विवादै विवाद बाेकेर महानायककाे दाैडमा भुवन केसी

A+ A A-

फिल्मक्षेत्रमा एउटा भनाइ छ– भुवन केसी नेपाली फिल्मक्षेत्रका सदावहार अभिनेता हुन् ।

भुवनले आफ्नो करिअरमा धेरै सफल फिल्म दिएका पनि छन् । सम्झना, कुसुमे रुमाल, चिनो, दुई थोपा आँसु, करोडपति उनका सफल फिल्मका सूची हुन्, जहाँ भुवनले उल्लेख गर्न लायक अभिनय गरेका छन् । 'गुड लुकिङ' भुवनले आफूलाई रोमान्टिक हिरोको रूपमा स्थापित नै गरेका छन् ।

सफल फिल्मको आँकडा निकाल्ने हो भने भुवनलाई अरु अभिनेताले हतपती भेट्दैनन् । समकालीन अभिनेता शिव श्रेष्ठ, सरोज खनालदेखि राजेश हमालले उनलेझै‌ँ सबैजसाे सफल फिल्म दिएनन् । अहिलेको पुस्तामा लोकप्रिय अभिनेता दयाहाङ राई, विपिन कार्कीदेखि उनकै छोरा अनमोल केसीले पनि भुवनको सफलतालाई चुम्ने कुरामा शंकै छ ।

शिव र राजेशबाहेक भुवनका समकालीन अभिनेताहरू अहिले गुमनाम छन् । तर, भुवनको चर्चा भने ज्युँका त्युँ छ । छोरा पुस्ताले फिल्मक्षेत्रमा चहलपहल दिइरहेको समयमा भुवनको उपस्थिति जबर्जस्त छ ।

भुवनको एउटा मान्यता छ, 'नाम होस्, बदनाम होस् । तर, गुमनाम नहोस् ।'

साँच्चिकै भुवन कहिले राम्रो काम गरेर चर्चामा छन् त कहिले आलोचनाबाट । तर, मिडियाको घेराबन्दीबाट उनी टाढा छैनन् ।

तर, फिल्मक्षेत्रमा भुवनको परिचय सदावहार हिरोको रूपमा मात्र कहाँ छ र ? उनको नामको अगाडि हरदम एउटा विशेषण जोडिन्छ, 'प्ले ब्वाई' ।

अभिनेत्री सारंगा श्रेष्ठले भनेकी थिइन्, 'यदि भुवन केसी फिल्मक्षेत्रमा थिएनन् भने धेरै अभिनेत्रीहरू कुमारी नै हुन्थे ।'

सारंगाको उक्त अभिव्यक्ति फिल्मक्षेत्रमा लामो समय गसिपको विषय बन्यो । मिडियाले पनि भुवनलाई प्रश्न सोध्न थाले, 'के तपाईं स्त्रीलम्‍पट हो ?'

यो प्रश्न त भुवनलाई अहिलेसम्म पनि सोधिन्छ । जवाफमा उनले आपत्तिजनक किसिमकाे टिप्पणी गर्ने गरेका छन्, 'हेन्डसम छु, केटीहरू पछि लाग्छन् त मेरो के दोष ?'

महिलाको प्रसंगमा भुवनका लफडाहरू कम छैनन् । व्यक्तिगतदेखि व्यावसायिकसम्मका लफडामा महिला जोडिएका छन् । त्यो लफडाको लहरो तन्किँदै अभिनेत्री करिश्‍मा मानन्धरदेखि साम्राज्ञी राज्यलक्ष्मी शाहसम्म आइपुगेको छ ।

सुरु गरौँ पुरानै प्रसंगबाट ।

फिल्म 'महादेव'को छायांकन चलिरहेको थियो । नारायण रायमाझीले निर्देशन गरिरहेको यस फिल्ममा भुवन र करिश्मा मुख्य भूमिकामा थिए ।

एक दृश्यमा भुवनले करिश्मालाई चुम्बन गर्नुपर्ने थियो । धेरै टेक लिइसक्दा पनि निर्देशकले चित्त बुझाएनन् । भुवनले नियोजित रूपमा नै टेक बिगारेको आरोप लाग्यो । अन्तत: करिश्माले निर्देशकलाई प्रश्न नै गरिन् ।

भुवन करिअरको उतरारर्द्धमा रहँदा एक युवतीको प्रेममा थिए । बुटिक सञ्चालन गर्ने ती युवती र भुवन सार्वजनिक कार्यक्रममा पनि सँगै देखिन्थे । उनीहरूको प्रेमचर्चाले फिल्मक्षेत्रलाई तताएको थियो । भलै, उनीहरूले आफ्नो प्रेमलाई स्वीकारेनन् ।

तीनै युवतीसँग गाडी चडेर नगरकोट हिँडेका भुवनलाई कोटेश्वरमा ती युवतीका श्रीमान्‌ले हेलमेटले कुटेको खबर खुबै भाइरल भयो । भुवन कोटेश्वरमा बाटो छेकेको कुरालाई स्वीकार्छन् । तर, कुटाइ खाएको कुरालाई स्वीकार्दैनन् ।

केही समयअगाडि उनले एक मिडियामा भनेका थिए, 'हामी बुटिकको विज्ञापनका लागि लोकेसन हेर्न जाँदै थियौँ । उहाँको श्रीमान् आएर बाटो छेक्नुभयो । उहाँहरूबीच भनाभन सुरु भएपछि म त्यहाँबाट हिँडे । मैले कुटाइ खाएको कुरा निराधार हो ।'

यो घटनापश्चात् ती युवतीसँग भुवनको सम्बन्ध सकियो । अनि भुवनको जीवनमा आइन्, अभिनेत्री जिया केसी ।

भुवन र जिया अहिले लिभ–इन टुगेदरमा छन् । लामो समयदेखि उनीहरू एकसाथ बस्दै आएका छन् । तर, उनीहरूले औपचारिक रूपमा आफ्नो सम्बन्ध खुलाएका छैनन् । अभिनेत्री सुस्मिता केसीसँगको वैवाहिक सम्बन्धलाई टुंग्याएका भुवनले अहिले जियाको साथ पाइरहेका छन् ।

सुस्मिता बमजन (केसी) सँग भुवनले प्रेमविवाह गरेका थिए । तर, सुस्मिता भुवनकी पहिलो श्रीमती भने होइनन् । भुवनले सुस्मितालाई दोस्रो श्रीमतीका रूपमा भित्र्याएका थिए ।

भुवनकी पहिलो श्रीमती विजया केसी एक छोरा र एक छोरीका साथ अमेरिकामा बस्छिन् । यता सुस्मितातर्फका छोरा अनमोल केसी नेपाली फिल्मक्षेत्रमा 'लिड' गरिरहेका छन् ।

भुवनका छोरा अनमोलसँग स्क्रिन शेयर गर्दै 'ड्रिम्स'बाट फिल्मक्षेत्रमा डेब्यु मारेकी अभिनेत्री साम्राज्ञी राज्यलक्ष्मीसँगको विवाद भुवनको पछिल्लो लफडा हो । साम्राज्ञीले भुवनलाई यौन शोषणको आरोप लगाएपछि यो विवाद सतहमा आएको थियो ।

लकडाउनका कारण फिल्मक्षेत्र सुनसान बनेको बेला साम्राज्ञीले सामाजिक सञ्जालमा एक भिडियो पोस्ट गरिन् । जहाँ उनले आफूले काम गरेका मध्ये तीनवटा फिल्ममा आफूलाई दुर्व्यवहार भएको बोलेकी थिइन् ।

साम्राज्ञीले कसैको नाम त तोकेकी थिइनन् । तर, फिल्मक्षेत्रमा डेब्यु गराएका भुवनलाई चस्का पर्‍यो । अनि सामाजिक सञ्जालबाट नै जवाफ फर्काइहाले- 'जुन थालमा खायो, त्यही थाल दुलो पार्ने... ।'

साम्राज्ञीलाई उक्त कुरा चित्त बुझेन । अनि फेरि बोलिन्, 'उहाँले मसँग राम्रो व्यवहार गर्नुभएको थियो भने यो अवस्था आउने नै थिएन । आज यो अवस्था आएकै उहाँले गर्दा हो ।’

साम्राज्ञीले यति मात्र बोलिनन्, आफूमाथि भुवनले गरेको व्यवहारबारे पनि बोलिन् । जापानमा भएको अवार्ड कार्यक्रममा भुवन आफूसँग टाँसिन आएको पनि साम्राज्ञीले आरोप लगाइन् । उनले भनेकी छिन्, 'उहाँले गालामा मुख जोडाएर छोरी, अब यस्तो नगर है भन्नुभयो । तैपनि मैले सुनिरहेँ ।'

पछि भुवन र साम्राज्ञी दुवैले कानुनी बाटो रोजे । दुवैले जिल्ला अदालत काठमाडाैंमा अलगअलग मुद्दा दर्ता गराएका छन् । मुद्दा अझै विचाराधीन अवस्थामै छ ।

यी त भुवनका चर्चित बनेका लफडा हुन् । यीबाहेक सुटिङ सेटमा प्रोडक्सन म्यानेजरलाई हातपात गरेकोदेखि होटलको बिल नतिरेकोसम्म थुप्रै किस्सा भुवनको नाममा छन् ।

पछिल्लो समय भुवन 'महानायक'को विषयलाई लिएर फेरि चर्चामा आए । एक कार्यक्रममा उनले राजेश हमालले पाइरहेको 'महानायक' उपाधि अर्का अभिनेता शिव श्रेष्ठलाई भिराइदिए । उता शिवले पनि भुवनलाई महानायक स्वीकारे । अहिले यस विषयमा ठूलै बहस चलिरहेको छ ।

त्यति मात्र होइन, भुवन र शिवले संयुक्त रूपमा नै अभिनेत्री गौरी मल्ललाई महानायिका बनाइदिए । जुन कुरामा अहिले पनि विभिन्न टिकाटिप्पणीहरू चलिरहेका छन् ।

विवादै विवादका शृ‌खला बाेकेर भुवन महानायककाे दाैड जित्न कस्सिएका छन् । जे होस्, भुवन आफ्नो मान्यतामा कटिबद्ध देखिन्छन्, 'नाम होस्, बदनाम होस् । तर, गुमनाम नहोस् ।' यद्यपि फिल्म उद्याेगले उनकाे जवाफदेहिता भने खाेजिरहेकाे छ ।