कांग्रेस महाधिवेशन : मोरङमा जोगिएला कोइराला परिवारको शाख ?

A+ A A-

नेपाली कांग्रेसको १४ ‍औं महाधिवेशन अन्तर्गत आज भइरहेकाे गाउँ/नगर पालिकाहरूको अधिवेशनका लागि माेरङका सबै स्थानीय तहहरूमा सभापतिसहितका उमेद्वारहरुले मनोनयन दर्ता गरेका छन् ।

केही स्थानीय तहमा सभापतिसहितका पदाधिकारीहरू नेताहरूको पहलमा सर्वसम्मत छनौट भएपनि अधिकांश स्थानमा दुई छुट्टाछुट्टै समूह प्यानलसहित चुनावी मैदानमा उत्रिएकाे छ ।

शुक्रबार बेलुकासम्म जदाहा, केराबारी गाउँपालिका र उर्लाबारी नगरपालिकामा सभापतिसहितका पदाधिकारीहरू सर्वसम्मत चयन भएका छन् । अन्य पालिकाहरूमा पनि सर्वसम्मतका लागि पहल भइरहेको छ ।

जदहामा सभापति महेन्द्र मण्डलसहित सबै पदाधिकारीहरू सर्वसम्मत चयन भएका छन् । मण्डल संस्थापन समूहका हुन् । उर्लाबारीकाे सभापतिमा सुरेन्द्र लिम्बुसहित (सचिव बाहेक) सबै पदमा सर्वसम्मत नेतृत्व भएको छ । लिम्बु पौडेल समूहका हुन् ।

केराबारीमा पनि सभापतिसहित सबै पदमा सर्वसम्मत नेतृत्व चयन भएको छ । केराबारीकाे सभापतिमा प्रकाश बस्नेत चयन भएका छन् । उर्लाबारी र केराबारीका सर्वसम्मत चयन भएका दुवै सभापतिहरूलाई पौडल समूहका डा शेखर कोइरालाको समर्थन थियाे ।

विराटनगर महानगरपालिकामा दीपक चापागाँई, सन्तोष न्यौपाने, कृष्ण कार्की र अरुण न्यौपानेले सभापतिमा मनोनयन दर्ता गरेका छन् । जसमा चापागाँईलाई कोइरालाको समर्थन रहेको छ भने सन्ताेष न्यौपाने देउवा समूहका उम्मेदवार हुन् । कार्कीले आफूलाई कृष्णप्रसाद सिटौला लाइनको बताउँदै आएका छन् ।

त्यस्तै कटहरी गाउँपालिकामा रामकुमार कामत, हरिनारायण माझी र शम्भु साहले सभापतिमा मनोनयन दर्ता गरेका छन् । कामतलाई पौडेल समूहका महेश आचार्यहरूको समर्थन रहेको छ भने माझी देउवा समूहका उम्मेदवार हुन् ।

बुढीगँगामा जीतबहादुर थापा र रेवती नारायण चौधरीले सभापतिमा मनोनय दर्ता गराएका छन् । थापालाई डा शेखर कोइरालाको समर्थन रहेको छ भने चौधरीलाई देउवा समूहकाे ।

उता रङ्गेली नगरपालिकामा सभापतिमा जीतनारायण खवास र जगनाथ मण्डलले मनोनयन दर्ता गराएका छन् । यी दुवै देउवा समूहका हुन् ।खवासलाई पौडेल समूहका डा मिनेन्द्र रिजालहरूको पनि समर्थन रहेको बुझिएकाे छ ।

त्यस्तै धनपालथानमा सभापति बाहेकका सबै पदाधिकारीहरू सर्वसम्मत चयन भएका छन् । सभापतिमा भने दिपकवीर पाण्डे र वासुदेव रायको उमेद्वारी दर्ता भएको छ । सुनवर्षी नगरपालिकामा महेश्वर राजवंशी, कमलकिशोर सिंह र बैजनाथ झाले सभापति पदमा मनोनयन दर्ता गरेका छन् ।

त्यस्तै रतुवामाईमा सभापतिमा पदमा कन्यैलाल राजवंशी र पोष्टबहादुर बस्नेतले मनोनयन दर्ता गराएका छन् । तर, कन्यैलालको पक्षमा सर्वसम्मत गराउने पहल भइरहेको स्थानीय कांग्रेसका नेताहरूले बताएका छन् ।

सुन्दर हरैचामा महेन्द्र धिमाल र भक्ति सिटौलाले सभापतिमा मनोनयन दर्ता गराएका छन् । धिमाल देउवा समूहका हुन् भने सिटौला कोइराला निकट हुन् । बेलबारीमा सभापतिमा छत्र लिम्बु र शम्भु भट्टराईले मनोनयन दर्ता गराएका छन् ।

लिम्बु पौडेल समूहका हुन् भने भट्टराई देउवा समूहका हुन् । त्यस्तै मिक्लाजुङमा बबि राई र अरुण विक्रम बस्नेतले सभापतिमा मनोनयन दर्ता गराएका छन् । मिक्लाजुङमा सभापति बाहेक सबै पदमा सर्वसम्मत भएको छ ।

पथरीशनिश्चरेमा सभापतिमा इश्वर थापा, लोकमान खरेल र रुपनारायण भट्टराईले उमेद्वारी दर्ता गराएका छन् । जसमा खरेल देउवा समूह, भट्टराई पौडेल समूहका डा शेखर कोइराला र थापालाई पौडेल समूहकै महेश आचार्यहरूको समर्थन रहेको बताइएको छ ।

सर्वसम्मत हुन नसकेका स्थानमा शनिबार मतदानबाट नेतृत्व चयन हुनेछ । कोइराला परिवारको प्रतिष्ठा जाेडिएको मोरङमा आफ्ना पक्षका उम्मेदवार जिताउन नेताहरू लागि परेका छन् ।

प्रकाशित मिति: शनिबार, असोज १६, २०७८ १२:४१