खप्तड: फाँटहरूको आकर्षणले लोभ्याउने भर्जिन गन्तव्य

A+ A A-

प्राकृतिक र धार्मिक आस्थासहित घुमघाममा रुचि राख्नेहरूका लागि आकर्षक गन्तव्य हो– खप्तड । खप्तड चिसो मौसममा सेताम्य हिउँले ढाकिन्छ । वैशाख–जेठमा फूल फुल्छ । सुदूरपश्चिमको प्रमुख पर्यटकीय गन्तव्य खप्तड नेपालको भर्जिन गन्तव्य पनि हो । पछिल्ला दिनमा नेपाली पर्यटकहरूको संख्या भने बढ्न थालेको छ । पहाडी क्षेत्र, पदयात्रामा रुची हुनेहरूका लागि साहसिक यात्रा पनि हो ।

खप्तडका आकर्षण

विभिन्न प्रजातिका फूलहरू फुल्छन् । विशाल फाँटहरू निकै आकर्षक छन् । खप्तड बाबाको कुटी छ । त्रिवेणी नदी, खप्पर दह, शिवमन्दिर, गणेशस्थान, नागढुंगा, केदारढुंगाजस्ता धार्मिकस्थलहरूले खप्तड क्षेत्रको आकर्षण बढाएको छ । धार्मिक आकर्षणबाहेक खप्तडक्षेत्रमा ठूला साना गरी २२ वटा आकर्षक फाँटहरू छन् । यी फाँटहरूले नै त्यहाँको वातावरणलाई निकै मनमोहक बनाउने गरेका छन् ।

कसरी पुग्ने ?

काठमाडौंदेखि धनगढी ६५० किमि गाडीको यात्रा तय गरेर वा काठमाडौंबाट धनगढीसम्म हवाईयात्राबाट पुग्न सकिन्छ । धनगढीदेखि डोटीको सिलगढी ८ घण्टाको गाडीको यात्रामा पुगिन्छ । बगलेगसम्म जिप रिजर्भ गरेर पनि लान सकिन्छ । पैदलयात्राको पहिलो दिन झिगराना, दोस्रो दिन खप्तड राष्ट्रिय निकुञ्ज प्रवेशसँगै त्रिवेणी मन्दिर पुगिन्छ ।

खर्च कति ?

खप्तडसम्मको यात्रा नयाँ र टाढा भएकाले व्यवस्थित यात्रा आवश्यक पर्छ । खप्तडक्षेत्रभित्र बासका लागि धेरै सुविधा नभएकाले टेन्टको पनि विकल्प खोज्नुपर्ने हुन्छ । फाँटको बीचमा टेन्टमा रात बिताउँदाको आनन्द झन् स्मरणयोग्य हुनेछ । यो यात्रा साहसिक यात्रा भएकाले खर्च पनि अलिक बढी लाग्छ । र, समय पनि बढी लाग्ने भएकाले खर्चको जोहो गरेर जानु उपयुक्त हुन्छ ।

प्रकाशित मिति: शनिबार, असोज २३, २०७८ ११:१४