पोखरेल सरकारको सयदिने उपलब्धि : पत्रकारलाई फर्निचर दान, अरूको काममा आफ्नो नाम

पोखरेल सरकारको सयदिने उपलब्धि : पत्रकारलाई फर्निचर दान, अरूको काममा आफ्नो नाम

A+ A A-

गण्डकी प्रदेशमा कांग्रेस नेतृत्वमा गठबन्धन सरकार बनेको सय दिन पूरा भएको छ । गत २९ जेठमा कांग्रेस, माओवादी, जसपा, राष्ट्रिय जनमोर्चा र एक स्वतन्त्र सांसदको गठबन्धन सरकार बनेको हो ।

कांग्रेसका कृष्णचन्द्र नेपाली पोखरेलको नेतृत्वमा बनेको सरकारले ‘हनिमुन पिरियड’ पूरा गरेका हो । ३१ पानाको किताब नै छापेर २९ जेठमा सरकार गठनयताका काम सोमबार पत्रकारमाझ सार्वजनिक गरिएको छ ।

पोखरेल नेतृत्वको सरकारका आशालाग्दा काम भने देखिँदैनन् । राजनीतिक नियुक्ति, प्रतिवेदन तयार, अन्तर्क्रिया, इजरायली राजदूतसँगको भेट, प्रदेश र कास्की पत्रकार महासंघलाई फर्निचर सहयोग, तालिम, विचार लेखन प्रतियोगिताजस्ता निकै सामान्य लाग्ने काम पनि प्रदेश सरकारले उपलब्धिमा देखाएको छ ।

कोभिडविरुद्धको पहिलो खोप ६ लाख ८५ हजार ५ सय ८० जनालाई र दोस्रो डोज खोप ५ लाख ९१ हजार ९ सय ४७ जनालाई दिइएको प्रदेश सरकारले जनाएको छ । साथै, कोभिडविरुद्धको तयारीका लागि आवश्यक जनशक्ति व्यवस्था, स्वास्थ्य उपकरण र अस्पतालको स्तरोन्नतिका कार्यलाई प्राथमिकताका साथ कार्यान्वयनमा ल्याइएको उपलब्धि पुस्तिकामा उल्लेख छ ।

राम्रा काम पनि हुँदै छन्

सुन्दै हास्यास्पद लाग्ने गतिविधिलाई उपलब्धिमा देखाएको प्रदेश सरकारले केही काम नै नगरेको भने होइन । क्यान्सरपीडित महिला र मनाङका बाढीपीडितको ‘घाउमा मलम’ लगाउने काम प्रदेश सरकारले गरेको छ ।

२९ जेठमा सरकार बनेलगत्तै बसेको पहिलो मन्त्रिपरिषद् बैठकले स्तन र पाठेघरको उपचार नि:शुल्क गर्ने घोषणा गरेको थियो । त्यो कार्यान्वयन गर्ने तयारीमा प्रदेश सरकार छ । जनयुद्धका बेपत्ता, घाइते र उनीहरूको परिवारलाई सरकारी अस्पतालमा नि:शुल्क उपचार दिने घोषणा प्रदेश सरकारले गरिसकेको छ ।

त्यसका लागि कार्यविधि बनेको र कार्यान्वयन गर्ने अन्तिम चरणमा रहेको प्रदेश स्वास्थ्य मन्त्रालयले जनाएको छ । यो सेवा प्रदेशका सबै सरकारी अस्पतालबाट नि:शुल्क दिइनेछ ।

गत जेठमा आएको बाढीले क्षत्‌विक्षत् मनाङ अझै लयमा फर्कन सकेको छैन । ठाउँठाउँमा पहिरो जाने, पुल बगाउने हुँदा सडक सम्पर्क नै विच्छेद भएको छ । जिल्ला सदरमुकाम चामे पुग्ने अवस्था पनि छैन । ‘यो हप्ता वा अर्को हप्तासम्म सडक खुलाउने गरेर हामी लागेका छौँ,’ मुख्यमन्त्री पोखरेलले भने ।

प्रदेश सरकारले विपद्पीडितलाई राहतस्वरूप प्रतिघर १ लाख रुपैयाँ दिन्छ । मनाङका ७५ घरलाई मन्त्रिपरिषद्बाट निर्णय गरेर थप १ लाख गरेर २ लाख रूपैयाँ राहत दिइएको छ । प्रदेशका अरू जिल्लामा भएका क्षतिसहित जिल्ला विपद् व्यवस्थापन कोषमा जम्मा हुने गरी १ करोड ३७ लाख उपलब्ध गराइएको मुख्यमन्त्री पोखरेलले जानकारी दिए ।

गण्डकी प्रदेशलाई सडक मानवमुक्त घोषणा गर्ने तयारीमा पनि प्रदेश सरकार छ । त्यसका लागि सडक आश्रित सहयोगापेक्षी मानव उद्धार, पुनर्स्थापना तथा व्यवस्थापन कार्यविधि, २०७८ स्वीकृत भइसकेको छ ।

१ सय दिनमा निजी धारा तथा आधारभूत खानेपानीमार्फत थप २.३३ प्रतिशत जनसंख्यामा आधारभूत खानेपानीको पहुँच पुगेको उपलब्धिमा उल्लेख छ । प्रदेशमा हालसम्म ९३.६३ प्रतिशत जनसंख्यामा आधारभूत खानेपानीको पहुँच पुगेको छ ।

‘हनिमुन पिरियड’मा सरकारले २० किलोमिटर सडक कालोपत्रे र १० किलोमिटर सडक ग्राभेल गरेको मुख्यमन्त्री पोखरेलले बताए ।

अर्काले गरेको काममा पनि आफ्नै दाबी

पृथ्वीसुब्बा गुरुङ नेतृत्वको सरकारले गत वर्ष १ साउनमा तत्कालीन लायन्स अस्पताललाई संक्रामक तथा सरुवा रोग अस्पताल बनायो । त्यसको भवन निर्माणको काम पनि उनकै पालामा सुरु भयो ।

पोखरेल नेतृत्वको सरकारले आफूले नै त्यो काम थालेजस्तो गरी हनिमुन पिरियडको उपलब्धिमा अस्पतालको भवन निर्माणलाई देखाएका छन् । सरुवा रोग अस्पतालको भवन निर्माणको शिलान्यास पृथ्वीसुब्बा गुरुङले १० जेठमा गरेका थिए ।

त्यो मात्रै होइन, गण्डकी प्रदेश प्रशिक्षण प्रतिष्ठान र गण्डकी विश्वविद्यालयको भवन निर्माणको काम पनि आफ्नै पालामा सुरु भएजस्तो गरी उपलब्धिमा देखाइएको छ । तर, सरुवा रोग अस्पतालको भवनसहित प्रतिष्ठान र विश्वविद्यालयको भवन निर्माणको काम पृथ्वीसुब्बा गुरुङकै पालामा अघि बढेको हो ।

गत फागुन तेस्रो हप्ता पोखरा आउँदा तत्कालीन प्रधानमन्त्री केपी शर्मा ओलीले प्रशिक्षण प्रतिष्ठानको भवनको शिलान्यास गरेका थिए । विश्वविद्यालयको भवनको काम पनि पृथ्वीसुब्बा मुख्यमन्त्री हुँदै गत वैशाख दोस्रो हप्ता सुरु भएको हो ।

पत्रकारसँग कुनै अन्तर्क्रिया नगर्ने र आफ्नो कुरा मात्रै राख्ने मनशायमा मुख्यमन्त्री पोखरेल थिए । तर, पत्रकारले प्रश्न गरेपछि भने उनी त्यसको जवाफ दिन तयार भए । सामान्य विषयलाई पनि किताब नै प्रकाशन गरेर उपलब्धि देखाइएकोबारे पत्रकारले मुख्यमन्त्री पोखरेललाई प्रश्न पनि गरेका थिए ।

उनले प्रदेश सरकारको कामको विश्लेषण गर्ने जिम्मा पत्रकारलाई नै दिए । ‘१ सय दिनमै जनजीवनमा परिवर्तन हुने कुरा सम्भव हुँदैन । यसबीचमा भएका कुरा हामीले राख्यौँ । यसमा यहाँहरूले विश्लेषण गर्ने कुरा हो,’ उनको जवाफ छ ।

प्रकाशित मिति: सोमबार, असोज ४, २०७८ १९:४४