कांग्रेस नगर अधिवेशन: मोरङमा कोइराला परिवारको वर्चश्व, संस्थापन पक्ष देखियो फितलो

कांग्रेस नगर अधिवेशन: मोरङमा कोइराला परिवारको वर्चश्व, संस्थापन पक्ष देखियो फितलो

A+ A A-

नेपाली कांग्रेसको १४ औं महाधिवेशन अन्तर्गत मोरङमा सम्पन्न गाउँ–नगरको अधिवेशनमा पौडेल–कोइराला पक्षले आफ्नो वर्चश्व पुष्टि गरेको गरेको छ ।

मोरङमा रामचन्द्र पौडेल–शेखर कोइराला समूह विराटनगर महानगरसहित १२ र कांग्रेस सभापति तथा प्रधानमन्त्री शेरबहादुर देउवा समूह ५ ओटा स्थानीय तहमा विजयी भएका छन् ।

विराटनगर महानगरको सभापतिमा दिपक चापागाईं निर्वाचित भए । उनले निकटतम प्रतिस्पर्धी सन्तोष न्यौपानेलाई ४७ मत अन्तरले पराजित गर्दै सभापतिमा निर्वाचित भए । सभापतिमा निर्वाचित चापागाई डा. शेखर कोइराला निकट हुन् भने न्यौपाने देउवानिकट हुन् । न्यौपानेले १६५ मत प्राप्त गरे ।

महानगर सभापतिका लागि चारजना बीच प्रतिस्पर्धा भएको थियो । संस्थापनबाट न्यौपाने मात्र थिए । पौडेल–कोइराला समूहबाट अरुण न्यौपाने र कृष्ण कार्की पनि सभापतिमा उठेका थिए । कार्कीले १३३ र न्यौपानेले १२७ मत ल्याए ।

आइतबार घोषित अन्तिम मतपरिणाम अनुसार उपसभापतिमा कोइराला समूहबाट इन्दु सुवेदी खतिवडा र निरज कोइराला निर्वाचित भए । यस्तै सचिवमा संस्थापनकी झुमा निरौला र कोइराला समूहका तेजिन्द्र भट्टराई निर्वाचित भए । सहसचिवमा कोइराला समूहका दिवस नेपाल र संस्थापनबाट सचिन पोखरेल निर्वाचित भएका छन् । महानगर अधिवेशनमा ६८१ मतदाता मध्ये ६६४ जनाले मतदान गरेका छन् ।

प्रदेश १ को एक मात्र महानगरको नेतृत्वको लागि देउवा र कोइराला समूहले प्रतिष्ठाका रुपमा लिएको थियो । एक महानगर र दुई उपमहानगर धरान र इटहरीमा संस्थापन इतर समूह नेतृत्वमा पुगेको हो ।

१७ वटा स्थानीय तहमध्ये तीनओटामा शुक्रबार र एउटामा शनिबार सर्वसम्मत नेतृत्व चयन भएको थियो । नयाँ नेतृत्व चयनका लागि १३ वटा स्थानीय तहमा शनिबार मतदान भएका थिए ।

मिक्लाजुङमा बबी राई निर्वाचित भएका छन् । निर्वाचित राईले १३७ मत प्राप्त गरे भने उनका निकटतम प्रतिस्पर्धी अरुणविक्रम बस्नेतले २१ मत प्राप्त गरे । निर्वाचित राई पौडल समूहका हुन ।

कटहरीमा पौडेल समूहका रामकुमार कामत ८३ मत प्राप्त गरी विजयी भएका छन् । उनका निकटम प्रतिस्पर्धी हरिनारायण माझीले ४३ मत प्राप्त गरे । सभापतिका अर्का उम्मेदवार शम्भु साहले चार मत प्राप्त गरे ।

धनपालथानमा देउवा समूहका दीपकवीर पाण्डे सभापतिमा निर्वाचित भएका छन् । पाण्डेले ८३ मत प्राप्त गरे । बेलबारी नगरपालिकाको नगर सभापतिमा पौडल समूहका छत्र लिम्बू १३६ मत प्राप्त गरी विजय भएका छन् भने देउवा समूहका शम्भु भट्टराईले ९४ मत प्राप्त गरे ।

कानेपोखरीमा पौडेल समूहका योगेन्द्र दाहाल ७३ मत प्राप्त गरी विजयी भएका छन् । देउवा समूहका दीपक चौलागाईंले ७१ मत प्राप्त गरे । सुनवर्षी नगरपालिकामा कमल किशोर गनगाईं निर्वाचित भएका छन् । उनले १०५ मत ल्याए । उनका निकटतम प्रतिस्पर्धी महेश्वर राजवंशीले ८९ मत ल्याएका छन् । सभापतिमा निर्वाचित गनगाई देउवा समूहका हुन् ।

यस्तै पथरीशनिश्चरेमा रुपनारायण भट्टराई निर्वाचित भएका छन् । उनले ८२ मत प्राप्त गरे । उनका निकटतम प्रतिस्पर्धी लोकनाथ खरेलले ५८ मत ल्याए । सभापतिमा निर्वाचित भट्टराई पौडेल समूहका हुन् । रंगेलीमा जगरनाथ मण्डल २ मत अन्तरले निर्वाचित भएका छन् । उनले १०६ ल्याए । उनका प्रतिस्पर्धी जितनारायण खवासले १०४ मत ल्याए । रंगेलीमा सभापतिमा दुवै उम्मेदवार देउवा समूहका हुन् ।

सुन्दरहरैचामा पौडेल–कोइराला पक्षका भक्तिप्रसाद सिटौला निर्वाचित भएका छन् । उनले देउवा समूहका महेन्द्र धिमाललाई १०२ मत अन्तरले पराजित गरे । सिटौलाले १६९ मत प्राप्त गरेका थिए । लेटाङमा दिपकचन्द्र राई निर्वाचित भएका छन् । उनले ६० मत प्राप्त गरे । उनका निकटतम प्रतिस्पर्धी देवराज चाम्लिङले ५६ र अर्का प्रत्यासी ४१ मत प्राप्त गरे । सभापतिमा निर्वाचित राई पौडेल समूहका हुन् ।

ग्रामथानमा तुलसी (किरण) विश्वास निर्वाचित भएका छन् । उनले ९३ मत प्राप्त गरे । उनका प्रतिस्पर्धी भूपनारायण माझीले ७२ र ग्रामथान १ को वडाध्यक्ष समेत रहेका नमोनारायण माझीले १७ मत प्राप्त गरे । सभापतिमा निर्वाचित विश्वास देउवा समूहका हुन् ।

बूढीगंगामा जितनारायण थापा ७६ मत ल्याएर विजयी भएका छन् । उनी पौडेल निकट हुन् । उनका निकटतम प्रतिस्पर्धी रेवतीनारायण चौधरीले ५४ मत ल्याए । यसअघि शुक्रबार जहदामा महेन्द्र मण्डल, उर्लाबारीमा सुरेन्द्र लिम्बु र केराबारीमा सभापतिमा प्रकाश बस्नेत निर्विरोध निर्वाचित भएका थिए ।

निर्विरोध निर्वाचित मण्डल देउवा, लिम्बु र बस्नेत पौडेल समूहका हुन् । शनिबार सर्वसम्मत भएको रतुवामाईको सभापतिमा पोष्टबहादुर बस्नेत निर्विरोध भएका थिए । उनी पौडेल–कोइराला निकटका नेता हुन् ।
मोरङको निर्वाचनलाई कोइराला परिवारको प्रतिष्ठाको विषयका रुपमा हेरिएको थियो । निर्वाचन सम्पन्न भएसँगै कोइराला परिवारले आफ्नो शाख जोगाएको छ ।

प्रकाशित मिति: आइतबार, असोज १७, २०७८ १८:०१