साल्ट ट्रेडिङका नायब महाप्रबन्धक भन्छन्- सरकारले भनेअनुसार छुट दिन्छौँ (अन्तर्वार्ता)

साल्ट ट्रेडिङका नायब महाप्रबन्धक भन्छन्- सरकारले भनेअनुसार छुट दिन्छौँ (अन्तर्वार्ता)

A+ A A-

अघिल्लो सरकारले नुन आयातमा गरेको निर्णय उल्टिएसँगै साल्ट ट्रेडिङ कर्पोरेसनमा उत्साह छाएको छ । केपी ओली नेतृत्वको सरकारले निजीक्षेत्रलाई नुन आयात गर्ने जिम्मेवारी दिन खोजेको थियो । सरकार परिवर्तनसँगै अघिल्लो सरकारको यो निर्णय उल्टिएको छ ।

साल्ट ट्रेडिङ कर्पोरेसनका नायब महाप्रबन्धक ब्रजेश झा मन्त्रालयको पत्र आएपछि सरकारले भनेअनुसार नुनमा छुट दिने बताउँछन् । साल्ट ट्रेडिङले कारोबार गर्ने अन्य खाद्य पदार्थमा पनि दिन सकिनेजति छुट दिने उनले बताए । प्रस्तुत छ झासँगको कुराकानीः

नुनको चर्चा धेरै भइरहेको छ, के छ अहिलेको अवस्था ?

नेपालमा वार्षिक २ लाख १५ हजार मेट्रिकटन हाराहामीमा नुन खपत हुने गरेको छ । हामी दक्षिण राष्ट्रसँग निर्भर छौँ, केही मात्रामा तिब्बतबाट पनि ल्याउँछौँ । आफ्नो स्रोत नभएकाले आपूर्तिको व्यवस्थापन सजिलो छैन । जुनसुकै अवस्थामा पनि सहज र सुलभ रूपमै नुनको आपूर्ति हुँदै आइरहेको छ, २०४५ सालको भारतसँगको ट्रेड एण्ड ट्रान्जिट नभएको बेलाको होस् वा २०४६ सालको जनआन्दोलनको बेला होस् । २०६२/६३ को जनआन्दोलन, पहिलो मधेस आन्दोलन, भूकम्प, दोस्रो मधेस आन्दोलन र त्योसँगसँगै अघोषित नाकाबन्दीमा नुनको अभाव हुन दिइएन । त्यसमा हामी गर्व गर्छौं ।

कसरी वितरण गरिरहनुभएको छ ?

हाम्रो ९३ वटा कार्यालयमार्फत ६ हजार डिलर नेटवर्क छ । नेपालका सार्वजनिक संस्थानमध्ये सबैभन्दा धेरै जनतासँग पहुँच बनाएको संस्था हामी मात्रै छौँजस्तो लाग्छ ।

हाम्रो एउटा स्थिर मूल्य छ । आपूर्तिमा समस्या छैन । हामीले उच्च गुणस्तर दिएका छौँ । छ महिनाको न्यूनतम बफरस्टक हामीले जहिले पनि राखेका छौँ । बेलाबेलामा हामीसँग नेपाललाई १० महिना पुग्ने नुन पनि स्टकमा हुन्छ । न्यूनतम स्टक पनि हामीसँग छ । मूल्यमा एकरुपता छ । बजारको अवस्था हेर्दा साल्ट ट्रेडिङले जसरी नुनको सर्भिस कुनै अन्य वस्तुमा उपलब्ध छैन, चाहे चामल हेर्नुहोस् वा चिनी । हामीसँग आजको डेट (मिति) मा चिनी कम छ । बजार मूल्य सय रुपैयाँ पुगिसकेको छ । साल्ट ट्रेडिङले मार्केट हस्तक्षेपको कामसमेत गर्दै आइरहेको हुन्छ । यो अर्थमा हामी अन्य व्यापारीभन्दा फरक छौँ ।

दसैँ नजिकिएको छ । के छ तयारी ?

मन्त्रालयबाट पत्र आएपछि हामी सहुलियत राख्छौँ । नुनमा नेपाल सरकारले भनेअनुसार छुट दिएर बिक्री गर्छौं । चिनीको स्टक हामीसँग छैन । खरिदका लागि धेरै अगाडिदेखि पहल गरिरहेको हो । चाँडै त्यसको पनि टुंगो लाग्ला भन्ने विश्वास छ । हामीले कारोबार गर्ने गेडागुडी, चामल, दाल, मसला, तेलमा कति छुट दिन सकिन्छ, दिन्छौँ ।

प्रकाशित मिति: बुधबार, भदौ ३०, २०७८ १८:५८