मार्तडीमा चामलको बिक्री वितरण बन्द

बाजुरा जिल्लाको सदरमुकाममा रहेको नेपाल खाद्य व्यवस्था तथा व्यापार कम्पनी लिमिटेडको कार्यालय । तस्वीर: निमेन्द्र शाही/शिलापत्र

A+ A A-

बाजुराको सदरमुकाम मार्तडी डिपोमा खाद्य व्यवस्था तथा व्यापार लिमिटेड कम्पनीले चामलको बिक्री रोकेको छ । गोदाममा चामल सकिएको भन्दै खाद्यले सूचना टाँस गर्दै चामल बिक्री बन्द गरेको हो ।

पूर्वोत्तर क्षेत्रका चार स्थानीय तहको लागि खाद्यान्न वितरण गर्ने कोल्टीस्थित खाद्य डिपोले समेत एक महिना अघिदेखि चामल बिक्री बन्द गरिसकेको छ।

सदरमुकाम आउजाउ गर्ने साँफे मार्तडी सडकखण्ड र मार्तडी कोल्टी सडकखण्ड वर्षाका कारण भत्किइ दुई महिनासम्म पनि सञ्चालन नहुँदा खाद्यान्न ढुवानीमा समस्या भएको छ । सोहीकारण चामल अभाव भएको खाद्य व्यवस्था तथा व्यापार कम्पनी लिमिटेड कोल्टी शाखाले जनाएको छ ।

कोल्टीको खाद्य व्यवस्था तथा व्यापार कम्पनी लिमिटेडले त्यस क्षेत्रका स्वामीकार्तिक खापार, जगन्नाथ र हिमाली गाउँपालिका र बुढीनन्दा नगरपालिकाका स्थानीयलाई खाद्यान वितरणका लागि स्थापना गरिएको हो । सदरमुकाम मार्तडीको डिपोले मार्तडी आसपासमा खाद्यान्न वितरण गर्ने गर्दछ ।

अहिले मार्तडी र कोल्टीमा गरी जम्मा ६५ क्‍विन्टल मात्र चामल बाँकी छ। त्यो कैदीबन्दीहरूका लागि पनि नपुग्ने भए पछि डिपो नै बन्द गरिएको हो ।

संस्थानमा चामल सकिएपछि स्थानीयहरू महँगो चामल किनेर खान बाध्य भएका छन् । खाद्यको कोल्टी शाखामा मोटो चामल प्रतिकेजी ४८ रुपैयाँ पर्छ भने बजारमा सोही चामलको प्रतिकेजी ७० रुपैयाँ भन्दा बढी पर्छ ।

बाजुरामा आफ्नो उत्पादनले तीन महिना मात्र खान पुग्ने जनसंख्या ४० प्रतिशत छन्। हरेक वर्ष ११ हजार मेट्रिकटन खाद्यान्न अभाव हुने गरेको छ। त्यसको पूर्ति लिमिटेडले गर्ने गरेको छ।

सो क्षेत्रमा बाली सप्रेकै अवस्थामा समेत यहाँ वार्षिक ११ हजार मेट्रिक टन खाद्यान्न अपुग हुने कृषि कार्यालयको तथ्यांक छ।

कृषि ज्ञान केन्द्र बाजुराका कृषि प्रसार अधिकृत मिनप्रसाद जोशीले भने, ‘हाम्रो जिल्ला खाद्य सुरक्षामा उच्च जोखिमयुक्त जिल्ला हो। बाली सप्रेकै अवस्थामा समेत यहाँ वार्षिक ११ हजार मेट्रिक टन खाद्यान्न अपुग हुने गरेको छ। यस वर्ष गहुँ खेती समेत त्यति राम्रो भएको छैन । २० प्रतिशत उत्पादन घटेको छ। हाम्रोमा तीन महिना मात्र खाना पुग्ने ४० प्रतिशत जनसंख्या छ।’

अहिले नै खाद्यान्न संकट देखिएको र समयमै थप खाद्यान्न आपूर्ति नहुँदा सो क्षेत्रमा समस्या हुने उनको भनाइ छ ।

नागरिक समाज बाजुराका अध्यक्ष अग्निराज शाहीले सडकमार्ग बन्द भएको र हवाइ माध्यमबाट खाद्यान्न ल्याउन ढिलो गर्न नहुने बताए ।

प्रकाशित मिति: शनिबार, असोज २, २०७८ १६:३६