‘जबज र समाजवाद’ले नेकपामा खैलाबैला

A+ A A-

पार्टी विधानमा उल्लेख भएको कार्यदिशाका विषयमा नेकपाभित्र विवाद बढेको भएको छ । विधान बनेको एक वर्षपछि नेकपाभित्र कार्यदिशाबारे विवाद बढेको भएको हो ।

खासगरी पार्टी विधानमा उल्लेख भएको जनताको जनवाद र समाजवादबारे विवाद भएको हो । नेकपा सचिवालय सदस्य ईश्वर पोखरेलले पूर्वएमालेको ‘जनताको बहुदीय जनवाद’लाई नै पार्टीको कार्यदिशा बनाउनुपर्ने तर्क गरिरहेका छन् ।

पूर्वएमालेका महासचिवसमेत रहेका पोखरेलले ‘जनताको जनवाद’का ठाउँमा ‘जनताको बहुदलीय जनवाद’ राख्नुपर्ने बताएपछि नेकपाभित्र विधानबारे विवाद भएको हो ।

पार्टीको कार्यदिशाबारे विवाद भएकै कारण नेकपाको राजनीतिक प्रतिवेदन सार्वजनिक भएको छैन । प्रतिवेदनमा ‘जनयुद्ध र समाजवाद’ राख्ने कि नराख्ने भन्नेमा पनि विवाद भएको नेकपाका एक स्थायी समिति सदस्यले बताए ।

नेकपाको पार्टी विधानमा उल्लेख छ, ‘यस पार्टीको रणनीतिक लक्ष्य अर्थात् अधिकत कार्यक्रम वैज्ञानिक समाजवाद हो, न्यूनतम कार्यक्रम जनताको जनवाद हो र यो समाजवाद उन्मुख छ ।’ विधानमा पार्टीको मार्गदर्शक सिद्धान्त माक्र्सवाद–लेनिनवाद हुने लेखिएको छ ।

सँगै, जनताको बहुदलीय जनतवाद, एक्काइसौं शताब्दीको जनवाद र माओवादका सम्बन्धमा आगामी महाधिवेशनसम्म विधिसम्मत् छलफल गरी निष्कर्षमा पुग्ने उल्लेख छ ।

त्यस्तै, विधानमा जनयुद्धबारे पनि उल्लेख गरिएको छ । ‘शान्तिपूर्ण अनओन्दोलन र संसदीय संघर्षको बाटोबाट अघिबढेको नेकपा(एमाले) र जनयुद्धको बाटोबाट अघि बढेको नेकपा(माओवादी)को पहलकदमी र नेतृत्वमा सम्मन्न २०६२÷०६३ को जनक्रान्तिबाट राजतन्त्रको अन्त्य गरी संघीयता, धर्मनिरपेक्षता, समावेशीता, समानुपातिकता जस्ता विशेषतासहितको लोकतान्त्रिक गणतन्त्र स्थापना गर्न सम्भव भएको छ ।’

तर, पोखरेललगायत नेताहरुले विधानका प्रावधानप्रति असहमति राखिरहेका छन् । पार्टीको मार्गनिर्देश सिद्दान्त र कार्यदिशामा विवाद बढेकै कारण अझैसम्म उक्त प्रतिवेदन छापिएको छैन ।

पार्टी एकता प्रक्रिया र सैद्दान्तिक विषयमा पोखरेलले अघोषित असहमति राख्दै आएको नेकपाका एक नेताले बताए । ‘पार्टी एकतापूर्व पोखरेलले आफूलाई अध्यक्ष केपी शर्मा ओलीको उत्तराधिकारी ठान्थे’ ती नेताले भने, ‘अहिले प्रभावशाली भूमिकामा नभएका कारण पोखरेल चिडिएका छन् । त्यसैले विधानका विषयमा किचलो गरिरहेका छन् ।’

पूर्वमाओवादीका एक नेताका अनुसार पूर्वएमालेले जबजको कुरा उठाएर एकता प्रक्रिया अफ्ठेरोमा परेको छ ।

विवादका कारण राजनीतिक प्रतिवेदन नछापिँदा नेकपाका कार्यकर्तामा पार्टीको लाइनबारे अन्योल बढेको छ । ‘पार्टी अध्यक्ष केपी शर्मा ओलीकै कारण पनि प्रतिवेदन नछापिएको हो’ ती नेताले भने, ‘जसकारण कार्यकर्तामा अन्योल बढेको छ ।’

तर, केही नेताले भने विवादका कारण प्रतिवेदन नछापिएको कुरामा सत्यता नभएको बताइरहेका छन् ।

प्रकाशित मिति: शनिबार, जेठ २५, २०७६ ०१:१४