इन्टर्नसिपको माग गर्दै चीनमा एमबीबीएस गरेका विद्यार्थीहरूद्वारा प्रदर्शन

इन्टर्नसिपको माग गर्दै चीनमा एमबीबीएस गरेका विद्यार्थीहरूद्वारा प्रदर्शन

A+ A A-

चीनमा एमबीबीएस अध्‍ययन गरेर आएका विद्यार्थीहरूले माइतीघरमा प्रदर्शन गरेका छन् । लामो समय भइसक्दा पनि इन्टर्नसिप गर्न नपाएको भन्‍दै उनीहरूले प्रदर्शन गरेका हुन् ।

‘इन्टर्नसिपमा किन ढिला सुस्ती ?, ढिलासुस्ती बन्द गर, इन्टर्नसिप सुरु गर, इन्टर्न डाक्टरको भविष्यमाथि खेलबाड गर्न पाइँदैन, १२ दिन भनी १/२ महिना कुरायौ, अब कति कुराउँछौँ'लगायतका नारा लेखिएका प्लेकार्ड बोकेर विद्यार्थीले प्रदर्शन गरेका हुन् ।

आफूहरूले चिकित्साशास्त्र कोर्स पूरा गरे पनि इन्टर्नसिप गर्न नपाएपछि प्रदर्शनमा उत्रिएको विद्यार्थीहरूको भनाइ छ । सरकारले चीन जाने बेला विद्यार्थीलाई 'नो अब्जेक्सन लेटर' दिँदा अध्ययन गरेको विश्वविद्यालयमै इन्टर्न गर्नुपर्ने बताएको थियो ।

त्यसैलाई देखाएर अहिले चिकित्सा शिक्षा आयोग र मेडिकल काउन्सिलले इन्टर्नसिपको अनुमति नदिएको विद्यार्थीको आरोप छ । जबकि नेपाल मेडिकल काउन्सिलको इन्टर्नसिप नियमको बुँदा नम्बर ३ मा बाध्यात्मक परिस्थितिमा विद्यार्थीले नेपालभित्रैका स्वास्थ्य संस्थामा इन्टर्नसिप गर्न पाउने व्यवस्था छ ।

‘विदेशमा अध्ययन गरेर नेपालमा नै इन्टर्नसिप गर्नुपर्ने कुनै विशेष वा बाध्यात्मक परिस्थिति भएमा सो परिस्थितिको जानकारी दिँदै विद्यार्थीले आफू पढेको संस्था र नेपाल मेडिकल काउन्सिलको पूर्वस्वीकृति लिएर मात्र नेपालभित्रका संस्थामा इन्टर्नसिप गर्न पाउनेछन् । यस प्रकारको इन्टर्नसिप नेपाल मेडिकल काउन्सिलको नियमभित्र रहेर गर्नुपर्नेछ,’ उक्त बुँदामा उल्लेख छ ।

तर, विद्यार्थीले सो नियमको ध्यानाकर्षण गराउँदा काउन्सिलले बाध्यात्मक परिस्थितिको परिभाषा नै फेरेको उनीहरूकाे आरोप छ ।

'अहिले आएर काउन्सिलले बाध्यात्मक परिस्थितिको परिभाषा नै फेरेको छ । हामीलाई अन्टसन्ट जवाफ दिएर फर्काइदिन्छ । त्यसैले आज माइतीघरमा आएर उभिनुपरेको छ,' आन्दोलनमा सहभागी एक विद्यार्थीले भने ।

प्रकाशित मिति: बिहीबार, भदौ ३१, २०७८ १४:००