दुई प्रदेशमा मुख्यमन्त्री पाउने भएपछि एकीकृत समाजवादीले चार मन्त्रालयमै चित्त बुझायो

दुई प्रदेशमा मुख्यमन्त्री पाउने भएपछि एकीकृत समाजवादीले चार मन्त्रालयमै चित्त बुझायो

A+ A A-

नेकपा एकीकृत समाजवादीको बिहीबार बसेको स्थायी कमिटी बैठकमा मन्त्रालय बाँडफाँडको विषयमा असन्तुष्टि व्यक्त गरेको थियो । मन्त्रालयको संख्या केही थप्नुपर्ने माग एकीकृत समाजवादीको थियो ।

बालुवाटारमा बसेको गठबन्धनको बैठकमा एकीकृत समाजवादीलाई बागमती र प्रदेश १ को मुख्यमन्त्री दिने सहमति भएपछि केन्द्रमा चारवटा मन्त्रालयमा चित्त बुझाउने भएको छ । 'हामीले केही मन्त्रालय माग गरिरहेका थियौं । प्रधानमन्त्रीले दुईवटा प्रदेशको मुख्यमन्त्री दिन तयार रहेको बताउनुभयो । मन्त्रालयको विषय लगभग टुंगिसकेको छ,' अध्यक्ष माधवकुमार नेपालले शिलापत्रसँग भने ।

तीन दिनअघि मन्त्रालय बाँडफाँडमा भएको गठबन्धन दलको सहमतिमा एकीकृत समाजवादीभित्र विवाद सिर्जना गर्‍यो । मन्त्रालय संख्या कम भएकोप्रति एकीकृत समाजवादीमा असहमतिमात्रै प्रकट भएन, गठबन्धनको सहमति नै भंग हुने अवस्था पैदा भयो । पार्टीभित्र नेताहरू नै असन्तुष्ट भएपछि बिहीबार स्थायी समिति बैठक बसेर गठबन्धनमा थप छलफल गर्ने निर्णय पनि भयो ।

केही हप्तायता प्रधानमन्त्री शेरबहादुर देउवाले गठबन्धनमा अन्य दललाई मन्त्रालयको संख्या घटाउने मात्र होइन, बागमती प्रदेशको मुख्यमन्त्री पनि दाबी गरेपछि एकीकृत समाजवादी रुष्ट भएको हो । चारवटा मन्त्रालय र एक राज्यमन्त्रीमात्रै पाउने भएपछि बढेको असन्तुष्टिकै कारण सरकार विस्तारमा ढिलाइ पनि भएको थियो ।

एकीकृत समाजवादीमा विरोध खतिवडाको नेतृत्वमा सरकारमा जाने सहमति भइसकेको छ । मन्त्रीहरूको सूचीमा खतिवडासहित रामकुमारी झाँक्री, प्रेम आले, जीवनराम श्रेष्ठ, भवानी खापुङ र किसान श्रेष्ठ, मेटमणि चौधरीलगायतको नाम चर्चामा छ ।

गठबन्धनबीच भएको सहमति अनुसार संस्कृति, पर्यटन, श्रम तथा रोजगार, स्वास्थ्य तथा जनसंख्या र शहरी विकास मन्त्रालय एकीकृत समाजावादीले पाउनेछ । चार मन्त्रीसहित एक राज्यमन्त्री पनि पाउनेछ । त्यस्तो अवस्थामा ५ जना सांसदले अवसर पाउनेछन् । तर, एकीकृत समाजवादीले मन्त्री बन्नेको अन्तिम नाम भने तय गरिसकेको छैन ।

प्रकाशित मिति: बिहीबार, असोज २१, २०७८ १८:१३