दुखेकाे हुँदैन तर गिजाबाट किन आउँछ रगत ? के भन्छन् डाक्टर ? (भिडियाेसहित)

A+ A A-

मान्छेकाे स्वास्थ्य धेरै हदसम्म मुख र दाँतको सफाइमा निर्भर हुन्छ । किनकि, खाद्य, अखाद्य दुवै कुरा मुखहुँदै शरीरमा पुग्ने हुन् । डाक्टर भन्छन्, 'मुखको सफाइमा खास ध्यान दिने मान्छे धेरैखाले राेगबाट जाेगिन सक्छ ।'

उसाे त, दाँतले मान्छेकाे साैन्दर्यसँग पनि साइनाे राख्छ । मिलेका दन्तपङ्क्तिले मान्छेकाे आत्मविश्वाससमेत बढाउँछ ।

आत्मविश्वास भएकाे मान्छे धेरै कुरामा सफल हुन्छ । दाँत बिग्रेका छन्, मिलेका छैनन् भने यही कारणले धेरैलाई मानसिक चिन्तासम्म पुर्‍याउँछ । यसरी दाँत हाम्राे मानसिक स्वास्थ्यसँग पनि जाेडिएकाे छ । शरीरकाे यति महत्त्वपूर्ण अंगकाे सुरक्षामा हामी कति सचेत छाैँ ? दाँतकाे सुरक्षा, हेरचाहलगायतबारे दन्तराेग विशेषज्ञ डा. सुवास घिमिरेसँग भिडियाेमा हामीले केही टिप्स मागेका छाैँ ।

भिडियाे हेर्नुअघि डा. घिमिरेले भनेका सुझावकाे मूल सार पढाैँ :

नेपालमा खासगरी मुख गन्हाउने, गिजाबाट रगत आउने, दाँतको सडनका पीडितहरू ज्यादा छन् ।
दाँत सफा गर्न जानिएन भने पनि समस्या आइपर्छ । कतिपयले एक ठाउँ वा दुई ठाउँ अर्थात् मुखको तल्लो भाग वा माथिल्लो भागमा मात्रै ब्रस गर्छन् । तर, दाँतका पाँचवटा भाग नै सफा गर्नुपर्छ । बिहान उठ्नेबित्तिकै र राति सुत्नुअघि ब्रस गर्नुपर्छ । रोग प्रतिरोधक क्षमता कम भएका वा कुनै रोगका पीडितहरूको हकमा भने बिहान उठ्नेबित्तिकै र खाना खाएलगत्तै ब्रस गर्नुपर्छ ।
मञ्जनले किटाणु मार्छ भन्ने कुरा पूर्ण सत्य होइन । मुख र दाँतका किटाणु मार्ने एन्टी ब्याक्टेरियल प्रोपर्टी त हाम्रो थुकमै हुन्छ । विभिन्न प्रकारका आयुर्वेदिक पेस्टहरू प्रयोग गर्न हुँदैन । मञ्जन त मज्जाका लागि मात्रै प्रयोग गरिन्छ ।
खानेकुरा आफैँमा ब्रस हो । शरीर आफैँ औषधि हो ।
अर्ग्यानिक खानेकुरा खानुपर्छ ।
तपाईंको दाँत बाङ्गोटिङ्गो छ भने यसलाई तपाईंले नै मिलाउन सक्नुहुन्छ । बिहानीपख मानिसका दाँत सामान्य रूपमा हल्लिने स्थितिमा हुन्छन् । दैनिक आफ्नो जिब्रोले धकेलेर दाँत मिलाउन सकिन्छ । बाङ्गिएका दाँत बेलैमा मिलाइएन भने त्यसले टाउको दुख्नेलगायत समस्या ल्याउँछ ।

अब भिडियाे हेराैँः