वीरबाट प्रसूति पठाइएका डा. जागेश्वर फर्किएनन् काममा, ओम अस्पतालबाट गर्छन् बिरामीको उपचार

वीरबाट प्रसूति पठाइएका डा. जागेश्वर फर्किएनन् काममा, ओम अस्पतालबाट गर्छन् बिरामीको उपचार

A+ A A-

सरकारले गत १९ साउनमा कोभिड युनिफाइड केन्द्रीय अस्पताल ‘वीर अस्पताल’का प्रमुख प्रशासकीय अधिकृत डा. जागेश्वर गौतमलाई पराेपकार प्रसूति तथा स्त्री राेग अस्पतालमा सरुवा गर्‍यो ।

दुई महिना बित्यो, तर उनी प्रसूति अस्पतालमा हाजिर भएर काममा फर्किएका छैनन् । ‘हाजिर गरेर घरायसी कामले बिदामा बसेको छु । निर्देशकले बिदा स्वीकृत गरेर नै बसेको हुँ । यो महिनाभर बिदा छ,’ डा. गौतम भन्छन्, ‘म प्रसूतिकै कर्मचारी हुँ ।’

प्रसूति गृहको प्रशासनले पनि डा. गौतम बिदामै बसेको बताएको छ । ‘हाजिर गरेर बिदा लिएर जानुभएको छ । बिदा स्वीकृत भइसकेकाे छ,’ अस्पतालकी निर्देशक डा. संगीता कौशल मिश्रले भनिन्, ‘उहाँ वार्षिकोत्सवमा पनि आउनुभएको थियो । बीचबीचमा आउँदै बिदा मिलाएर बस्नुभएको छ ।’

सरकारले अपमान गरेर वीरबाट हटाएको र आफूभन्दा कनिष्ठ नेतृत्व रहेको ठाउँमा पठाएकाले आफू बिदामा बसेको डा. गाैतमले संकेत गरे । ‘सरकारले मेरो इन्सल्ट गर्‍यो । अपमान गरेपछि खुसी छैन । वीरबाट हटाएर प्रसूतिमा पठाउनु भनेको मेरो क्षमताअनुसारको काम दिइएन भन्नेमा सचिव र राज्यमन्त्री पनि सहमत हुनुहुन्छ,’ उनी भन्छन् ।

वीरबाट हटाएपछि राज्यमन्त्री उमेश श्रेष्ठ र सचिव डा. रोशन पोखरेलले पाँच दिनभित्र व्यवस्थापन गर्ने वचन दिएको बताउँछन्, डा. गौतम । ‘राज्यमन्त्री र सचिवलाई तपाईंहरूले ठीक गर्नु भएन भनेर भनेको थिएँ । पाँच दिनभित्र व्यवस्थापन गर्छु भन्नुभएको थियो । दुई महिना पुग्यो, व्यवस्थापन भएको छैन,’ उनी भन्छन् ।

राज्यमन्त्री श्रेष्ठ भने डा. गाैतमलाई आफूले पाँच दिनमा व्यवस्थापन गर्ने आश्वासन नदिएको बताउँछन् । ‘मैले पाँच दिनभित्र व्यवस्थापन गर्छु भनेकै छैन । मिडियामा गएर बोल्दैमा व्यवस्थापन हुन्छ ?,’ मन्त्री श्रेष्ठ भन्छन्, ‘उहाँ अन्यायमा परेको भए मन्त्रालयमा आएर कुरा गर्नुपर्‍यो ।’

वीरबाट डा. गौतमलाई स्वास्थ्य राज्यमन्त्री श्रेष्ठले नै १८ साउनमा हटाएका थिए । तर, ११औँ तहको कर्मचारी राज्यमन्त्रीले सरुवा गर्न नमिल्ने भएकाले राज्यमन्त्रीको निर्णय उल्ट्याएर स्वास्थ्य मन्त्रालयसमेत सम्हालेका प्रधानमन्त्री शेरबहादुर देउवाले भोलिपल्ट अर्को निर्णय गरेर उनलाई हटाएका थिए ।

डा. गौतम भन्छन्, ‘बदमासी गरेजसरी सजाय दिने तरिकाले व्यवहार गरियो । नियोजित रूपमा हटाइएको हो । सरकार पक्षपाती भयो । ११औँ तहको कर्मचारीलाई हटाएर १०औँ तहकोलाई राखेर मानमर्दन गर्ने काम भयो ।’

वीर अस्पतालमा सुधारको काम गर्दागर्दै आफूलाई सरकारले हटाएको डा. गौतमकाे दाबी छ । ‘वीरबाट एक हप्ता मात्र नहटाएको भए २ सय आईसीयू बेड चलिसक्थ्याे । गरिबले उपचार पाउँथे । वीरमा १ हजार बेड बनाएर कसले काम गरेको थियो ? मैले ६५ दिनमा गरेको थिएँ । मैले तयार गरेको आईसीयू अहिलेसम्म सुरु भएको छैन,’ उनी भन्छन् ।

आफ्नो व्यवस्थापन भएपछि मात्र काममा फर्किने सोचमा छन्, डा. गौतम । ‘स्वास्थ्यमन्त्री कुरिरहेको छु । अहिले राज्यमन्त्री हुनुहुन्छ । मेरो लेभलको सरुवा गर्ने अधिकार छैन । मन्त्री आएपछि व्यवस्थापन हुने अपेक्षा छ,’ उनी भन्छन्, ‘एउटा मन्त्री बनाउन त सरकारले सकेको छैन । मेरो के होला ?’

उनी तत्कालीन प्रधानमन्त्री केपी ओलीको फोर्समा मन्त्रालयको प्रवक्ता र वीरको प्रमुख कार्यकारी अधिकृत भएको आरोप लाग्ने गरेको छ । तर, उनी त्यसलाई स्वीकार गर्दैनन् । भन्छन्, ‘ओली सरकार हुँदा सरकारले नै लगाएको काम गरेँ । अहिले देउवा सरकार छ, जिम्मेवारी दियाे भने पहिलेको जस्तै काम गर्छु । तर, सम्मानजनक हुनुपर्‍यो, इन्सल्ट गरेर होइन ।’

मन्त्री श्रेष्ठ भने डा. गौतमले प्रसूतिमै गएर काम गर्नुपर्ने बताउँछन् । ‘प्रसूतिमा ११औँ तहको महिला हुनुहुन्छ । उहाँ १२औँ तहको भएर ११ को मुनि लगेको भए अपमान हुने हो । जागेश्वरजी पनि ११औँ तहकै हो । सधैँ हाकिम हुने भन्ने हुँदैन । उहाँको दरबन्दी जहाँ हाे, त्यहीँ गएर काम गर्नुपर्छ,’ मन्त्री श्रेष्ठ भन्छन् ।

ओमबाट गर्छन् बिरामीको इलाज

प्रसूति गृहमा घर बिदा लिएर बसेका उनी निजी स्वास्थ्य संस्था ओम अस्पतालमा भने बिरामीको उपचार गरिरहेका छन् । डा. गौतम सरकारी समयभन्दा बाहिरको समयमा काम गरेको बताउँछन् । ‘बिहानबेलुका काम गर्न पाइन्छ । अफिस समयमा गर्दिनँ । सरकारीभन्दा बाहिर मैले मात्र गरेको छ र ? सरकारले काम दिनुपर्‍यो नि, काम दिएन भने आफ्नै काम गर्ने त हो नि,’ उनी भन्छन् ।

स्वास्थ्य र शिक्षाको निजीकरण गर्ने कुराको आफू जन्मजात विरोधी भएको विराेधाषपूर्ण तर्क गर्छन्, उनी । ‘मानिस जन्मिएपछि प्राइभेट अस्पताल र प्राइभेट स्कुल जानु नपरोस् भनेर सक्रिय रूपमा माग राख्दै आएको छु । सरकारी संस्था नै बलियो हुनुपर्छ,’ निजी अस्पतालमा समेत कार्यरत उनी भन्छन्, ‘सरकारले व्यवस्था गर्न नसकेसम्म त बिरामीले कहीँ न कहीँ उपचार पाउनु पर्‍यो ।’

याे पनि...

कोभिड–१९ युनिफाइड अस्पतालको प्रमुखमा डा. गौतम नियुक्त

स्वास्थ्य मन्त्रालयमा जागेश्वरका ११ महिना १५ दिन : प्रशंसा पनि पाए, ट्रोल पनि बने

स्वास्थ्य राज्यमन्त्री उमेश श्रेष्ठले अधिकार नै नभएको विषयमा निर्णय गरेपछि...

वीर अस्पतालबाट बिदा भए डा. जागेश्वर, काम कम विवाद ज्यादा

वीरको प्रमुख प्रशासकीय अधिकृतमा डा. भूपेन्द्र बस्नेत

कोभिडविरुद्ध लड्नुपर्ने ‘युनिफाइड केन्द्रीय अस्पताल वीर’ आफैँ नेतृत्वका लागि लड्दै

प्रकाशित मिति: बुधबार, असोज १३, २०७८ १६:३२