कर्मचारीमाथि कति लगानी गर्दै छ सरकार ?

A+ A A-

सरकारले आगामी आर्थिक वर्षको कर्मचारीको लागि मात्रै करिब २ खर्ब रुपैयाँ लगानी गर्ने भएको छ । यस्तो रकम कर्मचारीको तलव, भत्ता, इन्धन, पेन्सन, सामाजिक सुरक्षा, गाडी मर्मत, तालिम सीप विकास, कार्यक्रम लगायतका शिर्षकमा खर्च हुनेछ ।

अर्थमन्त्रालयले आगामी आर्थिक वर्षको लागि ल्याएको बजेटमा १ खर्ब ८१ अर्ब ३१ करोड ९७ लाख रुपैयाँ कर्मचारीको लागि खर्च गर्ने उल्लेख छ । यस्तो रकममध्ये कर्मचारीको पारिश्रमिक÷सुविधामा १ खर्ब ४३ अर्ब १६ करोड १४ लाख रुपैयाँ खर्च हुनेछ ।

कर्मचारीको पारिश्रमिक/सुविधा शिर्षकभित्र कर्मचारीको पारिश्रमिक, नेपाल सरकारले नियुक्त गर्ने पदाधिकारीको पारिश्रमिक, पोशाक, खाद्यान्न, औषधी उपचार खर्च समावेश छ । यस्तै स्थानीय, महंगी, फिल्ड, कर्मचारी वैठक, बैदेशिक, अन्य, पदाधिकारीको बैठक र पदाधिकारीको अन्य भत्ता समावेश हुन्छ । कर्मचारी प्रोत्साहन तथा पुरस्कार खर्च पनि यही शिर्षकमा राखिएको छ ।

अर्थमन्त्रालयका अनुसार कर्मचारीको समाजिक सुरक्षा खर्चमा १ अर्ब ७४ करोड ४ लाख रुपैयाँ खर्च हुनेछ । यस्तो रकमबाट कर्मचारीको सामाजिक सुरक्षा कोष, योगदानमा आधारित निवृत्तिभरण तथा उपदान कोष, योगदानमा आधारित बीमा कोष, कर्मचारी कल्याणकारी कोष, अन्य सामाजिक सुरक्षा कोष, पदाधिकारीको योगदानमा आधारित बीमा कोष र पदाधिकारीको अनय सामाजिक सुरक्षा खर्च समावेश छ ।

सरकारले कर्मचारी तथा पदाधिकारीलाई दिएको सवारी साधनको इन्धन र मर्मत सम्भारमा पनि बार्षिक मोटो रकम नै खर्च हुने गरेको छ । सरकारले आगामी आर्थिक वर्ष पदाधिकारीको गाडीमा इन्धनको लागि १० करोड ७८ लाख र कर्मचारीका गाडीको इन्धनका लागि ४ अर्ब २७ करोड १३ लाख रुपैयाँ बजेट छुट्टयाएको छ । यस्तै सवारी साधनको मर्मत खर्चका लागि १ अर्ब ४४ करोड ८७ लाख रुपैयाँ र बीमा तथा नविकरणको लागि ५४ करोड २४ लाख रुपैयाँ बजेट खर्च हुने अनुमान गरेको छ ।

सरकारले कार्यक्रमको नामा पनि वार्षिक मोटो रकम खर्चने गरेको पाइएको छ । अर्थमन्त्रालय आगामी आर्थिक वर्ष कार्यक्रममा नै २२ अर्ब ४५ करोड रुपैयाँ खर्च हुने अनुमान गरेर बजेट छुट्टयाएको छ ।

कार्यक्रम सम्बन्धी खर्चमा कर्मचारी तालिम, सीप विकास तथा जनचेनता तालिम तथा गोष्ठी, उत्पादन सामाग्री/सेवा, कार्यक्रम, विविध कार्यक्रम खर्च समावेश छ । विकास आयोजनाहरुको अनुगमन, मूल्यांकन र भ्रमणमा आगामी बर्ष २ अर्ब ९८ करोड ९६ लाख रुपैयाँ बजेट खर्च हुनेछ । यस्तो रकमबाट अनुगमन तथा मूल्यांकन, भ्रमण, विशिष्ट व्यक्ति तथा प्रतिनिधि मण्डलको भ्रमण र अन्य भ्रमण खर्च समावेश छ ।

प्रकाशित मिति: सोमबार, जेठ २७, २०७६ ०२:२१