बाह्रबिसे नगरस्तरीय राष्ट्रपति रनिङ शिल्डको उपाधि शारदा माविलाई

A+ A A-

बाह्रबिसे नगरपालिकाको आयोजनामा सुरु भएको प्रथम बाह्रबिसे नगरस्तरीय राष्ट्रपति रनिङ शिल्डको उपाधि शारदा मावि बाह्रबिसेले जितेको छ ।

बाह्रबिसे नगरपालिकाभरका माध्यमिक विद्यालयको सहभागिता रहेको प्रतियोगितामा विभिन्न विधामा भएको प्रतिस्पर्धामा शारदाले बढी अंक ल्याउँदै उपाधि हात पारेको हो । दुई दिनसम्म सञ्चालित प्रतियोगितामा बाह्रबिसे नगरपालिकाका सामुदायिक र निजी गरी ११ विद्यालयको सहभागिता थियो ।

प्रतियोगितामा क्षमादेवी मावि दोस्रो र केतु बोर्डिङ स्कुल तृतीय भएका थिए । प्रतियोगितामा महिला, पुरुष भलिबल, तेक्वान्दो, कराते, एथ्लेटिक्सलगायतका खेल समावेश गरिएको बाह्रबिसे नगरपालिका प्रमुख निमफुन्जाे शेर्पाले जानकारी दिए ।

पुरुष भलिबल प्रतियोगितामा बच्छलादेवी मावि प्रथम भएको थियो भने केतु बोर्डिङ दोस्रो र क्षमादेवी मावि तृतीय भएका थिए । त्यस्तै, महिला भलिबल प्रतियोगितामा क्षमादेवी मावि प्रथम भएको थियो ।

नगरस्तरीय छनोटपछि क्षेत्रीयस्तर हुँदै जिल्लास्तरीय प्रतियोगिता हुनेछ । छनोट खेलमा उत्कृष्ट हुने विद्यालय तथा खेलाडीलाई लिसंखुपाखर गाउँपालिका अध्यक्ष कमल नेपालले शिल्ड र पुरस्कार वितरण गरेका थिए । कार्यक्रममा अध्यक्ष नेपालले सबै स्थानीय तहले विद्यालयदेखि नै खेल क्षेत्रलाई प्राथामिकतामा राखेर अघि बढ्नुपर्ने बताए ।

बाह्रबिसे नगरपालिका प्रमुख शेर्पाले आफूहरुले भौतिक विकासलाई मात्रै नभएर शिक्षा र खेलकुद क्षेत्रको विकासका लागि काम गरेको बताए । खेल क्षेत्रलाई प्राथमिकतामा राखेर बाह्रबिसेमा खेलाडीका लागि सुविधासम्पन्न कर्भड हल निर्माण गरेको शेर्पाले बताए । बाह्रबिसे नगरपालिकाको गातीमा राष्ट्रियस्तरको खेल मैदान निर्माण कार्य अन्तिम चरणमा पुगेको उनले जानकारी दिए ।

प्रतियोगिताको उद्घाटन पूर्वकानुनमन्त्री एवं सांसद शेरबहादुर तामाङले गरेका थिए । जिल्लाका विभिन्न स्थानीय तहले आफ्नो स्थानीय तहभित्रका माध्यमिक विद्यालयस्तरीय राष्ट्रपति रनिङ शिल्ड छनोट प्रतियोगिता सञ्चालन गरिरहेका छन् । स्थानीय तहमा खेलुकद सम्पन्न भएपछि क्षेत्रीय हुँदै जिल्लास्तरीय प्रतियोगिता हुने जिल्ला खेलकुद विकास समितिका अध्यक्ष शिव देउजाले जानकारी दिए ।

प्रकाशित मिति: मंगलबार, जेठ २८, २०७६ १८:५३