नेप्सेको १९ दिने यात्रा: ५ सय अंकभन्दा बढीले घट्यो, 'टर्निङ प्वाइन्ट' बन्ला आजको कारोबार ?

नेप्सेको १९ दिने यात्रा: ५ सय अंकभन्दा बढीले घट्यो, 'टर्निङ प्वाइन्ट' बन्ला आजको कारोबार ?

A+ A A-

पछिल्लो एक महिनादेखि शेयरबजारमा देखिएको ओरालो यात्रामा मंगलबार विराम लागेको छ ।

एक महिनामा १९ दिन कारोबार हुँदा केहीदिन बजार बढेपनि अधिकांश दिन बजार दोहोरो र तेहोरो अंकले घटिरह्यो । तर आजको कारोबारले भने यसलाई रोकेको छ । नेप्सेमा बन्दै आएको रातो क्यान्डल आज हरियो बन्यो ।

पछिल्लो एक महिनामा भएको १९ कारोबार दिनमा नेप्से ५ सय १२ अंकले घट्दा लगानीकर्ताहरूले ठूलो रकम गुमाए ।शेयर बजारमा करेक्सनलाई स्वाभाविक रुपमा लिइने भएपनि अहिलेको घटाइ अस्वाभाविक रहेको विश्लेषण भएको थियो । बजारको कारणले भन्दा पनि सरकार र नियामक निकायको नीतिले बजारलाई ओरालोको दिशामा पठाएकाले पनि बजारको भविष्य माथि नै प्रश्नहरू उठिरहेको उनीहरूको मत थियो ।

३ भदौमा नेप्से ३२ सय माथि पुगेको थियो । सो दिनदेखि घटेको बजार १९ कारोबार दिनमा ५ सय १२ अंकले घट्यो । गत वर्षपनि बजारमा ५ सय बिन्दुको करेक्सन आएपनि छोटो अवधिमा देखिएको अहिलेको घटाइले लगानीकर्ताको मनोविज्ञानलाई समेत असर पार्‍यो । जसले लगानीकर्ता प्यानिक सेल गर्दै बजारबाट बाहिरिन हतारिए ।

यसअघि बजारको करेक्सन ३०५० को बिन्दुमा रोकिने अनुमान थियो । फिनोवासी विश्लेषणका आधारमा सो अंकमा सपोर्ट रहेकाले बजार त्यहाँ भन्दा तल नझर्ने बताइएको थियो । तर बजारको घटाइमा बाह्य कारण हावी हुँदा सो सपोर्टले बजारको घटाइलाई रोक्न सकेन । यही प्रवृत्ति २९५२ र २८६० बिन्दुको सपोर्टमा दोहोरियो ।

तर भदौ २१ मा २७७७ को बिन्दुबाट तल झर्न नमानेको बजार विस्तारै उठेर ३ हजारको बिन्दु पार गरेपनि सो सुधार कायम रहन सकेन । सोही समय बजारलाई असर पार्ने गरी देखिएको बैंकिङ तरलता अभाव, नियामक निकायको अडान लगायतका बाह्य कारणले बजारलाई माथि उठ्न दिएन । घट्दो दरले बजारलाई २५०० बिन्दुको स्थानमा लैजाने अनुमानका बीच बजारले २६१४.९३ अंकलाई छोएर मंगलबार माथि आएको हो ।

बजारको घटाइ रोकिएसँगै यतिबेला नेप्से नयाँ उचाइमा पुग्न सक्ने आँकलनहरू भैरहेका छन् । विश्लेषकहरूले यो शैलीको घटाइले बजारमा लगानीकर्ताले थप लगानीको अवसर पाउने र बजारमा फेरि प्रवेश गर्न चाहनेलाई समेत अवसर दिने भएकाले अबको दिन बजार अझै माथिल्लो बिन्दुमा जाने बताइरहेका छन् । तर यसका लागि भने यो साताभरको कारोबारमा भर पर्ने उनीहरूको तर्क छ ।

शेरबजारको सैद्धान्तिक विश्लेषण गर्दै आएका विश्लेषक विष्णु बस्यालले पनि बजारले २६ सयको वरिपरीमा आउने र यहाँको सपोर्टले बजार फेरि माथि जाने तर्क गरेका थिए । बजारमा २६ सय बिन्दुमा राम्रो सपोर्ट भएको र सो अंकबाट फर्केमा बजारले ४ हजार देखि ४२०० सम्मको यात्रा तय गर्ने उनको आँकलन थियो । यदी २६ सयको सपोर्ट भत्केमा २४ सयमा नयाँ सपोर्ट रहेको र त्यसले बजारलाई उचाइमा लैजाने प्रक्षेपण गरेका थिए ।

उनले गरेको अनुमान बमोजिम नै बजार २६ सय अंकबाट फर्किने छाँट देखाएको छ । त्यसो त एलिअट वेभका आधारमा पनि बजारले २६ सयको बिन्दुमा बलियो सपोर्ट पाउने आधार देखाएको थियो ।

अहिलेको घटाइ बजारको करेक्सन हो कि बियरीस ट्रेन्ड हो भन्ने अन्योल पनि लगानीकर्तामा देखिएको हो । तर बुलिस बजार २० प्रतिशतसम्म नघटेसम्म त्यसलाई बियरीस मानिँदैन । अहिलेको घटाइ १६ प्रतिशत मात्र रहेको छ ।

यस्ता छन् बजार बढ्ने आधार

शेयरबजारको ओरालो यात्रा रोकिएपनि यतिबेला लगानीकर्ता अन्योलमा छन् । यो बुल ट्रयाप हो कि करेक्सन सकिएको हो भन्ने अन्योल उनीहरूमा देखिएको हो ।

तर विश्लेषकहरू भने थुप्रै तर्क पेस गर्दै अहिलेको घटाइ करेक्सन भएको र लगानीकर्ता आत्तिदा नेप्से परिसूचक आवश्यकताभन्दा तल गएको बताइरहेका छन् ।

सामान्यता नेप्से भदौदेखि कार्तिकसम्म जस्तोसुकै अवस्थामा पनि बढ्ने गरेको छ । बैंक तथा वित्तीय संस्था, हाइड्रो लगायतका कम्पनीहरूले बोनस घोषणा गर्ने भएकाले पनि यो समयमा बजार बढ्नु स्वाभाविक रहेको उनीहरूको भनाइ छ ।

तरलता अभावका कारण समेत घटेको बजार दसैंसँगै सुधारिने आँकलन भएको हो । यस्तै संशोधित बजेट विधेयक पारित हुन नसक्दा समेत बजार प्रभावित भएकाले बजेट कार्यान्वयनमा आएसँगै बजारलाई टेवा नै दिने देखिन्छ ।

यस्तै राष्ट्र बैंकले मौद्रिक नीतिलाई पहिलो त्रैमासमा समीक्षा गर्ने बताइरहेकाले विगतमा कडाइ गरिएको शेयर धितो कर्जाको प्रावधान केही खुकुलो हुने अपेक्षा समेत छ । यसले पनि बजारलाई बुलिस ट्रेन्ड कायमै राख्न सहयोग गर्ने देखिन्छ ।

शेयरबजार लगानीकर्ता हरि ढकाल आजको कारोबारले लगानीकर्तामा सकारात्मक माहोल बनाएको बताउँछन् । उनी भन्छन,‘यो पटक करेक्सन नै भएपनि राष्ट्र बैंकको नीति, बैंकमा तरलता अभाव, बजेट रोक्का लगायतका कारणले पनि बजार थप तल लग्यो । अझ त्यसमा आत्तिने लगानीकर्ताको मनोविज्ञानले पनि बजार धेरै अंकले घट्न पुग्यो ।’

ढकाल एक महिना बजार घटेपनि बढ्ने आधारहरू कै कारण पनि बजार आजबाट फर्कनसक्ने बताउँछन् । उनी भन्छन्, 'लाभांश हरेका वर्ष दसै तिहारकै समयमा भित्रिन्छ । बजेट खर्च रोकिने कुराले पनि बैंकमा तरलता अभावको अवस्था आयो । खर्च सुरु भएसँगै अभाव हट्छ त्यसैले ब्याजदर पनि दीर्घकालिन हुँदैन । यिनै आधारले पनि अब बजार बढ्छ भन्नेमा कुनै शंका छैन ।’

त्यसो करिब यो १९ दिनसम्म नेप्से सूचकसँगै कारोबार रकम पनि घटिरहेको थियो । तर आजको कारोबार रकमले पनि बजारमा लगानीकर्ता निस्कन भन्दा पनि पर्ख र हेरको अवस्थामा रहेको देखाइरहेको छ । सोमबार घटेको बजारमा ९ अर्बको कारोबार भएपनि आज भने ६ अर्बको मात्रै कारोबार भयो ।

प्रकाशित मिति: मंगलबार, असोज ५, २०७८ १७:५७