१८ वर्षमुनिका बालबालिकालाई दसैँलगत्तै कोरोना खोप लगाउन सुरु गर्छौं : स्वास्थ्य राज्यमन्त्री

१८ वर्षमुनिका बालबालिकालाई दसैँलगत्तै कोरोना खोप लगाउन सुरु गर्छौं : स्वास्थ्य राज्यमन्त्री

A+ A A-

स्वास्थ्य तथा जनसंख्या राज्यमन्त्री उमेश श्रेष्ठले दसैँलगत्तै १८ वर्षमुनिका बालबालिकाका लागि कोरोनाविरुद्धको खोप लगाउन सुरु गरिने बताएका छन् ।

आइतबार कान्ति बाल अस्पताललाई बुद्धिष्ट चु जी च्यारिटी फाउण्डेसनले स्वास्थ्य सामग्री हस्तान्तरण गर्न आयोजित कार्यक्रममा राज्यमन्त्री श्रेष्ठले बालबालिकाका लागि कोरोनाविरुद्धको १ करोड खोप आउने सुनिश्चितता भइसकेको बताए ।

‘सरकारको तर्फबाट यसलाई उच्च प्राथमिकता दिएर १ करोड खोप जसमा मोडर्ना ४० लाख र फाइजरका ६० लाख डोज खोप खरिद गर्ने व्यवस्था भइसकेको र यो दसैँलगत्तै १ लाख फाइजर खोप आउने, त्यसपछि फागुनसम्ममा पटकपटक गरेर फाइजर र मोडर्ना खोप बालबच्चाका लागि लगाइनेछ,' श्रेष्ठले भने, 'र, क्रमिक रूपमा देशभरि खोप लगाइने जानकारी गराउन चाहन्छु ।’

राज्यमन्त्री श्रेष्ठले सरकारले कोरोनाविरुद्धको खोपलाई पहिलो प्राथमिकता दिएको उल्लेख गर्दै तीनै तहका अस्पतालको व्यवस्थापकीय पक्षलाई सुधार्न नीति बनाउने तयारी सरकारले गरेको पनि बताए । सरकारले स्वास्थ्यक्षेत्रको दरबन्दी बढाउन ध्यान दिइएको उनको भनाइ छ ।

कोभिड १९ रोकथाम तथा नियन्त्रणका सम्बन्धमा मृत्यु भएका स्वास्थ्यकर्मीका बालबच्चालाई अध्ययनका लागि छात्रवृत्ति प्रदान गरिने पनि उनले जानकारी दिए ।

एक कार्यक्रमका बीच बुद्धिष्ट चु जी च्यारिटी फाउण्डेसनले कान्ति बाल अस्पताललाई २५ वटा भेन्टिलेटरलगायतको स्वास्थ्य सामग्री हस्तान्तरण गरेको छ ।

कोरोना संक्रमणको पहिलो लहरदेखि नै सरकारलाई विभिन्न स्वास्थ्य सामग्री सहयोग गर्दै फाउण्डेसनले संक्रमणको तेस्रो लहर आउन सक्ने सम्भावनालाई ध्यान दिँदै पूर्वतयारीस्वरुप स्वास्थ्य सामग्री हस्तान्तरण गरेको फाउण्डेसनका नेपाल प्रतिनिधि महेश नकर्मीले बताए । फाउन्डेसनले ४१ करोड ४८ लाख ४९ हजार ३ सय रुपैयाँबराबरको स्वास्थ्य सामग्री कान्ति बाल अस्पताललाई हस्तान्तरण गरेको नकर्मीले जानकारी दिए ।

प्रकाशित मिति: आइतबार, असोज १७, २०७८ १४:५८