२ हजार भत्ताका लागि हाजिरी दुरुपयोग गर्छन् सांसद

A+ A A-

संसद सचिवालयले सांसदका लागि बैठक सुरु हुनुभन्दा १ घण्टा अघि र सकिएको आधा घण्टापछिसम्म हाजिरी पुस्तिका खुला गर्छ । तर, सांसदहरू बैठकमा सहभागी नभएरै हाजिर गरेकाे दृश्य सोमबारको संसद् बैठकमा देखिएको छ ।

२ बजेका लागि निर्धारित साेमबारकाे संसद बैठक करिब १५ मिनेटपछि सुरू भई ६ मिनेटमै स्थगित भयाे । बैठक सकिएको आधा घण्टासम्म हाजिर खुल्ला हुने भए पनि सांसदहरू भने त्यो अवधिभन्दा ढिला पुगेर हाजिर लगाए । ढिलो पुगेर हाजिर लगाउने सांसदहरूमा नारायण मरासिनी, मीना पाण्डे, नवीना लामा, तेजुलाल चौधरी, चित्रलेखा यादव, अमेरशकुमार सिंह, मोतीलाल दुगडसहित दर्जन बढी सांसद छन् ।

एमाले सांसद नवीना लामाले जडीबुटीको जाममा फसेका कारण संसद बैठकमा आउन ढिला भएको बताइन् ।

संसद भवनभित्र ढिला प्रवेश गरे पनि हाजिर भने गरेको उनले बताइन् । 'सनसिटीबाट निस्किँदा जडीबुटीको जाममा फसेँ । बैठकमा आउन ढिला भयो । अरु सांसदहरूले पनि हाजिर गरिरहनुभएको थियो । मैल पनि हाजिर गरेँ,' लामाले भनिन् ।

एमाले सांसद नारायण मरासिनीले कलंकीबाट आउँदा जाममा फसेका कारण ढिला भएको बताए । संसद भवनमा सञ्चारकर्मीले उनलाई संसद सकिएपछि पनि आउनुपर्ने कारण हुन्छ र भन्ने प्रश्न गरेका थिए ।

त्यसको जवाफमा मरासिनीले भने, 'यस्तो कुरा नगरौँ साथी हो । यो (जाम) हाम्रो देशको समस्या हो भन्ने कुरा साथीहरूले बुझ्नुभएको छ । कहिलेकाहीँ ढिलो हुने कुरा सामान्य हो,' उनले भने ।

संसद भवनमा ढिलो पुगेर हाजिर गरेकोबारे कांग्रेस सांसद चित्रलेखा यादवलाई सोध्दा उनले जवाफ दिन मानिनन् । बैठक सकिएपछि तोकिएको अवधिभन्दा ढिला पुगेर हाजिर गर्न मिल्छ भन्ने प्रश्न गर्दा उनले ढिलो भएको स्वीकार गर्दै फोन काटिदिइन् । त्यसपछि सम्पर्क गर्दा फोन उठाइनन् ।

संघीय संसदको पदाधिकारीको सुविधासम्बन्धी ऐन २०७३ मा व्यवस्था भएअनुसार संसद बैठकमा उपस्थिति जनाएपछि सांसदहरूले बैठक भत्ता बापत १ हजार रुपैयाँ र यातायात सुविधा बापत १ हजार रुपैयाँ प्राप्त गर्छन् । बैठक सकिएपछि संसद आए पनि सांसदहरूले यही सुविधा प्राप्तिका लागि हाजिर गर्दछन् । सोमबारको बैठकमा ढिला पुगेर हाजिर गरेका सांसद अमेरशकुमार सिंहले यसमा सांसदहरूको दोष नरहेको बताए ।

सदनको बैठक कहिले घण्टौँसम्म चल्ने कहिले केही मिनेटमै स्थगित हुनुमा आफूहरूको कुनै दोष नरहने भन्दै उनले भने, 'संसद बैठक कहिले घण्टौँसम्म चल्छ, कहिले केही मिनेटमै स्थगित हुन्छ । आज ढिला पुग्दा बैठक स्थगित भैसकेको रहेछ । अब ढिला पुगेर हाजिर गर्ने काम नैतिक कि अनैतिक भन्ने प्रश्न संसद सचिवालयमा सोध्नुस् । हामीले त सचिवालयले दिएको सुविधाको प्रयोग गरेको हो ।'

यता संसद सचिवालयका प्रवक्ता रोजनाथ पाण्डेले बैठकपछिको आधा घण्टाको समय बैठकमा सहभागी भएका सांसदहरूका लागि दिइएको सुविधा रहेको बताए । सदनमा महत्त्वपूर्ण छलफलको समयमा केही ढिला हुँदा विषय छोडेर हाजिरीमा अलमल नहोस् भन्ने उद्देश्यले बैठकपछि आधा घण्टा हाजिर खुला गरिएको उनले बताए । 'यो आधा घण्टाको सुविधा भनेको संसद बैठक कक्षमा प्रवेश गरिसकेका माननीयहरूका लागि हो । बैठक सकिएपछि आउने माननीयहरूका लागि होइन,' उनले भने ।

पहिले बैठक भएको दिनभरसम्म पनि हाजिर खुला राख्ने प्रचलन भए पनि सचिवालयले त्यसमा सुधार गर्दै बैठक सुरु हुनुभन्दा १ घण्टाअघि र सकिएपछिको आधा घण्टासम्मका लागि हाजिर खुला राखेको उनले बताए । 'दुरुपयोग बढेपछि हामीले सुधार गर्दै बैठक सकिएको आधा घण्टापछिसम्म हाजिर खुला राख्यौँ । आवश्यक परेमा त्यसलाई पनि सुधार्न सकिन्छ', पाण्डेले भने ।

यता राष्ट्रियसभामा भने बैठक सुरु भएपछि हाजिरी पुस्तिका सार्वजनिक गर्ने प्रचलन छ । यसका कारण हाजिरको दुरुपयोगको समस्या राष्ट्रियसभामा नरहेको संघीय संसदका सहायक प्रवक्ता दशरथ धमलाले बताए ।

प्रकाशित मिति: सोमबार, असोज ११, २०७८ १७:२५