सिर्जनाले पूरा गरिन् दिवंगत बुबाको सपना, बनिन् कान्छी महाधिवेशन प्रतिनिधि

A+ A A-

नेपाली कांग्रेसको १४औँ महाअधिवेशनमा युवाहरू अगाडि आउने क्रमले निरन्तरता पाइरहेको छ । बझाङमा २२ वर्षीया नेतृ महाधिवेशन प्रतिनिधि चुनिएकी छन् ।

बझाङ कांग्रेसको आठौँ जिल्ला अधिवेशनबाट जयपृथ्वी नगरपालिका-१० की २२ वर्षीया सिर्जना स्नेही जिल्लाकै कान्छी महाधिवेशन प्रतिनिधि बनेकी हुन् । सहमतिमै नेतृत्व चयन गर्ने प्रयास सफल नभएपछि निर्वाचन भएको थियो ।

कञ्चनपुरको बैजनाथ इन्जियरिङ क्याम्पसबाट सब-इन्जिनियर पास गरेकी स्नेही पूर्व राज्यमन्त्री नरेशबहादुर सिंह र पूर्व जिल्ला सभापति पृथ्वीबहादुर सिंहको संयुक्त प्यानलबाट लडेकी हुन् । उनी दलित महिलाको कोटाबाट महाधिवेशन प्रतिनिधिको उम्मेदवार बनेकी हुन् ।

शनिबार सम्पन्न मत गणनाको परिणामअनुसार स्नेहीले ६८७ मत प्राप्त गर्दै महाधिवेशन प्रतिनिधिमा निर्वाचित भइन् । उनकी निकटम प्रतिद्वन्द्वी निर्मला बीसीले भने ४४५ मत ल्याइन् ।

जितपछि उनले आफ्नो विजय बुबाको सपनासँग जोडिएको प्रतिक्रिया दिइन् । उनले बुबा पदमबहादुर स्नेहीको सपना साकार पार्न आफू महाधिवेशन प्रतिनिधिको उम्मेदवार बनेको र जितेर आफूले बुबाको सपना पूरा गरेको बताइन् । उनका बुबा पदमबहादुर पटक-पटक महाधिवेशन प्रतिनिधिका लागि चुनाव लडे पनि जित्न सकेका थिएनन् ।

'तीन महिनाअघि बुबाले अन्तिम सास लिइरहँदा महाधिवेशन प्रतिनिधि बन्ने इच्छा अपूरो भएको बताउनुभएको थियो । मैले यो सपना म पूरा गर्छु भनेर बाचा गरेको थिएँ', बुबालाई दिएको बचन स्मरण गर्दै उनले भनिन्, 'बुबाकै सपना पूरा गर्न उम्मेदवार बनेकी हुँ । चुनाव जितेर बुबाको सपना पूरा गरेँ जस्तो लागेको छ ।'

सिर्जनाका बुबा पदमबहादुर स्नेही राष्ट्रिय दलित आयोगका सदस्य र कांग्रेसनिकट दलित संघ बझाङका पूर्व सभापति समेत थिए ।

प्रकाशित मिति: शनिबार, असोज २३, २०७८ २०:१०