहरीकी प्रेरणा थापा र झापा बिर्तामोडकी इन्दिरा श्रेष्ठलाई बोर्डमा नियुक्ति गर्ने निर्णय गरेको उद्योग, वन, पर्यटन तथा वातावरण मन्त्री लछुमन तिवारीले जानकारी दिए ।

मन्त्रिपरिषद् बैठकले प्रदेश खेलकुद विकास बोर्डका पदाधिकारी समेत नियुक्त गर्ने निर्णय गरेको छ । बोर्डको उपाध्यक्षमा बाबा मेयाङ्वो र सदस्य सचिवमा एमालेका विवादास्पद युवा नेता कृष्ण बस्नेत ‘पर्शुराम’ लाई नियुक्त गरेको छ ।

बोर्डको सदस्यहरूमा भेषराज कार्की, विप्लभ घोष र थलु राजभण्डारी नियुक्त भएको मन्त्री तिवारीले बताए । बैठकले झापाका राजिव घिमिरेलाई श्रम सल्लाहकारको उपाध्यक्षमा नियुक्त गरेको छ ।

यस्तै, सदस्यहरूमा विराटनगरका उद्योगी भीम घिमिरे, सरोज श्रेष्ठ, सीता उपाध्यय, रञ्जु सिग्देल, किशोर धमला, अरुण थापा, नारायणबाबु कार्की, सुनिता घिमिरे, टीका प्रसाईं र निलम साह सोनार नियुक्त भएका छन् ।

प्रकाशित मिति: सोमबार, असोज २५, २०७८ ११:०८