लोकतन्त्रको पक्षमा रचनात्मक योगदान र खबरदारी शिलापत्रको प्रतिबद्धता

A+ A A-

(शिलापत्रडटकमको १०० दिन पुगेको उपलक्ष्यमा आयोजित विशेष समारोहमा शिलापत्रका सम्पादक अरुणदेव जोशीको मन्तव्य ।)

उपस्थित आ–आफ्नाे क्षेत्रमा विशिष्ट योगदान पुर्यारएर पहिचान बनाउनुभएका प्रबुद्ध व्यक्तित्वहरु,

सर्वप्रथम शिलापत्रडटकम सय दिन पुगेको उपलक्ष्यमा आयोजित यो समारोहमा उपस्थित भएर कार्यक्रमको गरिमा बढाइदिनुभएकामा शिलापत्र नेटवर्क प्रालिका तर्फबाट सबैमा कृतज्ञता व्यक्त गर्दछु ।

यहाँहरु प्रत्येकको उपस्थितिले हामीलाई थप हौसला प्राप्त भएको छ । हामी निरन्तर सिक्दै छौं र तपाईंहरुको साथ र प्रेमले हामीले अहिले १०० दिन पूरा गरेका छौं । हामी जहाँ आइपुगेका छौं, त्यसमा हामीलाई सन्तोष छ त्यसैले हामी अहिले यो समारोहमा छौं ।

तर, हामीलाई थाहा छ पुग्नु निकै टाढा छ । त्यो टाढाको हाम्रो यात्रामा तपाईंहरु सहयात्री हुनुहुनेछ भन्नेमा हामी ढुक्क छौं ।

रचनात्मकता, विश्वसनीयता र समाजका विविध पक्षको सुखदुःख हाम्रा विषयवस्तु हुनेछन् भनेर हामीले प्रतिबद्धता गरेका थियाैं । त्यसैअनुरुपका सामग्री प्रस्तुत गर्ने प्रयास पनि हामीले गरेका छौं । तपाईहरुको निरन्तर निगरानी र सहयोगले हामीलाई हाम्रो प्रतिबद्धतामा उभिन सहयोग पुगेकाे छ । तपाईहरुको सहयोगमा आगामी दिनमा अझ परिष्कृतत र रचनात्मक रुपमा लक्ष्यको दिशामा अघि बढ्नेछौं ।

लोकतन्त्र र विधिको शासनप्रति हामी प्रतिबद्ध रहँदै राजनीतिमा लोकतान्त्रिक संस्कृतिको विकासमा सहयोगी हुने अपेक्षा गर्दछौं । स्वतन्त्र पत्रकारिता लोकतन्त्रको आधारशिला हो त्यसैले हामी स्वतन्त्र पत्रकारितामाथि लाग्ने अंकुशविरुद्ध निरन्तर संघर्ष गर्दै जानेछौं ।

स्थानीय अर्थतन्त्रको विकासमा सहयोगी हुँदै समाजवाद, सामाजिक न्याय, समृद्धि र संघीय लोकतन्त्रको पक्षमा निरन्तर रचनात्मक योगदान र खबरदारी गर्ने हाम्रो प्रयास जारी छ र हामी अझै प्रतिबद्ध भएर निरन्तर लागिरहने विश्वास दिलाउन पनि चाहन्छौं ।

नेपाल समाज र राजनीतिले आगामी दिनमा लिनुपर्ने बाटो बृहत् अन्तर्कृया र बहसको माध्यबाट तय हुनुपर्छ भन्ने हाम्रो मान्यता हो । हामीले हाम्रो समाचार पोर्टलमार्फत विचार र बहसलाई केन्द्रमा राखेका छौं । यस विचार र बहसमा तपाईंको निरन्तर सक्रिय सहभागिता हामीले अपेक्षा गरेका छौं ।

आदरणीय प्रबुद्ध व्यक्तित्वहरु, अझ पनि हामी सिकाइकै क्रममा छौं । सुरुवातमा भनिएजस्तै हाम्रो प्रतिबद्धता सिक्नमा छ । आउनुस्, शिलापत्रसँग उन्नत सामाजिक न्यायमा आधारित सामाज निर्माण गर्ने लामो यात्रमा सहयात्री बनौं । शिलापत्रलाई तपाईंले दिनुभएको साथ र सहयोग निरन्तर रहनेछ भन्ने हाम्रो अपेक्षा छ ।

अहिलेसम्मकाे साथ र सहयोगका लागि धन्यवाद ।

प्रकाशित मिति: आइतबार, जेठ २६, २०७६ ०४:३९