पुनहिल/घोरेपानी : प्राकृतिक र सांस्कृतिक सौन्दर्यको संगम

A+ A A-

पदायात्राका लागि सहज र आकर्षक गन्तव्य खोज्ने हो भने पोखरानजिकैको पुनहिल/घोरेपानी पदयात्रा निकै आकर्षक र रोमाञ्चक हुन्छ । अन्नपूर्ण पदमार्गकै एक खण्ड हो पुनहिल/घोरेपानी ।

विश्वका उत्कृष्ट पदमार्गमध्येको अन्नपूर्ण पदमार्गमा पर्ने पुनहिल/घोरेपानी पछिल्ला दिनमा विदेशीभन्दा बढी नेपालीहरूको आकर्षक गन्तव्य बन्न थालेको छ । घोरपानीदेखि आधा घण्टाको उकालो हिँडाइपश्चात् पुग्न सकिन्छ–पुनहिल । धौलागिरी हिमाल हेर्नलाई सबैभन्दा उपयुक्त स्थान पनि हो–पुनहिल ।

३ हजार २१० मिटरको उचाइमा रहेको पुनहिल पुग्नेहरूका लागि लेक लाग्ने सम्भावना पनि कम हुन्छ । पहाडीक्षेत्रमा धेरै पदयात्रा नगरेकाहरूका लागि मौसम र स्वास्थ्यका दृष्टिकोणले पनि पुनहिल उपयुक्त गन्तव्य हुन सक्छ ।

पुनहिल र घोरेपानी पदयात्रामा निस्कनेहरू धम्पुस वा घान्द्रुकसम्म घुमेर आउन सक्छन् । नयाँ पुलबाट पुनहिल/घोरेपानी जाँदा घान्द्रुकहुँदै गइन्छ । त्यसैले फर्किंदा धम्पुसहुँदै आउँदा राम्रो हुन्छ । धम्पुसबाट देखिने हिमाल, गुरुङ समुदायको आत्मीयता साँच्चिकै लोभलाग्दो छ ।

पुनहिल/घोरेपानीका आकर्षण

पुनहिलबाट आकर्षक देखिन्छ सूर्योदय । पर्यटकहरू सूर्योदय हेर्नकै लागि मिर्मिरेमै पुनहिल पुग्छन् । सूर्योदयको बेलामा देखिने हिमाल झनै आकर्षक हुन्छ । घामको झुल्कोसँगै देखिने हिमालको सुन्दरताले सबैको मन लोभ्याउँछ । पुनहिलमा उभिएर हेर्दा आफूजत्रै देखिन्छन्– अन्नपूर्ण र धौलागिरी हिमाल । बाटोभरि फुलेको फूलको मनोरम दृश्यले पदयात्रालाई झन् उत्साहित बनाउँछ । घोरेपानीको आतिथ्यता पनि लोभलाग्दो छ । बाटोमा पर्ने घान्द्रुक र धम्पुसको आकर्षणले पनि पुनहिलको यात्रालाई अविस्मरणीय बनाउँछ ।

घान्द्रुक र धम्पुसक्षेत्रका गुरुङ संस्कृतिका मौलिक उत्पादनहरू तपाईंले कोसेलीको रूपमा ल्याउन सक्नुहुन्छ ।

कसरी पुग्ने ?

पोखराको नयाँ पुलबाट दुई दिनको पैदलयात्राबाट पुग्न सकिन्छ– घोरपानी । घोरेपानीबाट आधा घण्टामा पुगिन्छ– पुनहिल । पोखरा–पुनहिल–पोखरा पदयात्रा पाँच दिनका लागि उपयुक्त हुन्छ । पहिलो दिन पोखराबाट तिखेढुगा, दोस्रो दिन तिखेढुंगाबाट घोरेपानी, तेस्रो दिन घोरेपानीबाट सूर्य उदाएको दृश्य अवलोकन गर्नलाई पुनहिल टावर गएर पुनः घोरेपानी आई बस्न सकिन्छ ।

समयको चापले घोरेपानी नबस्ने भए टाडापानी आएर बस्न सकिन्छ । चौथो दिन घान्द्रुक र पाँचौँ दिन पोखरा आउन सकिन्छ । पुनहिल हुँदै अन्नपूर्ण आधार शिविर पनि जान सकिन्छ । पोखरा–अन्नपूर्ण आधारशिविर–पोखरा ११ दिनको पदयात्रा हो ।

खर्च कति ?

काठमाडौं–पोखरा टुरिस्ट बसमा जाँदा खानासहित करिब १ हजार खर्च हुन्छ । अन्य साधारण बसमा जाँदा पनि हुन्छ । साधारण बसमा भाडा ५/७ सय रुपैयाँ लाग्छ । हवाईयात्राबाट जाँदा ३५ सयदेखि ४ हजार रुपैयाँसम्म लाग्छ । पोखरा बजारबाट नजिकै रहेको नयाँ पुलसम्म स्थानीय गाडीमा जान सकिन्छ ।

नयाँ पुलबाट सुरु हुने पदयात्रामा एक जनाका लागि दैनिक १ हजार रुपैयाँ भए पुग्छ । औसत खर्च गराइमा प्रतिव्यक्ति करिब १२ देखि १५ हजार रुपैयाँमा रमाइलोसँग घुमेर आउन सकिन्छ ।

प्रकाशित मिति: शनिबार, असोज २३, २०७८ ११:१४