साना बजारमा दसैँको रौनक, ब्राण्डेड पसल र सपिङ मल अझै सुनसान

A+ A A-

नेपालीका दुई ठूला पर्व दसैँ र तिहार नजिकिँदैछन् । अन्य बेलामा यो समयमा बजारमा खुट्टा टेक्ने ठाउँ हुँदैनथ्यो । स्थानीय बजारदेखि महँगा सपिङ सेन्टर र बुटिकहरूमा ग्राहकको ठूलो भिड लाग्थ्यो । तर, पछिल्लो दुई वर्ष भने यो अवस्था फेरिएको छ । कोरोना महामारीका कारण बजारमा उपस्थित हुने ग्राहकको संख्या घटिरहेको छ ।

दसैँको एक महिनाअगाडिदेखि नै किनमेलका लागि सुपरमार्केटदेखि फुटपाथमा घुइँचो लाग्ने प्रवृत्ति फेरिएको देखिन्छ । अघिल्लो वर्ष कोरोना महामारीको प्रकोपका कारण बजारमा ग्राहक कम हुनु स्वाभाविक थियो । तर, यो वर्ष महामारी नियन्त्रणको दिशामा रहेकाले व्यापारीहरू पसलमा राम्रै भिड लाग्नेमा आशावादी थिए ।

तर, अहिलेसम्मको अवस्थाले व्यापारमा केही सुधार देखिए पनि ग्राहक बजारमा नै आउने अवस्था फेरिने देखिन्छ ।

स्थानीय र साना बजारमा ग्राहकको संख्या तुलनात्मक रूपमा बढे पनि ठूला सपिङ मल र दरबारमार्गतिर भेटिने ब्राण्डेड पसलहरूमा दसैँ आएको छनक भेटिँदैन ।

दरबारमार्गमा भिगो आउटलेट सञ्चालन गर्दै आएका रमेश रुपाखेती पसलमा आएर किनमेल गर्ने ग्राहकको संख्या न्यून रहेको बताउँछन् । उनी भन्छन्, ‘अहिले भौतिक रूपमा किनमेल गर्ने ग्राहकहरू अनलाइन डेलिभरीका लागि आग्रह गर्छन् । यो वर्ष ९० प्रतिशत व्यवसाय त अनलाइनबाटै भइरहेको छ ।’

रुपाखेती आफूले गर्ने व्यवसायको ९० प्रतिशत बिक्री अनलाइनमार्फत भए पनि अन्य वर्षको तुलनामा यो वर्ष १० प्रतिशत मात्रै व्यापार भएको बताउँछन् । त्यसो त उपत्यकामा रहेका ठूला सपिङ मलहरूमा पनि खासै भिड देखिँदैन । कोरोना संक्रमणका कारण ती क्षेत्रमा ग्राहक आउन डराएको देखिन्छ ।

तर, न्यून मध्यम वर्गलाई लक्षित बजारमा भने फरक दृश्य देखिन्छ । काठमाडौँका असन चोकदेखि भृकुटीमण्डप तथा कोटेश्वर, बालाजु, गोंगबु क्षेत्रमा दसैँका लागि किनमेल गर्नेको भिड अत्यधिक बढ्न थालेको छ ।

यी क्षेत्रमा किनमेलका लागि आउनेको संख्या बढिरहेको छ । भृकटीमण्डपमा ३३ नम्बर पसल सञ्चालन गर्दै आएका विपिन श्रेष्ठ उपत्यकामा निषेधाज्ञा खुलेसँगै ग्राहकको चहलपहल बढेको बताउँछन् । उनी भन्छन्, ‘अहिले ग्राहक बढेका छन् । पोहोरको दसैँँमा व्यापार नभएर गाह्रो भएको थियो । अहिले भने असोज लागेसँगै ग्राहक पनि बढेका छन् । व्यापार पनि भइरहेको छ ।’

श्रेष्ठ अहिले आफूले दैनिक २५ हजार रुपैयाँसम्मको कारोबार गरिरहेको बताउँछन् । तर, कुपण्डोलमा रहेको लुइस बुटिक स्टोरका सञ्चालक हिरेन्द्र शाक्य भने व्यापार नहुँदा तनाव बढेको बताउँछन् । दैनिक १० हजारको पनि व्यापार नहुँदा खर्च कसरी धान्ने भन्ने समस्या बढेको उनको गुनासो छ । उनी भन्छन्, ‘हाम्रो बुटिकमा राम्रो परिमाणमा व्यापार हुन्थ्यो, तर अहिले बजार खस्किएको छ । दसैँतिहारबाट वर्षभरिको कमाइ निकालिन्थ्यो । यस वर्ष खासै व्यापार होलाजस्तो छैन । कहिलेकाहीँ त एउटा कपडा पनि बिक्री गर्न सकिँदैन ।’

कोरोना संक्रमण सुरु भएसँगै नेपालमा आक्रामक रूपमा उत्रिएका ई-कमर्स व्यवसायका कारण पनि यस्ता बुटिक र सपिङ सेन्टरको व्यापार घटेको देखिन्छ । सामान किन्न कोरोनाको जोखिम मोलेर बजार नै धाउनुभन्दा वेबसाइटमा खोजी गर्न सहज हुने भएकाले पनि उनीहरू भौतिक रूपमा सपिङ गर्न बाहिरिएका छैनन् ।

ई-कमर्स एसोसिएसन अफ नेपालको आँकडाअनुसार अनलाइन सामान खरिद गर्नेको संख्या गत वर्षको तुलनामा यो वर्ष ४५ प्रतिशतले बढेको छ । घरमा नै डेलिभरी हुने र बाहिर निस्कनु नपर्ने भएकाले पनि पछिल्लो समय बजारमा जाने ग्राहक घट्न थालेका हुन् । जसको असर सजावटमा महँगो खर्च गरेर सञ्चालन भएका सपिङ सेन्टर र सपिङ मलमा परिरहेको देखिन्छ ।

प्रकाशित मिति: आइतबार, असोज १०, २०७८ १६:४९