सेयर बजार सुधारमा चाहेर पनि के गर्न पाएनन् अर्थमन्त्रीले ?

A+ A A-

अर्थमन्त्री डा. युवराज खतिवडाले आफूले चाहेर पनि सेयर बजार सम्बन्धि केही प्रावधान लागू गर्न नपाएको बताएका छन् । धितोपत्र बोर्डको २७औं वार्षिकोत्सवको विशेष अवसरमा आयोजित कार्यक्रममा डा. खतिवडाले यस्तो वताएका हुन् ।

घरजग्गा खरिदमा महिलाको नाममा पास गर्दा रजिष्ट्रेसन शुल्कमा छुटको व्यवस्थाले उत्साहजनक परिणाम दिएको भन्दै डा. खतिवडाले आगामी आर्थिक वर्षको बजेटमा पुँजी बजारको सम्वन्धमा पनि यस्तै केही व्यवस्था गर्न खोजिए पनि गृहकार्य नपुगेले सम्भव नभएको बताए ।

‘घरजग्गा खरिदमा महिलाको नाममा पास गर्दा १० प्रतिशत शुल्क दिने व्यवस्थाले राम्रो परिणाम दिएको छ, अहिले यस्तो छुट बढेर २५ प्रतिशतसम्म पुगेको छ, यो व्यवस्था लागू गर्नुअघि काठमाडौं उपत्यकामा ८ प्रतिशत महिलासँग मात्रै जमिन थियो, अहिले धेरै बढेको छ, सेयर बजारको सन्दर्भमा पनि यस्तै कुनै व्यवस्था राख्ने मेरो सोच थियो तर गृहकार्य नपुगेको सम्भव भएन,’ डा. खतिवडाले भने ।

अहिले साधारण सेयर (आइपीओ) भर्नेलाई कम्तिमा १० कित्ता सेयर पाउने व्यवस्था धितोपत्र बोर्डले गरेको छ । यस्तै महिलाले भरेको अवस्थामा बेग्लै कुनै व्यवस्था गर्न सके उपयुक्त हुने अर्थमन्त्री डा. खतिवडाले बताए ।

‘आइपीओ भर्नेले कम्तिमा १० कित्ता सेयर पाउने व्यवस्था धितोपत्र बोर्डले गरेको छ, महिलाले आइपीओ भरेको अवस्थामा त्यसैगरी पाउने कुनै नीतिगत व्यवस्था गर्नुभयो भने अर्थमन्त्री खुसी हुन्छ,’ डा. खतिवडाले थपे ।

उनले आगामी आर्थिक वर्षको बजेटले कर सम्वन्धि विवादको अन्त्य गरेको पनि डा. खतिवडाले बताए । नेपालमा धितोपत्र बजार सुरु भएदेखिकै कर विवाद चालु आर्थिक बर्षको बजेटले समाधान गरेको डा. खतिवडाको दावी छ ।

‘आगामी आर्थिक बर्षको बजेट मार्फत सेयरको पुँजीगत लाभकर साढे ७ प्रतिशतबाट ५ प्रतिशतमा झारेका छौं, सवै प्रकारका वित्तीय उपकरणमा मूल्य अभिबृद्धि कर (भ्याट) नलाग्ने व्यवस्था गरेका छौं, सेयर बजारको कर सम्बन्धि विगतदेखिको विवाद अव सकिएको छ, आर्थिक बृद्धि, आर्थिक गतिविधिको विस्तार र कम्पनीहरुले गर्ने नाफाको प्रतिविम्व सेयर बजारमा पर्नुपर्छ,’ उनले भने ।

उनले धितोपत्र बोर्डको स्वायत्तताको लागि कानुनमा संसोधन गर्न लागिएको बताए । नियामक निकाय स्वायत्त हुनुपर्ने भन्दै उनले यसका लागि आफूले सक्दो पहल गर्ने बताए ।

प्रकाशित मिति: आइतबार, जेठ २६, २०७६ ००:१८