एनसेलले ल्यायो एक रूपैयाँ प्रतिएमबी अफर

A+ A A-

एनसेल आजियाटा लिमिटेडले चाडपर्वलाई लक्षित गर्दै विभिन्न योजनाहरू ल्याएको छ । चाडपर्वको अवसरमा एनसेलले पे एज यू गो (पेजी) डाटा शुल्क घटाएर प्रतिएमबी एक रुपैयाँ बनाएको छ ।

यसका साथै ग्राहकले ५० रुपैयाँ वा सोभन्दा बढीका हरेक रिचार्जमा बोनसस्वरूप ब्यालेन्स वा डाटा पाउन सक्नेछन् । यो योजनासँगै एनसेलका ग्राहकले कुनै पनि प्याक खरिद नगरी आफ्नो मुख्य ब्यालेन्सबाटै डाटा प्रयोग गर्न सक्नेछन् । ग्राहकहरूले ५० प्रतिशत छुटमा करबाहेक एक रुपैयाँ प्रतिएमबीमा डाटा सेवाको फाइदा लिन सक्नेछन् ।

पेजीअन्तर्गत १ रुपैयाँ प्रतिएमबी अफर २० असोजदेखि लागू भएको छ भने रिचार्जमा बोनस योजना २३ असोजदेखि लागू हुनेछ । यो योजना ९० दिनका लागि मान्य रहने कम्पनीले जनाएको छ ।

रिचार्जमा बोनस योजनाअन्तर्गत ग्राहकले रिचार्ज गरेको रकमका आधारमा बोनस ब्यालेन्स तथा डाटा प्राप्त गर्नेछन् । ५० रुपैयाँदेखि ९९ रुपैयाँसम्म ब्यालेन्स रिचार्ज गर्ने ग्राहकले ५ देखि १० प्रतिशतसम्म बोनस ब्यालेन्स वा ५० एमबीदेखि २५० एमबीसम्म एक दिनको समयसीमा रहेको डाटा भोल्युम पाउनेछन् ।

त्यस्तैगरी, १०० रुपैयाँदेखि १ सय ९९ रुपैयाँसम्म ब्यालेन्स रिचार्ज गर्ने ग्राहकले तीन दिनको समयसीमा रहेको ५ देखि १२ प्रतिशतसम्म बोनस ब्यालेन्स वा १ सय ५० एमबीदेखि ५ सय एमबीसम्मको डाटा भोल्युम पाउनेछन् ।

२ सय रुपैयाँ वा सोभन्दा बढी रिचार्ज गर्ने ग्राहकले ५ दिनको समयावधि रहेको ५ देखि १५ प्रतिशतसम्म बोनस ब्यालेन्स वा ५०० एमबीदेखि १५०० एमबीसम्म डाटा भोल्युम पाउनेछन् ।

डाटा प्याकमार्फत डाटा प्रयोग राम्रो विकल्प भए पनि पेजी शुल्कमा छुटले ग्राहकमाझ मुख्य ब्यालेन्सबाट पनि सुलभ दरमा डाटा सेवा दिएको कम्पनीले जनाएको छ ।

चाडपर्वकै अवसरमा ग्राहकले आफ्ना परिवारजन, साथी र आफन्तहरूले मलेसिया, युनाइटेड अरब एमिरेट्स (यूएई) र साउदी अरबबाट गरेको कलमा कुरा गर्दा हरेक हप्ता २१ वटा स्मार्टफोन जित्ने मौकासहितको आकर्षक योजना पनि सार्वजनिक गरेको छ ।