कोरोनाको जोखिममा गाउँघर, दसैँमा लक्षण देखिए पालिका–पालिकामा परीक्षण

A+ A A-

स्वास्थ्य तथा जनसंख्या मन्त्रालयका अनुसार कोरोना संक्रमण दर अझै ८ प्रतिशतको हाराहारीमा छ । जोखिम कम नभएको मन्त्रालयले बताउँदै आएको छ । ‘संक्रमण दर ५ प्रतिशतभन्दा कम भयो भने जोखिम कम हुन्छ । अहिले जोखिम कायमै छ,’ मन्त्रालयका प्रवक्ता डा. कृष्ण पौडेल भन्छन् ।

जोखिममा कसरी मनाउने त दसैँ ?

मन्त्रालयले स्वास्थ्य मापदण्ड पालनामा जोड दिएको छ । ‘भीडभाड, व्यक्तिव्यक्तिबीचको दुरी कायम गर्नुपर्‍यो । जोखिम छ भन्ने भुल्नुभएन,’ डा. पौडेल भन्छन्, ‘सतर्कता अपनाएर दसैँ मनाउनुपर्छ ।’ मास्क लगाएर मात्र टीका लगाउन मन्त्रालयले अनुरोध गरेको छ । ‘टीका लगाउँदा मास्क छोड्नुभएन । मास्क लगाएर टीका लगाउन सबैलाई अनुरोध छ,’ उनी भन्छन् ।

दसैँमा कोरोनाको लक्षण देखिए के गर्ने ?

दसैँमा कोरोनाको लक्षण देखिए पालिका-पालिकामै परीक्षणका लागि एन्टिजेनको व्यवस्था मिलाइएको प्रवक्ता पौडेलले बताए । ‘कसैलाई लक्षण देखियो भने तत्काल परीक्षण गर्न पालिका-पालिकामा व्यवस्था मिलाइएको छ,’ उनी भन्छन्, ‘अस्पतालको आकस्मिक सेवा खुल्ला नै हुन्छ ।’

जोखिममा गाउँ

दसैँमा जमघटका कारण गाउँघर कोरोनाको जोखिममा रहेको विज्ञहरू बताउँछन् । ‘गाउँ टार्गेट हुनसक्छ । भारतबाट फर्किएका पनि गाउँमै छन् । शहरबाट पनि गाउँमै पगेका छन् । कति गाउँमा खोप पनि पुगेको छैन । पहिले संक्रमित नभएको ठाउँमा संक्रमणको जोखिम उच्च देखिन्छ,’ भाइरोलोजिस्ट डा. शेरबहादुर पुन भन्छन् ।

डेल्टा भेरियन्टमा भाइरल लोड बढी भएकाले गाउँघरमा हुने भेटघाटले जोखिम निम्त्याउने उनको ठम्याइ छ । ‘सयौँको संख्यामा नयाँ संक्रमित देखिने क्रम जारी छ । भ्याक्सिन पनि लगाउन बाँकी छ । खोप लगाए पनि संक्रमित भइन्छ । मापदण्ड भुल्नु भएन,’ उनी भन्छन् ।

प्रकाशित मिति: शुक्रबार, असोज २२, २०७८ १४:५७