धादिङको त्रिपुरा सुन्दरी गाउँपालिकाका किसान तथा व्यवसायीले पाउने भए मेगा बैंकको सहुलियतपूर्ण कर्जा

धादिङको त्रिपुरा सुन्दरी गाउँपालिकाका किसान तथा व्यवसायीले पाउने भए मेगा बैंकको सहुलियतपूर्ण कर्जा

A+ A A-

मेगा बैंक नेपाल लिमिटेडले धादिङका साना किसान तथा लघु उद्यमीहरूलाई कृषि तथा लघु उद्यमी सहुलियतपूर्ण कर्जा प्रदान गर्ने भएको छ । उक्त सेवा उपलब्ध गराउनका लागि मेगा बैंक, त्रिपुरा सुन्दरी गाउँपालिका, मेगा क्यापिटल मार्केट्स लिमिटेड र धादिङ उद्योग वाणिज्य संघबीच बुधबार सम्झौता भएको छ ।

सम्झौताअनुसार त्रिपुरा सुन्दरी गाउँपालिकाका साना किसान तथा लघु उद्यमी तथा व्यवसायीहरूलाई कृषि तथा लघु व्यवसाय स्थापना तथा सञ्चालनका लागि मेगा बैंकले सहुलियतपूर्ण कर्जा प्रदान गर्नेछ । कर्जा लगानीका लागि त्रिपुरा सुन्दरी गाउँपालिकाले सिफारिस गरेका लक्षित साना किसान तथा लघु व्यवसायीहरूलाई बैंककले कर्जा लगानी गर्नेछ ।

कार्यक्रममा मेगा बैंकका लघु तथा कृषि कर्जा प्रमुख पुण्यप्रसाद खनियाँले साना किसान तथा लघु व्यवसायीहरूलाई छिटो तथा छरितो ढंगले सहुलियतपूर्ण कर्जा प्रदान गरिने बताए । उनले मेगा बैंकले स्थापनाकालदेखि नै ‘हलोदेखि हाइड्रोसम्म’ भन्ने नाराका साथ विपन्न वर्गलाई प्राथमिकतामा राखी बैंकिङ सेवा सर्वसुलभ गराउँदै आइरहेको स्मरण गराए । उनले साना किसान तथा लघु व्यवसायीहरूलाई वित्तीय साक्षरताका साथै आधुनिक बैंकिङ सेवामा आबद्ध गराउने जानकारी पनि दिए ।

त्यस्तै, त्रिपुरा सुन्दरी गाउँपालिकाका अध्यक्ष शम्भुकुमार थापाले मेगा बैंकले महिला तथा विपन्न वर्गका समुदायलाई प्राथमिकताका साथ कृषि, लघु तथा साना कर्जा प्रवाह गर्दै आएकाले आफूहरूले सहकार्य गरेको बताए । उनले मेगा बैंकको सहुलियतपूर्ण कर्जा सहायताले साना किसान तथा लघु उद्यमीहरूलाई थप आत्मबल प्रदान गर्नुका साथै व्यवसाय सञ्चालनमा मद्दत मिल्ने विश्वास व्यक्त गरे ।

कार्यक्रममा मेगा क्यापिटल मार्केट्स लिमिटेड र धादिङ उद्योग वाणिज्य संघका प्रतिनिधिहरूले यस किसिमका कर्जा प्रवाह गर्ने क्रममा लक्षित वर्गको पहिचानका साथै व्यावसायिक योजना तयार गर्न साना किसान तथा उद्यमीहरूलाई सहयोग गर्ने प्रतिबद्धता व्यक्त गरे ।