नेकपाकाे चुनावी घोषणापत्रअनुसार प्रदेश ३ काे बजेट

A+ A A-

प्रदेश ३ को आर्थिक मामिला तथा योजना मन्त्रालय आउँदो आर्थिक वर्षका लागि बजेटको अन्तिम तयारीमा छ ।

१ असारमा ल्याइने बजेटमा समेटिने आधारभूत आर्थिक पाटोको तयारी लगभग सकिएको आर्थिक मामिला तथा योजना मन्त्रालयले जनाएकाे छ । आगामी बजेटमा मूलधारका राजनीतिक पार्टीको अवधारणापत्रमा उल्लेख भएका कार्यक्रम प्राथमिकतामा परेको स्रोतले जनाएको छ ।

बजेटको तयारीका लागि मन्त्रीदेखि मन्त्रालयका सबै कर्मचारीको दौडधुप बढेको छ । भूगोल, जनसंख्या, लक्षित समूहलगायत संविधानको मूल मर्म र भावनाअनुरुपको बजेट बनेको प्रदेश ३ का आर्थिक मामिला तथा योजनामन्त्री कैलाश ढुंगेलले बताए ।

अघिल्लो सालको बजेट हतारै हतारको कारण ल्याइएकोले कार्यान्वयनमा समस्या भएको कुरालाई स्वीकार गर्दै अब आउने बजेटमा भने चुनावताका राजनीतिक पार्टीले गरेको प्रतिबद्धतालाई ख्याल गरिने मन्त्री ढुंगेलले बताए ।

‘विशेष गरी बजेटले आधारभूत वर्गका जनताको आवश्यकता सम्बोधनमा जोड दिनेछ,’ मन्त्री ढुंगेलले भने ।

चालू आर्थिक वर्षमा पुँजीगत रकम खासै खर्च गर्न नसकेको प्रदेश सरकारले आउँदो आर्थिक वर्षका लागि यसअघिकाे भन्दा ठूलाे बजेट ल्याउने तयारी गरेकाे छ ।

सातवटै मन्त्रालयमा पठाइएको बजेट सिलिङअनुसार आउँदो वर्षभरि गरिने कामका योजना छनाेट गरी आइसकेको आर्थिक मामिला तथा योजनामन्त्री ढुंगेलले बताए । गत वर्षसमेत समेट्न नसकिएका योजना बजेटमा समेट्ने तयारी भएको उनले बताए ।

विगतलाई निरन्तरता दिँदै आगामी बजेटमा पनि भौतिक पूर्वाधारकै क्षेत्रमा बढी बजेट खर्च गरिने मन्त्री ढुंगेलको भनाइ छ । मन्त्री ढुंगेलका अनुसार आगामी बजेटमा प्रदेशका गौरवका योजना छनाेट गरेर काम गर्ने तयारी छ । केन्द्र सरकारले ल्याएको बजेट र नीति तथा कार्यक्रमलाई कार्यान्वनमा लैजान सहज हुने गरी बजेटको आधार तय गरिएको मन्त्रालयले जनाएको छ ।

प्रकाशित मिति: मंगलबार, जेठ २८, २०७६ ०५:४८