माडीका होमेस्टेमा आउन थाले पर्यटक, सञ्चालक भन्छन्- केही आशा पलाएको छ

A+ A A-

कोरोना र निषेधाज्ञाका कारण पर्यटकविहीन बनेका माडीका होमस्टे तङ्ग्रने प्रयासमा छन् । कोरोनाका कारण साउनसम्म पर्यटकको संख्या शून्य रहेकामा अहिले भने चहलपहल बढ्न थालेको छ ।

चितवन राष्ट्रिय निकुञ्जसँग जोडिएको माडीमा वन्यजन्तु एवं धार्मिक तथा सांस्कृतिक महत्वका ठाउँहरूको भ्रमणमा पर्यटकहरू आउने गरेका छन् ।

माडी नगरपालिका- ८ मा रहेको अयोध्यापुरी मध्यवर्ती सामुदायिक होमस्टेका अध्यक्ष मोहनबहादुर पुन मगर कोरोनाका कारण होमस्टे सञ्चालक आर्थिक संकटमा परेको बताउँछन् ।

चितवनमा वैशाख १६ देखि निषेधाज्ञा जारी भयो । निषेधाज्ञासँगै होमस्टेमा आउने पर्यटक शून्य भए । ‘कोरोनाले पर्यटक शून्य भयो । होमस्टे निर्माण गर्दा निकालेको बैंकको किस्ता तिर्न सक्ने स्थिति भएन,’ उनले भने, ‘यही होमस्टे सञ्चालन गरेर बसेका युवा पनि बिदेसिने तरखर गरेको देख्छु ।’

२०७२ देखि सञ्चालित यो होमस्टेमा कोरोनाअघि शुक्रबार र शनिबार बस्ने ठाउँ नपुगेर पर्यटकलाई अन्य होमस्टे र होटलमा पठाउनु पर्ने गरेको मोहनबहादुर सम्झन्छन् । भदौ लागेपछि पर्यटकहरू आउन थालेपछि भने केही आशा जागेको उनले बताए । भदौयता ३०० जना पर्यटक होमस्टेमा बस्न आएको उनी बताउँछन् ।

पुन मगरको बाहुल्यता रहेको यो ठाउँमा १३ घरले होमस्टे चलाउँदै आएका छन् । होमस्टेमा मगर संस्कृति, सोरठी, मारुनी, थाल नाचको प्रस्तुती हुने गरेको छ ।

माडी नगरपालिका–३ मा रहेको बघौडा सामुदायिक होमस्टे पनि कोरोनाको मारमा पर्‍यो । थारु संस्कृति प्रवर्द्धन तथा स्थानीयको आर्थिक स्थिति सुधार्न यो होमस्टे सहयोगी बनेको थियो ।

‘रोगको डरले आएका पर्यटकलाई स्वीकार्न नसकिने अवस्था सिर्जना भयो,' होमस्टेकी अध्यक्ष रजपतिया चौधरीले भनिन् । कोरोनाको संक्रमण घटेर निषेधाज्ञा खुकुलो भएसँगै होमस्टेमा पर्यटकहरू आउन थालेको चौधरीले बताइन् । ‘कहिले दिनकै १५ जनासम्म पनि हुन्छन् कहिले खाली हुन्छ,' उनले भनिन्, 'बर्खा सकिएपछि पर्यटक थप बढ्छन् कि भन्ने आशा छ ।’

थारु खाना, घुँगी, चिचर, माछा, हाँसका परिकार र थारु साँस्कृतिक नाँच लगायतका कारण पर्यटकहरू यो होमस्टेमा आउने गरेका छन् । अढाई वर्षअघि स्थापना भएको यो होमस्टे अहिले पाँच घरमा सञ्चालित छ ।

माडी नगरपालिकामा- ६ मा रहेको लक्ष्मीबास होमस्टे सञ्चालनको सुरुवाती चरणमै कोरोनाको महामारी फैलियो । ‘सुरुवात राम्रो हुँदै थियो, कोरोनाले असर गर्‍यो । अब भने केही आशा पलाएको छ,’ होमस्टेका अध्यक्ष खडानन्द अधिकारीले भने, ‘पहिलेजस्तो नभए पनि अहिले दैनिक ८ देखि १० जनासम्म पर्यटक आइरहनुभएको छ ।’

गत वर्ष मंसिरदेखि सञ्चालनमा आएको यो होमस्टे पाँच घरमा सञ्चालित छ ।

प्रकाशित मिति: बिहीबार, भदौ ३१, २०७८ १७:३१