नेपाल भित्रियो फक्सवागनको नयाँ एसयूभी टाइगुन

A+ A A-

नेपालका लागि फक्सवागन गाडीको आधिकारिक वितरक पूजा इन्टरनेसन नेपाल प्रालीले फक्सवागन टाइगुन एसयूभी सार्वजनिक गरेको छ । टाइगुनलाई नेपालका लागि जर्मनीका राजदूत महामहिम डा. थोमस प्रिन्जले सार्वजनिक गरेका हुन् ।

नयाँ कम्प्याक्ट एसयूभी टाइगुन १.० लिटर टर्बो चार्ज्ड इन्जिनद्वारा सञ्चालित छ, जसले ११४ हर्षपावर र १७८ एनएम टर्क जेनेरेट गर्छ । नेपाली बजारमा उपलब्ध यस प्रकारका कम्प्याक्ट एसयूभीमध्ये यसको पावर र टर्क सबैभन्दा उच्च भएको कम्पनीको दाबी छ ।

फक्सवागन टाइगुनको सुरुवाती भेरियन्ट कम्फर्ट लाइनको मूल्य सीमित अवधिका लागि ५० लाख ९० हजार रुपैयाँ तोकिएको छ । तीन भेरियन्टमध्ये बाँकी दुई भेरियन्ट टाइगुन हाइलाइनको प्रारम्भिक मूल्य ६३ लाख ९० हजार र टाइगुन टपलाइनको प्रारम्भिक मूल्य ६९ लाख ९० हजार रुपैयाँ तोकिएको छ ।

भारत र नेपालको स्थानीय ड्राइभिङ अवस्थालाई मध्यनजर गरी विशेष रूपमा टाइगुनको डिजाइन गरिएको छ । अन्तर्राष्ट्रिय रूपमा प्रचलित एमक्यूबी प्लेटफर्मलाई फक्सवागनले एमक्यूबी एओआईएन प्लेटफर्ममा स्थानीयकरण गरी भारतमा यसको उत्पादन गरेको हो । यसले विश्वभर प्रचलित फक्सवागनका सबै मोडलमा उपलब्ध टिकाउपन र गुणस्तरलाई टाइगुनमा समेत प्रयोगमा ल्याएको कम्पनीको दाबी छ ।

फक्सवागन टाइगुनमा फ्रेस तथा भाइब्रेन्ट डिजाइनसहितको स्टाइलिस बोल्ड एक्सटेरियर छ । अघिल्लो भागमा भएको मस्कुलर ग्रिललाई एलईडी डे टाइम रनिङ हेडलाइट (डीआरएल्स) सँग पूर्ण रूपमा एकीकृत गरिएको छ । उच्च ग्राउन्ड क्लियरेन्स र लामो ह्विलबेस भएका कारण नेपाली सडकका लागि पूर्ण रूपमा उपयुक्त रहेको कम्पनीले जनाएको छ । इन्टेरियर डिजाइन पनि मोडर्न र फ्रेस छ भने ड्युअल टोन ड्यासबोर्डले कारको प्रिमियम अपिललाई अझै बढाएको छ ।

फक्सवागन टाइगुनले ९.१ सेकेन्डमै ० देखि १०० किलोमिटर प्रतिघण्टासम्मको गति लिन सक्छ । यसमा १० इन्च इन्फोटेनमेन्ट सिस्टम, फुल डिजिटल क्लस्टर, फ्रन्ट भेन्टिलेटेड सिट, हिल असिस्ट कन्ट्रोल, इलेक्ट्रिक मुनरुफ, एलईडी टेललाइटलगायतका विभिन्न अत्याधुनिक फिचर पाउन सकिन्छ ।

फक्सवागनमा प्रसिद्ध टीएसआई इन्जिन प्रविधि ब्रान्डकै पायोनियरिङ प्रविधि हो । यस इन्जिनको विशेषता भन्नु नै परम्परागत पुरानो इन्जिनभन्दा कम सीसीबाट नै अत्यधिक पावर एक्सिलरेसन र माइलेज दिनु हो ।

कम्पनीले प्रारम्भिक अवस्थामा पहिलो १ सय ग्राहकलाई निःशुल्क एसेसरिज र आकर्षक नगद छुटसमेत उपलब्ध गराउने भएको छ । प्रथम वर्ष कम्पनीले नेपालमा करिब १ हजारवटा टाइगुन बिक्रीवितरण गर्ने लक्ष्य राखिएको छ ।

प्रकाशित मिति: सोमबार, असोज १८, २०७८ १८:३२