सुत्केरीको मृत्यु भएपछि धनगढीको नवजीवन अस्पताल तनावग्रस्त, छानबिन गर्न आफन्तको माग

सुत्केरीको मृत्यु भएपछि धनगढीको नवजीवन अस्पताल तनावग्रस्त, छानबिन गर्न आफन्तको माग

A+ A A-

उपचारका क्रममा सुत्केरीको मृत्यु भएपछि धनगढीको नवजीवन अस्पताल तनावग्रस्त बनेको छ । सुत्केरीको मृत्यु भएपछि आइतबार बिहानैदेखि अस्पतालमा तनाव सिर्जना भएको हो ।

डोटीको शिखर नगरपालिका- ६ की २६ वर्षीया कल्पना सिंह मल्लको उपचारका क्रममा अस्पतालमा मृत्यु भएको हो । चिकित्सकको लापरबाहीका कारण कल्पनाको मृत्यु भएको आफन्तले आरोप लगाएका छन् । अस्पतालको लापरबाहीका कारण कल्पनाको मृत्यु भएकाले छानबिन हुनुपर्ने आफन्तको माग छ ।

अस्पतालका विशेषज्ञ डा. जयराम केसीको लापरबाहीका कारण सुत्केरीको मृत्यु भएको आफन्तको आरोप छ । गर्भवती भएदेखि नै डा. केसीको परामर्शमा रहँदै आएकी कल्पनाको अन्तिम समयमा आएर उपचारमा लापरबाहीका कारण मृत्यु भएको मृतकका काका तेज बहादुर सिंहले बताए ।

मृतकका आफन्तले निकालेको विज्ञप्ति

मृतकका आफन्तले विज्ञसहितको टोलीले छानबिन गर्नुपर्ने माग पनि राखेका छन् । आइतबार एक विज्ञप्ति जारी गर्दै मृतकका आफन्तले छानबिन र दोषिलाई कारबाही नभएसम्म शव नउठाउने अडान लिएका छन् ।

शनिबार बिहान १० बजे सुत्केरी व्यथा लागेर कल्पनालाई अस्पताल भर्ना गरिएको थियो । भ्याकुम प्रयोग गरी उनको डेलिभरी गराइएको अस्पतालले जनाएको छ । अत्याधिक रक्तश्राव भएपछि उनको मृत्यु भएको अस्पतालको भनाइ छ ।

के भन्छ अस्पताल ?

धनगढीको नवजीवन अस्पतालले भने हरसम्भव प्रयास गर्दागर्दै कल्पनालाई बचाउन नसकिएको जनाएको छ । कल्पनाको मृत्युपछि एक विज्ञप्ति जारी गर्दै अस्पतालले कल्पनाको उपचारमा अन्य अस्पतालका महिला रोग विशेषज्ञको पनि सहयोग लिइएको जनाएको छ ।

'आमाको बच्चा जन्माउने बल नपुगेको र बच्चाको धड्कन कम हुँदै गएकोले भ्याक्युम प्रयोग गरी डेलिभरी गराएको' अस्पतालले जनाएको छ । बिरामीलाई चाहिने रगतको व्यवस्थापन गरेर तत्कालै रगत चढाएर थप उपचारका लागि तत्काले आईसीयूमा सिफ्ट गरिएको अस्पतालले जनाएको छ ।