तीन लाखमा व्यवसाय सुरु गरेका ध्रुव यसरी बने ४ सय करोडका मालिक

A+ A A-

‘बुबा मलाई सेकेन्ड ह्यान्ड मोटरसाइकलको व्यापार गर्न पैसा चाहियो,’ १७ वर्षे ध्रुव थापाले आफ्नो बुबालाई भने ।

बुबाले मानेनन् । कान्छो छोरो, त्यहीमाथि उमेर पनि कच्चा छ, पैसा कसरी दिइहाल्नु ? तर दाजुको साथ उनले पाए । दाजुले नै बुबालाई सम्झाएपछि उनले ३ लाख लगानी पूँजी पाए । त्यसपछि सुरु भयो 'गण्डकी रिकन्डिसन हाउस' ।

‘त्यो ३ लाखमा मैले शोरुम बनाए र सेकेन्ड ह्यान्ड दुईओटा मोटरसाइकल किने,’ व्यवसायको पहिलो कदमको स्मरणमा उत्साहित बनेका ध्रुवले भने ।

त्यो दुईओटै मोटरसाइकल बेच्न उनलाई समय लागेन । नाफा पनि प्रशस्तै भयो, एउटामा १२ हजार अर्कोमा १५ हजार । सुरुआती सफलताले हौसिएका उनले त्यसपछि व्यापार बढाउँदै लगे ।

१७ वर्षको उमेरमा ३ लाखको लगानीमा सुरु गरेको व्यवसाय अहिले ४ सय करोडको पुगिसक्यो । अहिले ५१ वर्षका भए उनी । ३४ वर्षमा उनले आफ्नो व्यवसायको कालापलट नै गरे ।

उनले अटोमोबाइल, रियल स्टेट, हस्पिटालिटी, बैंकिङ, इन्जिनियरिङलगायत क्षेत्रमा लगानी गरेका छन् । यो बाहेक उनले गैरनाफामुलक क्षेत्रमा समेत काम गरेका छन् । उनले लायन्स क्लबमा डिस्ट्रिक्ट गभर्नरको रुपमा समेत काम गरिसके ।

अहिलेको समयमा ध्रुव मुलत: अटोमोबाइल व्यवसायीको रुपमा परिचित छन् । उनी पश्चिमाञ्चल अटोमोबाइल्स डिलर्स एसोसिएसनका पूर्व अध्यक्ष हुन् भने नाडा अटोमोबाइल्स एसोसिएसन अफ नेपालमा दुईपटक उपाध्यक्ष भैसके ।

३ लाखको रिकन्डिसनदेखि ४ सय करोडको व्यवसायसम्मको ध्रुुवको यात्रा रोचक छ ।

२०२७ सालमा पोखराको मध्यम वर्गीय परिवारमा जन्मिएका ध्रुुवका बुबा भारतको ब्रिटानिया कम्पनीमा काम गर्थे । अवकासपछि पोखरा फर्किएर उनले घरमै सानोतिनो किराना पसल खोले ।

ध्रुवकाे दाइ नेपाल राष्ट्र बैंकमा जागिरे, दिदी विवाह भैसकेको र बहिनी सानै भएकाले ध्रुवले स्कुल पढ्दादेखि नै पसलमा बुुबालाई सघाउँथे । ‘सानैदेखि पसलमा काम गरेको भएर होला, बिस्तारै मेरो झुकाव व्यापारमा गयो । बुुबाले पनि नोकरी होइन व्यापार गर्नुपर्छ भन्नुहुन्थ्यो,’ व्यापारमा आकर्षित हुनुको भित्री पाटो खोतल्दै उनले भने ।

बुबाले सम्झाए पनि एकपटक त उनी झण्डै जागिरे भैसकेका थिए । २०५२ सालतिर नेपाल प्रहरीले इन्स्पेक्टरको लागि आवेदन मागेको रहेछ । इन्स्पेक्टरमा भैहाल्यो भने रिकन्डिसन किन चलाइरहने र भनेर दाजुले आवेदन दिन लगाए ।

काठमाडौं आएर इन्स्पेक्टरमा भिडे । लिखितमा त पास भए, तर फिजिकलमा भने असफल भए ।

'शारीरिक दु:ख नगरेको मान्छे भएर होला, डोरीमा झुन्डिने र जमिनमा घिस्रिने परीक्षामा गाह्रो भयो, असफल भएँ,’ उनले असफलताको पाटो पनि खोले ।

त्यसपछि उनी पोखरा नै फर्किएर रिकन्डिसनकै कामलाई निरन्तरता दिए ।

रिकन्डिसनको काम गर्न दाइबाट प्रेरणा मिलेको ध्रुव बताउँछन् । ‘मेरो दाईले मोटरसाइकल किन्नुहुन्थ्यो । मर्मतसम्भार गरेर चलाउनुहुन्थ्यो र राम्रो मूल्य आए बेचिहाल्नु हुन्थ्यो । सेकेन्ड ह्यान्ड मोटरसाइकल शोरुममै राखेर बेच्यो भनेपनि बिक्छ जस्तो लाग्यो । त्यसैले यो व्यवसाय रोजेँ,’ यही पेशा नै रोज्नुको कारण खोल्दै उनले भने ।

उनले पछि थाहा पाए उनको रिकन्डिसन हाउस नेपालमा दर्ता भएर संचालन भएको पहिलो रिकन्डिसन हाउस रहेछ । रिकन्डिसन चलाउँदै गर्दा उनी पोखराको पृथ्वीनारायण क्याम्पसमा आइएल पढ्थे ।

उनी बिहान कलेज जान्थे । कलेज ११ बजेसम्म लाग्ने हुँदा, दुईओटा क्लास छोडेर शोरुम आउथे । काम गर्ने मान्छे नराखेको भएर मोटरसाइकल पुछ्नेदेखि शोरुम सफा गर्नेसम्म आफैँ गर्थे ।

‘मैले त मोटरसाइकल बनाउन पनि जानेको थिएँ । कतिपय मोटरसाइकल आफैँले बनाएर पनि बेचेँ,’ उनी विगतको संघर्ष सम्झिँदै भने ।

रिकन्डिसन खाेलेको झण्डै तीन वर्षपछि उनले सुजुकी मोटरसाइकलको डिलर राखे । त्यसको केही समयपछि हुलास मोटर्सको गाडीको डिलर पनि लिए । उनले आफ्नो डिलरबाट तत्कालीन प्रधानमन्त्री डा. बाबुराम भट्टराईलाई गाडी पठाएका रहेछन् ।

‘तत्कालीन प्रधानमन्त्री डा. बाबुराम भट्टराईले नेपालमै एसेम्बल भएको मुस्ताङ गाडी चढ्ने घोषणा गर्नुभयो । एसी भएको गाडी आयातकर्ता कम्पनीसँग स्टकमा रहेनछ,’ उनले भने, ‘केहीसमय अगाडि मैले मेरो ग्राहकको लागि ल्याएको थिएँ, कम्पनीले सोही गाडी पठाउन आग्रह गरेपछि मैले त्यो गाडी पठाइदिएँ ।'

आफूले मगाएको गाडी नपाएकोमा ग्राहक रिसाएको सम्झना उनको मानसपटलमा ताजै छ । तर पछि प्रधानमन्त्रीलाई नै गाडी पठाएको बताएपछि ग्राहकले मानेको र आफूलाई सहज भएको पनि बताए । त्यसपछि उनले जापानी गाडी डाइहाट्सुको पनि डिलर पाए ।

अटोमोबाइलमा थुप्रै सफलता पाएका उनले लगानीलाई रियलस्टेटको क्षेत्रमा विस्तार गरे । तर रियल स्टेटको व्यवसाय सुरुमा राम्रै भए पनि पछि भने अप्ठ्यारोमा परे ।

२०६२/६३ तिर १ सय ८ रोपनी जग्गा लिएर प्लटिङ गरेपनि सोही समय घरजग्गा कारोबारमा मन्दी आएको रहेछ। अप्ठ्यारोमा आफूले गरेको निर्णय उनले सम्झिँदै भने, ‘धेरैले मलाई यो मान्छे अब डुब्यो भन्थे, तर मैले धैर्यता गुमाइन । मूल्य घटाएरै भएपनि जग्गा बेचें।’

त्यो समय उनको लागि चुनौतीपूर्ण बन्यो । बल्ल २/३ वर्षको मेहनतपछि उनी पुरानै लयमा फर्किए । त्यसपछि ध्रुवले कहिल्यै पछाडि फर्केर हेर्नुपरेन ।

करिब ६ वर्ष अगाडि उनले फोर्ड गाडीको डिलर लिए भने फोर्स गाडीको नेपालको लागि आधिकारिक वितरक नै बने । उनले त्यस्तै दुई वर्ष अगाडि पोखरामा माउन्टेन ग्लोरी रिसोर्ट पनि संचालनमा ल्याएका छन् । हाल उनको दुई बैंकमा लगानी समेत छ ।

व्यवसायमा प्रशस्त सफलता पाएका ध्रुव अब भने व्यवसायसँगै व्यवसायिक संगठनमा पनि लागि पर्ने योजना छन् । उनले आगामी मंसिरमा हुने नाडा अटोमोबाइल्स एशोसिएसन अफ नेपालको अध्यक्षमा उमेद्वारी दिने घोषणा पनि गरिसकेका छन् ।

‘नाडामा ९० प्रतिशत भन्दा धेरै हिस्सा होल्ड गरेका साना व्यवसायीको समस्या सुनुवाइ भएको छैन । त्यसैको लागि मैले अध्यक्षमा दाबेदारी प्रस्तुत गरेको हुँ,’ उनले भने, ‘म आफैँ पनि सानो व्यवसाय गर्दै यहाँसम्म आइपुगेको हुनाले साना व्यवसायीको मर्का मैले राम्रो सगँ बुझेको छु ।’

निर्वाचित भएकोखण्डमा आफूले नाडामा भएका विकृति र सिन्डिकेट हटाउन हरसम्भव प्रयास गर्ने प्रतिबद्धता उनले जनाए ।

‘नाडामा सिन्डिकेट धेरै छ । केही ठूला व्यवसायीले सदस्य धेरै बनाउने र उनीहरूले जसलाई चाहे त्यही अध्यक्ष बनाउने प्रवृत्ति छ । त्यसलाई तोड्नका लागि पनि मैले उम्मेदवारी दिन लागेको हुँ,’ उनले भने ।

सुरुआती दिन देखि नै व्यवसायमा श्रीमतीको साथ पाएको र छोरा पनि व्यवसाय संचालन गर्न सक्ने भइसकेकाले आफू संगठनको काममा हिँड्न समस्या नपर्ने उनको भनाइ छ ।

आफू सफल व्यवसायी बनेका उनले सफलताको सूत्र पनि बताए । काममा सफल हुन लगाव, धैर्यता, मेहेनत प्रशस्तै चाहिने बताउँदै उनले भने, ‘जीवनमा उतारचढाव सबैको आउँछ । त्यस्तो समयमा आत्तिनु हुँदैन । जसले धैर्यता देखाएर अघि बढ्छ, त्यो मान्छे सफल हुन्छ।’

प्रकाशित मिति: शनिबार, असोज ९, २०७८ १७:३२