पोखरामा भीआईपीको हाइकिङः हिँडेर थाके, तर प्रकृतिमा रमाए

A+ A A-

पोखराबाट सोमबार बिहानै माछापुच्छ्रे र अन्नपूर्ण हिमश्रृंखला देख्दा नेपालका लागि बंगलादेशी राजदूत शलाहुद्दिन नोमन चौधरी प्रफूल्लित बने । बंगलादेशमा अग्ला पहाड छैनन् । पोखरा पुगेको मौकामा उनले सोमबार दुई घन्टा हाइकिङ गरे ।

उनी ४२ औँ विश्व पर्यटन दिवस मनाउन पोखरा पुगेका हुन् ।

प्रकृतिसँगको साक्षात्करले दंग परेका उनी बादलले छेकिएको हिमालको तस्वीर खिच्न घरिघरी आफ्नो मोबाइल उनले तेर्स्याइरहे । उनले कास्कीको नौडाँडादेखि कास्कीकोटसम्म हाइकिङ गरेका हुन् । फिनल्यान्ड, श्रीलंका, जर्मनी, बंगलादेशका राजदूत, विभिन्न अन्तर्राष्ट्रिय कुटनीतिक नियोगका प्रतिनिधि पनि उनीसँगै थिए ।

गण्डकी प्रदेश सरकारको पहलमा पर्यटन दिवसका अवसरमा पोखरा आएका राजदूत, नियोग प्रतिनिधि एकाधबाहेक धेरैका लागि पोखरा र हाइकिङ पहिलो अनुभव थियो ।

‘मेरा लागि यो पहिलो अनुभव थियो तर हिँड्दा गाह्रो लागेन । मैले भरपुर मज्जा लिएँ । यहाँको प्रकृति सुन्दरता, वनजंगल, वनस्पति भविष्यका लागि जोगाउनुपर्छ,’ बंगलादेशी राजदूत नोमनले नेपाल सरकारलाई सुझाव दिँदै भने ।

नेपालमा बंगलादेशका पर्यटकको पनि राम्रै आकर्षण छ । तर, कोभिडले अनिश्चितताको चौघेरोमा फसिरहँदा विदेशी पर्यटकको चाप दुई वर्षअघिजस्तो हुने तत्काल सम्भावना देखिँदैन । राजदूत नोमन दुई हप्तापछि नेपाल–बंगलादेश उडान खुल्ने र त्यसले नेपालमा बंगलादेशी पर्यटकको आगमन बढाउने बताउँछन् ।

यस्तैगरी हाइकिङमा रमाएका नेपालका लागि कतारका राजदूत यूसेफ मोहम्मद पनि तीन किलोमिटर हिँडे । कास्कीकोट दरबार जाने उकालो चढ्न कस्सिएका उनी बीचबाटै फर्किए । उनीसँगै अन्य दुई जना पनि फर्किएका थिए । नेपालका लागि श्रीलंकाकी राजदूत हिमाली सुवासिनी अरुणाटिलका भने गन्तव्यसम्म पुगिन् ।

हाइकिङको मजा लिएका भीआईपीको अनुभव रोचक छ ।

हिमाली सुवासिनी अरुणाटिलका, श्रीलंका

एकपटक त लागेको थियो मैले हिँडाइ पूरा गर्न सक्दिनँ । टान र अरू संस्थाका प्रतिनिधिले थोरै हिँड्नुस् भन्दाभन्दै मैले सकेँ । गज्जब अनुभव भयो । मैले रूट पुरा गरेँ, आफैँलाई गर्व लागेको छ ।

म पोखरा पहिलोपटक आएँ । यसरी अग्लो पहाडमा चढेको पनि पहिलोपटक हो । समथर भागमा हिँड्थेँ, तर यसरी पहाड चढेकी थिइनँ ।

नेपालमा राजदूत भएर आएको ठ्याक्कै दुई वर्ष भयो । म बुद्ध धर्मावलम्बी हुँ । लुम्बिनी तीनपटक गएँ, चितवन र काठमाडौँको नगरकोट, धुलिखेल गएँ । कोरोना महामारीले गर्दा धेरै ठाउँ घुम्ने अवस्था पनि भएन ।

माइकल, यूनेस्कोका नेपाल प्रतिनिधि

नेपालीको मुस्कान र यहाँको आतिथ्यताले म प्रभावित छु । यहाँको हिमाल देख्नु मेरो लागि नौलो अनुभव थियो । त्यो त आकाशमा पेन्टिङ गरेजस्तै देखियो ।

लकडाउनमा व्यायाम गर्नै छोडेको थिएँ । नेपालको केही ऐतिहासिक कुरा बुझ्न पाउँदा दिन एकदम उपलब्धिमुलक रह्यो । मेरो बच्चा र श्रीमती काठमाडौँमा छन् । उनीहरूसँग फेरि आउँछु ।

काठमाडौँको अफिसमा सोमबार बिताउनुभन्दा यहाँ बिताएको सोमबार मज्जाको रह्यो ।

जर्मनका प्रतिनिधि

म नेपाल आएको एक महिना पनि भएको छैन । अरू देशका हामीसँगै आउनुभएका साथीले हिमाल देख्नुभएको थिएन । हिमाल देख्दा रमाइलो लाग्यो ।

म विश्व शान्ति स्तूप गएको थिएँ । त्यहाँबाट अन्नपूर्ण साउथ देखिएको फोटो खिचेर फेसबुकमा राखेको थिएँ । मेरा केही साथीले आउने इच्छा देखाएका छन् ।

नेपालको पर्यटन अवश्य उठ्ने छ । नेपालका प्राकृतिक दृश्य अद्भूत छ, जुन अन्त भेटिँदैन । अहिले धेरै घुमिसकेको छैन । तर, यहाँको सँस्कृति, अतिथिलाई स्वागत गर्ने तरिका मन पर्‍यो । नेपालले भएको सम्पदालाई जोगाउन ध्यान दिनुपर्छ भविष्यका लागि ।

शलाहुद्दिन नोमन चौधरी, बंगलादेशी राजदूत

नेपाल र बंगलादेशबीच हुने हवाइ उडानको पर्खाइमा छौँ । दुई हप्तापछि उडान खुल्ने कुरा छ । त्यसपछि नेपालमा बंगलादेशी पर्यटकको चाप बढ्ने छ ।

मेरा लागि यो पहिलो अनुभव थियो, तर हिँड्दा गाह्रो लागेन । मैले भरपुर मज्जा लिएँ । यहाँको प्रकृति सुन्दरता, वनजंगल, वनस्पति भविष्यका लागि जोगाउनुपर्छ ।

बंगलादेशमा ठूला हिमाल छैनन् । त्यसैले नेपालको हिमालले हामीलाई तान्छ । अझै पर्यटक ल्याउन हिमाललाई जोगाउनुपर्छ ।

फिनल्यान्डका प्रतिनिधि

म आएको तीन वर्ष भइसक्यो । अहिले चौथो वर्ष चलिरहेको छ । म कोभिडभन्दा अगाडि पनि पोखरा आएको थिएँ । कोभिडले नेपालको पर्यटनमा असर पारेको कुरा मैले बुझेको छु । अब पहिलाकै अवस्थामा फर्कने बेला भएको छ । यो वर्ष पर्यटक केही आए पनि अर्को वर्षदेखि पक्कै बढ्छन् ।

नेपालको सुन्दरता र यहाँको आतिथ्यताले जो कोहीलाई तान्छ । मैले यो कुरा बोल्नलाई मात्रै भनेको होइन । साँच्चै नेपालीको हाँसोले पर्यटकलाई सुखकर बनाउँछ ।

फोहोर व्यवस्थापनमा ध्यान दिनुपर्छ । सडक बनाइँदा नेपालका गोरेटा बाटोहरू मासिएका छन् । यहाँ पर्यटक पुरानै बाटोमा हिँड्न रूचाउँछन् । त्यसैले बाटो बनाउँदा ध्यान दिन मेरो सुझाव छ ।

काठमाडौँ नेपाल होइन । त्यो त सानो हिस्सा हो । नेपाल त काठमाडौँ बाहिर छ । हामी सामान्य अवस्थामा छैन । कोभिडका सबै सुरक्षा विधि अपनाउनु पर्छ ।

प्रकाशित मिति: सोमबार, असोज ११, २०७८ २२:२९