बागमतीको मुख्यमन्त्रीमा गठबन्धनको हानथाप, कांग्रेसले भन्यो- केन्द्रमा भएको लिखित सहमति देखाउ

बागमतीको मुख्यमन्त्रीमा गठबन्धनको हानथाप, कांग्रेसले भन्यो- केन्द्रमा भएको लिखित सहमति देखाउ

A+ A A-

नेकपा (एकीकृत समाजवादी) का उपाध्यक्ष तथा बागमती प्रदेशसभा सदस्य राजेन्द्र पाण्डे बागमतीको मुख्यमन्त्री बन्ने तयारीमा छन् । तर, बागमतीको मुख्यमन्त्रीमा गठबन्धनमा एकीकृत समाजवादीसँगै रहेको नेपाली कांग्रेसले पनि दाबी छोडेको छैन ।

अष्टलक्ष्मी शाक्य नेतृत्वको सरकार अल्पमतमा परेसँगै बागमतीमा बन्ने गठबन्धन सरकारको नेतृत्व पाण्डेले गर्ने चर्चा छ । उनी बागमती प्रदेशस्थित एकीकृत समाजवादीको संसदीय दलको नेतासमेत हुन् ।

प्रदेश १ र बागमतीको मुख्यमन्त्री एकीकृत समाजवादीलाई दिने सहमति भएको बताइएको छ । तर, कांग्रेस बागमती प्रदेशले भने केन्द्रमा भएको भनिएको सहमतिको लिखित पत्र देखाउनुपर्ने अडान लिएको छ ।

दुई प्रदेशमा मुख्यमन्त्री पाउने भएपछि एकीकृत समाजवादीले चार मन्त्रालयमै चित्त बुझायो

आतबार शाक्यले प्रदेशसभामा विश्वासको मत लिने प्रस्ताव टेबुल गराएकी छन् । तर, उनको सत्ता भने लम्बिएको छ । बागमतीका सभामुख सानुकुमार श्रेष्ठले कात्तिक ४ गतेसम्मका लागि प्रदेशसभाको बैठक स्थगित गरेपछि शाक्यको प्रस्तावमा त्यसपछि मात्र मत विभाजन हुने भएको छ ।

विश्वासको मत नपाउने निश्चित प्रायः भएका कारण कार्तिक पहिलो हप्ता गठबन्धन सरकार बन्ने सम्भावना रहेको नेताहरू बताउँछन् ।

पाण्डेलाई मुख्यमन्त्री बनाउन खोजेपछि कांग्रेस बागमतीले विगतदेखि नै असहमति राख्दै आएको थियो । केन्द्रमा भएको भनिएको सहमतिविपरीत बागमतीमा कांग्रेसले अडान लिएपछि पाण्डेलाई अवरोध सिर्जना हुने देखिएको छ ।

हेटौँडामा आइतबार बसेको प्रदेशस्थित कांग्रेस संसदीय दलको बैठकले आफ्नै नेतृत्वमा सरकार गठन गर्ने निर्णय गरेको थियो । कांग्रेस संसदीय दलका नेता इन्द्रबहादुर बानियाँले मुख्यमन्त्रीका लागि शेरबहादुर देउवासँग लबिङ गरिरहेका छन् ।

नेपाली कांग्रेस बागमती प्रदेश संसदीय दलका सचिव निमा लामा पाण्डेलाई मुख्यमन्त्री बनाउन गरेको सहमतिपत्र देखाउनुपर्ने बताउँछन् । कांग्रेसले पनि मुख्यमन्त्रीमा दाबी गरिरहेकोले सहमति भयो भनेर मात्र नहुने उनले बताए ।

‘गठबन्धनकै सरकार बन्ने हो । हामीले पनि मुख्यमन्त्रीमा दाबी गरिरहेका छौँ । पाण्डे ज्यूलाई मुख्यमन्त्री बनाउने सहमति केन्द्रमा भएको भए पत्र देखाउनु पर्‍यो नी । त्यसै कहाँ हुन्छ,’ लामाले शिलापत्रसँग भने ।

प्रदेशस्थित कांग्रेस सचेतक छिरिङ दोर्जे लामा पनि आफूहरूकै नेतृत्वमा सरकार गठन गर्नुपर्ने अडान कांग्रेसले नछाडेको बताउँछन् । पाण्डेलाई मुख्यमन्त्री बनाउने सहमति लिखित रूपमै आउनुपर्ने उनको भनाइ छ ।

तर, एकीकृत समाजवादीका नेताहरू भने पाण्डे नै मुख्यमन्त्री बन्ने निश्चित भइसकेको बताउँछन् । एकीकृत समाजवादीका एक प्रदेश सांसदले भने, ‘गठबन्धनका शीर्ष नेताहरूले पाण्डे ज्यूलाई नै मुख्यमन्त्री बनाउने सहमति जनाइसकेका छन् । कात्तिक पहिलो हप्ता उहाँ मुख्यमन्त्री बन्नुहुन्छ ।’

माओवादी केन्द्रका संसदीय दलका नेता शालिकराम जमकट्टेल पनि कांग्रेसकै नेतृत्वमा सरकार बनोस् भन्ने पक्षमा रहेको स्रोतको दाबी छ । जमकट्टेल बानियाको पक्षमा रहेको स्रोत दाबी गर्छ । तर, माओवादीका अधिकांश सांसदहरू भने पाण्डेकै पक्षमा रहेको स्रोत बताउँछ ।

‘उहाँ (जमकट्टेल) ले कांग्रेसकै नेतृत्वमा सरकार बनोस् भन्ने चाहनुभएको छ । किन हो हामीलाई थाहा भएन,' स्रोतले भन्यो, 'माओवादीभित्रकै अधिकांश सांसदहरूले भने पाण्डेलाई साथ दिनेछन् । हाम्रो माथिदेखि नै एउटै कुरा छ ।’

बागमतीमा सरकार बनाउन ५५ मत आवश्यक पर्छ । माओवादी, कांग्रेस र एकीकृत समाजवादीको जोड्दा ५८ मत पुग्छ । प्रदेशसभामा माओवादीसँग २३, कांग्रेससँग २२ र एकीकृत समाजवादीसँग १३ मत छ । प्रदेशसभामा ७ दलको प्रतिनिधित्व छ । सत्तारुढ एमालेसँग ४३, विवेकशी साझा पार्टीसँग ३, राप्रपासँग २, नेपाल मजदुर किसान पार्टीसँग २ र एक स्वतन्त्र सांसद छन् ।

गठबन्धनकै विवादले लम्बियो शाक्यको सत्ता

बागमतीको गठबन्धनमा मुख्यमन्त्रीलाई लिएर एकीकृत समाजवादी र नेपाली कांग्रेसबीच सहमति हुन नसकेपछि अष्टलक्ष्मी शाक्यको सत्ता लम्बिएको छ ।

सभामुख सानुकुमार श्रेष्ठले बोलाएको सर्वदलीय बैठकमा दलहरूबीच दसैँपछि विश्वासको मत लिने सहमति बनेको कांग्रेस संसदीय दलका सचिव निमा लामा बताउँछन् । गठबन्धनमा मुख्यमन्त्री नटुङ्गिएकाले ४ कात्तिकमा बैठक सारिएको हो ।

कार्यव्यवस्था तथा परामर्श समितिको बैठकमा पनि दलहरूले दसैँपछि नै मतविभाजन प्रक्रिया अघि बढाउने धारणा राखेका थिए ।

सत्तापक्षले दसैँपछि मतविभाजन गरौँ भने प्रस्ताव गरेपछि सबै दलले यसमा सहमति जनाएको कांग्रेस सचेतक छिरिङ दोर्जे लामाले जानकारी दिए । सत्तापक्षले प्रदेश प्रमुखसमक्ष पनि हप्ता दिनपछि मात्रै मतविभाजन गर्नका लागि अनुरोध गरेको थियो । एकीकृत समाजवादीका नेता पाण्डेले भने दशैंअघि नै प्रक्रिया टुङ्ग्याउनुपर्ने धारणा राखेका थिए ।

प्रकाशित मिति: आइतबार, असोज २४, २०७८ २०:४४