फोर्ड गाडीका ग्राहकलाई सर्भिस र स्पेयर पार्ट्सको समस्या हुँदैन: आकाश गोल्छा

फोर्ड गाडीका ग्राहकलाई सर्भिस र स्पेयर पार्ट्सको समस्या हुँदैन: आकाश गोल्छा

A+ A A-

सन् १९९५ मा निकै महत्वाकांक्षी योजनासाहित भारत प्रवेश गरेको अमेरिकी अटोमोबाइल कम्पनी फोर्डले झण्डै २६ वर्षपछि प्लान्ट बन्द गर्ने घोषणा गर्‍यो । कम्पनीले २०२१ को अन्त्यमा गुजरातको सानन्दमा रहेको एसेम्बल प्लान्ट र २०२२ को मध्यमा चेन्नईमा रहेको सवारी तथा इन्जिन निर्माण गर्ने प्लान्ट बन्द गर्ने भएको हो ।

भारतमा धेरै लगानी गरेपनि प्रतिफल राम्रो नआएका कारण प्लान्ट बन्द गर्न लागिएको फोर्ड इन्डियाका अध्यक्ष र प्रबन्ध निर्देशक अनुुराग मल्होत्राले बताएका थिए । फोर्डले एक दशकमा २ अर्ब डलर नोक्सान व्यहोर्नु परेको थियो ।

नेपालमा फोर्डको फ्रि स्टाइल, फिगो, इकोस्पोर्ट, फिएस्टा, र एन्डेभर भारतबाट आयात भैरहेको छ । यी गाडी नेपालमा ८ हजार भन्दा धेरै बिक्री भैसकेको छ ।

भारतमा फोर्डको उत्पादन बन्द भएपछि नेपालमा बिक्री भएका भारतीय मोडलमा फोर्डका गाडीहरूको सर्भिस, स्पेयरपार्ट्स, वारेन्टी लगायत सेवा नपाउने हो कि भन्ने त्रास ग्राहकमा देखिएको छ । यसै सन्दर्भमा शिलापत्रले नेपालका लागि फोर्ड गाडीको आधिकारीक वितरक रहेको गोल्छा अर्गनाईजेसन अन्तर्गतको जीओ–फोर्डका प्रबन्ध निर्देशक आकाश गोल्छासँग कुराकानी गरेक‍ो छ । यस्तो छ कुराकानीको संक्षेप प्रस्तुति :

फोर्ड गाडीको भारतीय मोडल उत्पादन हुन बन्द भयो, नेपालमा यसको असर के हुन्छ ?

फोर्ड इन्डियाको प्लान्ट मात्र बन्द भएको हो, कम्पनी नै बन्द भएको होइन । उनीहरूले सर्भिस पनि दिन्छन् र ग्लोबल मोडलका गाडीहरू पनि ल्याउँछन् । कम्पनीलाई पुनः संरचना गरिएको मात्र हो । उनीहरूले २०२२ को जुनसम्म गाडी बनाउने छन्, त्यसपछि भने भारतीय मोडलमा गाडीहरू नेपालमा आउँदैनन् ।

त्यसो भए अब नेपालमा फोर्डका गाडी आउँदैनन् ?

हामी फोर्डको ग्लोबल मोडलहरू ल्याएर बेच्छौं । अहिले पनि रेन्जर र्‍याप्टर ल्याइरहेका छौं । एभरेस्ट ल्याउने तयारीमा छौं । त्यस्तै फोर्डले उत्पादन गर्ने अन्य नयाँ मोडलका गाडीहरू पनि ल्याउँछौं ।

स्पेयर पाट्स, वारेन्टी र सर्भिस पाइँदैन कि भन्ने त्रास ग्राहकमा देखिएको छ नि ?

फोर्ड नेपालमा छ । गोल्छा अर्गनाइजेसन नेपालमा छ । भारतीय मोडलका फोर्डका गाडी चलाउने हाम्रा ग्राहकलाई वारेन्टी, सर्भिस र स्पेयरमा कुनै समस्या हुन दिँदैनौं ।

नेपाली बजार छाडेका केही ब्रान्डका गाडीहरूमा सर्भिस र स्पेयरको समस्या देखिएको उदाहरणहरू छन् नि ?

एउटा कुरा त फोर्ड भारतमा बन्द भएको होइन, पुनःसंरचना गर्न लागिएको हो । उनीहरूको सबै सर्भिस चालु छ । नेपालको हकमा हामी फोर्डको डिलर रहन्छौं नै । हामीले भारत बाहिरका पनि फोर्डका गाडी ल्याउँछौ । त्यसैले हाम्रो सर्भिस सेन्टर र शोरुम पनि रहन्छ । नयाँ–नयाँ उत्पादन ल्याइहाल्छौं । त्यसैले ग्राहकले पार्ट्स नपाउने, पार्ट्स महँगो हुने हुँदैन । ढुक्क भए हुन्छ, आत्तिनु पर्दैन ।

उसो भए महँगो गाडी मात्रै आयात गर्ने भएपछि तपाईँहरूको सबै डिलर र सर्भिस सेन्टरलाई टिक्न गाह्रो पर्छ होला ?

फोर्डले सानो गाडी पनि बनाउला, तर तत्कालको के हुन्छ भन्ने कुरा आउँछ । ठूला शहरहरूमा त केही समस्या हुँदैन, हाम्रो शोरुम र सर्भिस सेन्टर कायम नै हुन्छ । साना शहरहरूमा हामी नै आधिकारिक वितरक भएको अन्य ब्रान्डका सर्भिस सेन्टरहरूले फोर्डको सर्भिस समेत दिन्छ । सर्भिस दिन सकिन भने त मलाई नै घाटा हो । भारतीय मोडलका गाडीलाई सर्भिस दिन सकिन भने त, फोर्डकै ग्लोबल मोडल र मेरा अन्य ब्रान्डका गाडी बेच्न पनि कठिन हुन्छ नि ।

अब तपाईंहरूसँग भारतीय मोडलका कति गाडी बाँकी छन् ?

धेरै छैन । करिव एक सय ओटा होला ।

मान्छेहरू फोर्डको सर्भिसमा समस्या आउला भन्ने त्रासमा छन् । यस्तो अवस्थामा गाडी बेच्न सकिएला त ?

फोर्डका गाडीहरू बिक्री भैरहेका छन् । बेच्न गाह्रो किन हुँदैन भने हाम्रो गाडी राम्रो छ, मूल्य सन्दर्भिक छ । गलत हल्लाको कारण ग्राहकहरूलाई एक प्रकारको त्रास त छ, तर हामीसँग सम्पर्कमा आउनुभएका ग्राहकलाई बुुझाएर आत्मविश्वास बढाउने काम गरेका छौं ।

एक सय ओटा गाडी भनेको पनि सानो सङ्ख्या होइन, यसलाई बिक्री गर्न मूल्य घटाउने लगायतका कुनै रणनीति अपनाउने सोच बनाउनु भएको छ ?

हामी मूल्य घटाउँदैनौं । किनभने यही मूल्यमा गाडी बेच्न सक्छौं भन्ने आत्मविश्वास हामीसँग छ । अरु ब्रान्डले दिने जस्ता सामान्य अफरहरू त दिन परिहाल्यो ।

भारतीय मोडल आउन छोडेपछि तपाईंहरूको बजार कति घट्ला ?

संख्याको आधारमा २०/३० प्रतिशतमा पुग्छौं होला । तर भ्यालुुको आधारमा ६०/७० प्रतिशतमा मात्र पुग्छौं । अहिले पनि हामीले महँगो गाडी बेचिरहेको हुनाले भ्यालुमा त्यति ठुलो असर पर्दैन ।

तपाईं आफ्ना ग्राहकहरूलाई के भन्न चाहनुहुन्छ ?

हल्लाको पछाडि लागेर नडराउनुहोस् । तपाईंहरूले हामीलाई विश्वास गरेर गाडी किन्नुुभयो । हामी तपाईंहरूको विश्वास कायमै राख्छौं । स्पेयर पार्ट्स नपाउने, महँगो हुने जस्ता केही समस्या हुन दिँदैनौं ।

प्रकाशित मिति: शनिबार, असोज १६, २०७८ २०:३४