बाह्रबिसेलाई राम्रो बनाउन खोज्दा प्रदेशको अवरोधः मेयर शेर्पा

A+ A A-

बाह्रविसे नगरपालिकाका मेयर निमफुञ्जो शेर्पाले प्रदेश सरकारका कारण काम गर्न समस्या भएको गुनासो गरेका छन् ।

बाह्रविसे नगरपालिकालाई भ्रष्ट्रचारमुक्त नगर बनाउने अभियानमा समेत प्रदेश सरकारले असहयोग गरेको मेयर शेर्पाले आरोप लगाएका छन् ।

प्रदेशबाट नगरपालिकामा आएका केही योजना र केही मन्त्रीहरुका कारण आफूलाई भ्रष्ट्राचार मुक्त बाह्रबिसे नगरपालि निर्माण गर्न कठिनाई भएको शेर्पाले बताए । जिल्लाका सञ्चारकर्मीहरुसँग कुराकानी गर्दै मेयर शेर्पाले नजिकका आफन्तले मन्त्री र स्थानीय तहका जनप्रतिनिधिबीच सम्बन्ध राम्रो बन्ननदिने काम गरीरहेको आरोप लगाए ।

प्रदेशले नगरपालिकाले माग गरेको भन्दा आफूहरुलाई फाइदा हुने योजनाहरुमा मात्रै प्रदेश सरकारका केहीमन्त्रीले बजेट विनियोजन गरेको शेर्पाले दाबी गरे । ‘नगरपालिकाबाट योजनाहरुको अनुगमन हुनु पर्नै हो तर सम्पन्न भएका योजनाहरुको समेत प्रदेश सरकारले समयमा नै भुक्तानी गरेन, उपभोक्ता समितिका पदाधिकारीहरुले हैरानी खेप्नु परिरहेको छ ।’ शेर्पाले भने ।

प्रदेश सरकारबाट विनियोजन भएको लाखौ रुपियाँ बजेटको आर्थिक वर्ष सकिन लाग्दा समेत कामै सुरु हुन नसकेको मेयर शेर्पाले जानकारी दिए । नगरपालिकाले बजेट विनियोजन गरेका योजनाहरु अन्तिम चरणमा पुगे पनि प्रदेशबाट आएको बजेटको कामै सुरु नभएको मेयर शेर्पाले जानकारी दिए ।

‘हामीले बाह्रबिसे नगरपालिकालाई भ्रष्ट्राचार र बेरुजुरहित नगरपालिका बनाउने योजना बनाएका छौं, तर प्रदेशका योजनाहरु असफल भए भने त्यसको दोष पनि नगरपालिकालाई आउने भयो ।’ शेर्पाले भने, ‘प्रदेश सरकारकै कारण हामी समस्यामा परेका छौ ।’ प्रदेशका योजनाहरुमा नगरको म्याचिङ फण्ड तथा लागत सहभागिता नहुने भएपछि नगरपालिकालाई योजनाहरुको कुनै जानकारी नै नहुने गरेको उनको भनाई थियो ।

समस्याबारेमा कुराकानी गर्न पनि प्रदेशका मन्त्रीहरुसँग कठिनाई भएको शेर्पाले गुनासो गरे । ‘केहीमन्त्रीहरु सँग राम्रै पनि छ, तर एकाध मन्त्रीज्यूहरुसँग भेटघाट र कुराकानी गर्न धेरै गाह्रो भयो’ शेर्पाले भने ।

‘मन्त्री भन्दा पिएहरुले बढी तनाव दिएका छन् ।’ उनले भने, ‘यो निकै गम्भीर व्यवहारिक समस्या हो ।’ तर कुन मन्त्रीका कारण समस्या भएको भन्नेबारे मेयर शेर्पाले खुलाउन चाहेनन् । ‘आवश्यकता पर्दा म प्रमाणसहित सबै जानकारी गराउँछु’ शेर्पाले भने ।

कमिसनकै कारण अनावश्यक योजनाहरुमा समेत प्रदेश सरकारले बजेट हाल्ने गरेको मेयर शेर्पाको दाबी गरे । मन्त्रीका स्वकीय सचिवले मेयरको वडामा कुनै पनि हालतमा प्रदेश सरकारबाट बजेट हाल्नै नदिने भनेर सार्वजनिक स्थानमा समेत भन्दै हिँड्दा आफूलाई दुःख लागेको शेर्पाले बताए ।

‘हिजो हामीले चुनावमा जसको लागि ज्यान दिनसमेत पछि परेनांै , तर आजहामीलाई फरक व्यवहार भैरहेको छ, हामी आफै अन्यायमा परेका छौं’ शेर्पाले भने ।

प्रदेश मन्त्रालयभित्र नीतिगत समस्याहरु पनि रहेको मेयर शेर्पाले बताए । सानासाना बजेटहरुका लागिपनि हेटौंडासम्मपुग्नु पर्ने, पुगेर पनि समयमा काम नहुने र म्याचिङ फण्डको काम नहुँदा अन्योल बढेको उनको भनाई थियो ।

प्रकाशित मिति: शनिबार, जेठ २५, २०७६ ०२:०३