नेपाली टोलीलाई क्रिकेट खेल्न पाकिस्तान बोलाउँछु - शाहिद अफ्रिदी (अन्तर्वार्ता)

A+ A A-

पाकिस्तानका लेजेन्ड क्रिकेटर शाहिद अफ्रिदीले नेपाल र पाकिस्तानबीच क्रिकेट कुटनीतिलाई स्थापित गर्नुपर्ने बताएका छन् । अफ्रिदीले नेपाल र पाकिस्तानका जनतालाई जोड्न क्रिकेट कुटनीति आवश्यक रहेको बताएका हुन् । कुराकानीका क्रममा उनले नेपालमा क्रिकेटको भविष्य निकै राम्रो रहेको र सरकारले यसमा ध्यान दिन आवश्यक रहेको बताए ।

कुनै समय पाकिस्तानको १९ वर्ष मुनिको टोलीलाई नेपाली टोलीले हराएको प्रसंग उल्लेख गर्दै अफ्रिदीले नेपाली क्रिकेट टोलीलाई आफूले सक्दो सहयोग गर्ने प्रतिबद्धता व्यक्त गरे । आफूले नेपाली क्रिकेट टोलीलाई पाकिस्तान लगेर क्रिकेट खेलाउने उनको भनाइ छ । यस्तो छ अफ्रिदीसँग गरिएको कुराकानीको सम्पादित अंश:-

नेपाल छोटो बसाई कस्तो भैरहेको छ? अनुभव कस्तो छ ?

म एकदमै खुसी छु । क्रिकेटको कारण अहिले म नेपालमा छु । योसँगै अर्को महत्वपूर्ण कुरा नेपाल र पाकिस्तानबीच क्रिकेटको माध्ययमबाट सम्बन्ध जोडिएको छ । तीन दिनको बसाईमा मैले नेपालीहरूमा क्रिकेट प्रतिको लगाव रहेो पाएको छु । क्रिकेटसँगको लगावका साथै पाकिस्तानी क्रिकेटलाई माया गर्ने नेपालीहरू रहेको समेत मैले अनुभव गरें । मैले केही नेपाली खेल अधिकारीहरूलाई पाकिस्तान भ्रमणको निम्तो दिएको छु । म पाकिस्तान पुगेर उहाँहरूलाई स्वागत गर्नेछु । जुनसुकै विषय होस, नेपाल र पाकिस्तानको सम्बन्ध जोडिनु आफैंमा महत्वपूर्ण छ । यो प्रगाढ हुँदै जाओस् ।

तपाईं त क्रिकेटर, नेपाली क्रिकेटलाई कसरी विश्लेषण गर्नुहुन्छ ?

नेपाली यू–१९ क्रिकेट टोलीले पाकिस्तानी टोलीलाई हराएको सम्झिन्छु । नेपाली खेलाडीमा प्रतिभा र क्षमता प्रशस्तै छ । एभरेस्ट प्रिमियर लिग (ईपीएल) मा मैले खेलें र त्यहाँ मैले क्षमतावान नेपाली खेलाडीहरू देखेँ ।

सन्दिप लामिछाने लगायतको खेलाडीहरूले नेपाललाई विश्वमा चिनाउन सक्छन् । नेपाली क्रिकेट विकास गर्नका लागि तल्लो तह ग्रासरुट देखि नै ध्यान दिनुपर्छ । यसमा सरकारको संलग्नता निकै महत्वपूर्ण हुन्छ । सरकारले सहयोगले क्रिकेटलाई धेरै राहत हुन्छ । सबै भन्दा राम्रो पक्ष भनेको नेपाल सरकार क्रिकेट प्रति सकारात्मक छ ।

नेपालको फ्रेन्चाइज लिगसँग जोडिनु भयो, तपाईंलाई कुन विषयले जोडिन प्रेरित गर्‍यो ?

म एक व्यावसायिक खेलाडी भएको नाताले मैले क्रिकेटको बारेमा कुरा गर्छु । कोही खेलाडी शान्ति, प्रेम र सद्भावको खोजीमा हुन्छ र खेल पनि त्यस्तै अवस्थामा होस् भन्ने अपेक्षा राख्छ । क्रिकेट नै एउटा त्यस्तो खेल हो, जसले सम्बन्ध खराब हुँदा पनि पाकिस्तानले भारत भ्रमण गरेर आफ्नो खेल र शान्तिको सन्देश दिएको थियो ।

पाकिस्तान आफ्ना मित्र राष्ट्र र छिमेकीहरूसँग सुमधुर सम्बन्ध राख्न चाहन्छ । हाम्रो क्षेत्र (दक्षिण एसिया) मा क्रिकेटलाई अलग्गै दृष्टिले हेरिन्छ । भारतमा त क्रिकेट धर्म जस्तै भैसकेको छ ।

मलाई लाग्छ, क्रिकेटको माध्ययमबाट सम्बन्धहरूलाई प्रगाढ र घनिभूत बनाउन सकिन्छ । क्रिकेटकै माध्यमबाट नेपाल र पाकिस्तानको सम्बन्धलाई पनि थप बलियो बनाउन सकिन्छ । यसभन्दा अघि म नेपाल आएको थिइन, नेपाल देखेको पनि थिइन । मेरो खुट्टामा समस्या हुँदाहुँदै पनि मैले नेपाल भ्रमण गरेको छु । क्रिकेटको माध्ययमबाट नेपालमा रहेका क्रिकेट प्रेमीहरूसँग प्रेम र सद्भावको सन्देश पनि लिएर आएको हुँ ।

पाकिस्तान र नेपाल क्रिकेटसँग जोडिन सक्ने विषयहरू के के छन्?

दुई देशको राजनीति आफ्नो स्थानमा छ । क्रिकेटसँग क्रिकेट र क्रिकेट कुटनीति फरक छ । यो पनि एक प्रकारको राजनीति हो । यसबारेमा मेरो बुझाइ अलि फरक छ ।

क्रिकेटबाट जोडिन म नेपाल आएको हुँ । म यहाँ रहँदा जति पनि मानिसहरूसँग भेट भयो, मेरा लागि यी भेट अविस्मरणीय रह्यो । नेपाल र पाकिस्तानलाई क्रिकेट कुटनीतिले जोड्न चाहन्छु । पाकिस्तान पुगेर मैले नेपाली टोलीलाई खेल्न आमन्त्रण गर्छु । यसलाई नेपालस्थित पाकिस्तान दूतावास र नेपाल सरकारले सहजीकरण गर्नेछन् ।

तपाईंले परिवारसहित फेरि नेपाल भ्रमण गर्ने भन्नु भएको छ, नेपालको कुन कुराले तपाईंलाई मोहित बनायो ?

यो भ्रमणमा मैले पुरै नेपाल राम्रोसँग घुम्न पाइन । छोटो भ्रमण छ । आज माउन्टेन फ्लाइट गएँ । सगरमाथा देखेँ । सँगै अन्य हिमालहरू हेरेँ । मेरो अनुभव रोमाञ्चक रह्यो । त्यसैले म परिवारलाई साथै लिएर आउन चाहन्छु । परिवार साथै हुँदा फर्किने हतारो हुँदैन । शहरभन्दा बाहिर गएर नेपाल हेर्न चाहन्छु ।