खानेपानीको मुहानमै नगरपालिकाको ‘डम्पिङ साइट’

A+ A A-

डडेल्धुराको अमरगढी नगरपालिकाले खानेपानीको मुहान नजिकै डम्पिङ साइट बनाएको भन्दै स्थानीय आक्रोशित भएका छन् ।

अमरगढी नगरपालिका–७ कुयलीमा रहेको गुनेइगाडमा फोहोर जाने गरी नगरपालिकाले डम्पिङ साइट बनाएर फोहोर फाल्न थालेपछि यहाँका स्थानीयले विरोध जनाएका हुन्।

स्थानीयवासीको निजी जमिन भाडामा लिई नगरपालिकाले बजार क्षेत्रमा संकलन हुने फोहोर फाल्न थालेको छ । फोहोर खोलाको पानी दुषित बनेको छ भने दुर्गन्धले पनि बस्न असहज भएको स्थानीयको भनाई छ ।

‘घरमा पनि बस्न नसकिने भयो, दुर्गन्धले,’ स्थानीय राम भण्डारीले भने, ‘यसको उपयुक्त विकल्प नगरपालिकाले खोज्नुपर्छ । खोलामा फोहोर फाल्ने काम रोक्नुपर्छ ।’

डम्पिङ साइट हटाउनका लागि अमरगढी नगरपालिकासँग पटक–पटक आग्रह गर्दा पनि सुनवाइ नगरेकाले अब आन्दोलनमा उत्रिने स्थानीयकले चेतावनी दिएका छन् ।

अमरगढी नगरपालिका, अजयमेरु गाउँपालिका र भागेश्वर गाउँपालिकाका दर्जनौं गाउँका स्थानीयले उक्त खोलाको पानी उपभोग गर्दै आएका छन् ।

अमरगढी नगरपालिकाले डम्पिङ साइटका लागि जमिन खोजिरहेको र सूचना पनि जारी गरेको जनाएको छ । जिल्ला सदरमुकामसमेत रहेको अमरगढी नगरपालिकाको बजार क्षेत्रमा बढ्दै गएको बसोबासका कारण फोहोर व्यवस्थापन चुनौति बन्दै गएको अमरगढी नगरपालिकाका नगर प्रमुख बिश्वेश्वरप्रसाद ओझाले बताए ।

‘पहिलाको डम्पिङ साइटमा स्थानीयले फोहोर फाल्नका लागि अवरोध गरेपछि अस्थायी रुपमा कुयलीमा राखेको र स्थायीका लागि जमिनको खोजिरहेका छौं,’ उनले भने । उग्रतारा मेलौली सडकको छेउमै डम्पिङ साइट हुँदा सो बाटो ओहोरदोहोर गर्ने यात्रुहरुलाई पनि दुर्गन्धले समस्या हुनुका साथै रातिको समयमा जंगली जनावरको जोखिम पनि बढेको स्थानीयहरुको भनाइ छ।

प्रकाशित मिति: शनिबार, जेठ २५, २०७६ १७:२०