बागमतीका मन्त्री, जो सेवाग्राही आएको सुन्नेबित्तिकै कार्यक्रम छोडेर कार्यकक्ष आइपुगे

बागमतीका मन्त्री, जो सेवाग्राही आएको सुन्नेबित्तिकै कार्यक्रम छोडेर कार्यकक्ष आइपुगे

A+ A A-

मन्त्री वा कुनै राजनीतिक नियुक्तिपछि सार्वजनिक पद धारण गरेका नेताहरूलाई सेवाग्राहीले समयमै भेट्न नसक्ने गुनासो नौलो होइन । जनताका लागि काम गर्न आएका मन्त्रीहरूले सेवाग्राहीसँग नभेटेको, आफ्नो निर्वाचन क्षेत्र चुनाव जितेपछि नपुगेको घटना दिनहुँ मिडियामा आइरहन्छन् ।

मन्त्रीलगायतका सार्वजनिक पद धारण गरेका नेताहरूको व्यवहारप्रति जनताको असन्तुष्टि अझै बढ्दो छ । तर, बागमती प्रदेशका एक मन्त्री जसले सेवाग्राही कार्यकक्षमा आएर कुरेको सुन्नेबित्तिक्कै कार्यक्रम छोडेर आइपुगे ।

भूमि व्यवस्था, कृषि तथा सहकारी मन्त्री चन्द्र लामाले मन्त्रालयमै भइरहेको एक कार्यक्रममा आफ्नो मन्तव्य नै नराखी कार्यकक्षमा कुरेर बसेका सेवाग्राहीको काम गरिदिन आएका हुन् । ‘सेवाग्राहीले कुरेर बसेको छन् भनेर फोन आयो । मैले कार्यक्रममा मन्तव्य राख्ने समय आए पनि सेवाग्राही भेट्न आएको हुँ,’ मन्त्री लामाले भने ।

उनले आफू जनताको काम गर्न मन्त्री भएको भन्दै पहिले जनताको काम गर्ने प्रतिबद्धता सेवाग्राहीसँग राखे । मन्त्रालयमा कर्मचारीहरूसँग समीक्षात्मक कार्यक्रम भइरहेको थियो । ‘मन्त्रीज्यूलाई मन्तव्य राख्न अनुरोध गरिएको थियो । उहाँ पहिला सेवाग्राहीको काम गरेर आउँछु, मेरो मन्तव्य पछि राखौंला भनेर कार्यक्रमबाट हिँड्नुभयो,’ मन्त्रालयका एक कर्मचारीले शिलापत्रसँग भने ।

‘मलाई सांसद कसले बनायो, जनताले । जनताले भोट हालेर सांसद बनाएर पठाएपछि म मन्त्री भएँ । अहिले उहाँहरूको काम नगरी, घण्टौसम्म कुराएर म कार्यक्रममा कसरी बस्ने ? पहिला जनताको काम गर्ने अनि कार्यक्रममा समय बिताउने हो,’ लामा भन्छन् । एमालेका युवा नेता लामा आफूले सिधासिधा कुरा मात्रै जानेको भन्दै सेवाग्राहीलाई सिधै भेट्न आउन पनि आग्रह गरे ।

‘मलाई भेट्न कसैको भनसुन लगाइरहनु पर्दैन । सिधै कार्यकक्षमा र फोनबाट कुरा गर्न सकिन्छ,’ लामा सुनाउँछन् । लामा सात दिनअघि मात्रै मन्त्रीमा नियुक्त भएका थिए । मुख्यमन्त्री अष्टलक्ष्मी शाक्यले लामासहित ६ मन्त्री र ५ राज्यमन्त्री नियुक्त गर्दै मन्त्रिपरिषद्लाई पूर्णता दिएकी थिइन् ।

प्रकाशित मिति: बुधबार, भदौ ३०, २०७८ १५:२६