सुरु भयो असारे विकास, हतारमा गुणस्तरहीन काम

A+ A A-

चालू आर्थिक वर्ष सकिनै लाग्दा सिन्धुपाल्चोकमा विकास निर्माणका काम तीव्र गतिमा अगाडि बढाइएको छ । विगतकै परम्परा दोहोर्याउँदै बजेट सक्नकै लागि विकास निर्माणका काम सुरु भएका हुन् ।

स्थानीय सरकार बजेट सक्ने हतारोमा रहेको छ। यस कारण, सडक, खानेपानी, सिँचाइ, भवन निर्माणलगायतका काम धमाधम सुरु भएकाे छ ।

त्यस्तै, सरकारका प्रतिनिधि यतिबेला प्राविधिक स्टिमेट गर्न गाउँगाउँ पुगेका छन् ।

बलेफी–जलविरे सडकखण्डको जँघारे नजिकै हिलो र वर्षाबीच पनि ठेकेदार सडकमा ढलान गराउँदै छन् । एक ठेकेदारले भने, ‘प्राविधिकले भनेअनुसार नै काम भइरहेको छ ।’

डिभिजन सडक कार्यालय दोलखाका इन्जिनियर गागल भण्डारीले भने, ‘यहाँ चाप धेरै हुँदैन । कन्सलटेन्सीले दिएको प्रतिवेदनअनुसार नै काम भएको छ । ढलान एकदमै राम्रो छ ।’

तर, प्राविधिक रुपमा ढलान ठीकै देखिए पनि उपभोक्ताले सडक ढलान राम्रोसँग नगरेको आरोप लगाए ।

‘बलेफी खण्डमा मात्रै होइन, सदरमुकाम चौताराको जिल्ला समन्वय कार्यालय समितिको कार्यालय नजिकै रहेको मोडमा धमाधम ढलान भइरहेको छ । ढलानका लागि गरिएको सोलिङ मात्रै होइन । बिछ्याएको रडसमेत निकै फराकिलोसँग राखिएको छ । सबैको नजर पर्ने स्थानमै प्रविधिकको मिलेमतोमा ठेकेदारले गलत गरिरहँदा पनि जनप्रतिनिधि र नियमनकारी निकाय नै चुप छन्,’ स्थानीय जीवन श्रेष्ठले भने ।

‘जिल्लामा भइरहेका विकासका काम गुणस्तरहीन छ । दिगो कामभन्दा बजेट सक्ने जस्तो मात्रै देखियो,’ प्रदेश ३ का सामाजिक विकासमन्त्री युवराज दुलाालले भने ।

जिल्लाका १२ स्थानीय तहमध्ये केही स्थानीय तहको भौतिक प्रगति निराशजनक छ । हेलम्बु गाउँपालिकाले चैतभित्रै ८० प्रतिशत योजना सम्पन्न गरेको छ ।

लिसंखुपाखर गाउँपालिकाले आयोजना गरेको सार्वजनिक सुनुवाइ कार्यक्रममा पालिकाले सञ्चालन गरेका विभिन्न योजनामध्ये हालसम्म जम्मा ४५ प्रतिशत मात्रै काम सम्पन्न भएको प्रमुख प्रशासकीय अधिकृत पूर्णप्रसाद दुलालले जानकारी दिए । त्यस्तै, चौतारा साँगाचोकगढी नगरपालिका, मेलम्ची नगरपालिकालगायतका स्थानीय तहको अवस्था पनि उस्तै छ ।

असार लाग्नै लाग्दा कतिपय सरकारी कार्यालयले टेन्डर निकालेर काम सुरु गर्ने प्रक्रिया बढाएका छन् । सिन्धुपाल्चोक र दोलखाका सडक योजना हेर्ने जिम्मा पाएको कार्यालयले पैसा दिन नसकेपछि सडक निर्माण अलपत्र परेको छ ।

प्रकाशित मिति: बुधबार, जेठ २९, २०७६ ०१:५८