मध्यमवर्गीयले चढ्ने मोटरसाइकलको कर बढ्यो, १२५ सीसीको १५ हजार तिर्नुपर्ने

A+ A A-

कीर्तिपुरका रोशन सिग्देलले यो दसैँमा नयाँ मोटरसाइकल किन्ने सोच बनाएका थिए । बिहान अफिस जानुपर्ने भएकाले उनलाई मोटरसाइकल नभई हुँदैन । दसैँको छुटमा मोटरसाइकल किन्ने सोच बनाएका उनी सरकारले प्रतिस्थापन विधेयक ल्याएर अन्तःशुल्क र सडक निर्माण दस्तुर बढाएपछि आक्रोशित भएका छन् ।

‘धेरै सीसीका मोटरसाइकलमा कर बढ्नु त ठीकै हो । तर, हामीजस्ता मध्यमवर्गीयले चढ्ने मोटरसाइकलको कर दसैँकै मुखैमा आएर थपेको उचित लागेन । पुरानै मोटरसाइकलले काम चलाऊँ कि भन्ने सोचमा छु,’ उनले दु:खेसो पोखे ।

उनी त प्रतिनिधि पात्र मात्रै हुन् । सबैजसो सवारीसाधन बिक्रेताले दसैँ/तिहारको अवसर पारेर विभिन्न छुट तथा अफर ल्याउने हुँदा धेरैले सवारीसाधन खरिद गर्न यही समय रोज्ने गरेका छन् ।

सरकारले ल्याएको प्रतिस्थापन विधेयकले नेपालमै एसेम्बल गर्ने दुईपाङ्ग्रेको अन्तःशुल्कमा समेत ५० प्रतिशत छुट त दियो तर मध्यम वर्गीयले चढ्ने थोरै सीसीका मोटरसाइकलको पनि अन्तःशुल्क १० प्रतिशत बढाएको छ ।

विधेयकले १ सय २५ देखि १ सय ५५ सीसीसम्मको मोटरसाइकल तथा स्कुटरको अन्त:शुल्क ४० देखि ५० प्रतिशत बनाएको छ । त्यस्तै, २ सयदेखि २ सय ५० सम्मका मोटरसाइकल तथा स्कुटरको ५० बाट ६० प्रतिशत पुुर्‍याएको छ ।

यति मात्र नभई विधेयकले सडक निर्माण दस्तुर पनि बढाएको छ । यसअघि १ सय ५५ सीसीसम्मका दुुईपाङ्ग्रे सवारीसाधनमा १५ हजार रुपैयाँ, १५५ देखि २५० सीसीसम्म १८ हजार रुपैयाँ, २५० देखि ४०० सीसीससम्म ५० हजार रुपैयाँ र ४ सय सीसीभन्दा माथिका दुुईपाङ्ग्रे सवारीसाधनमा १ लाख रुपैयाँ सडक निर्माण दस्तुर लाग्थ्यो ।

यो विधेयकले १२५ सीसीसम्मका दुुईपाङ्ग्रे सवारीसाधनलाई १५ हजार रुपैयाँ, १२५ देखि २५० सीसीसम्मलाई १८ हजार रुपैयाँ, २५० देखि ४०० सीसीसम्मलाई ५० हजार रुपैयाँ र ४०० सीसीमाथिका मोटरसाइकलमा १ लाख रुपैयाँ सडक निर्माण दस्तुर लाग्ने व्यवस्था गरेको छ ।

१ सय २५ देखि २ सय ५० सीसीसम्मका मोटरसाइकल र स्कुटरमा बढेको अन्तःशुल्क र सडक निर्माण दस्तुरले उपभोक्तामाथि १५ देखि २० हजारसम्म आर्थिक भार थपिने व्यापारीहरू बताउँछन् ।

आयातीत दुुईपाङ्ग्रे सवारीसाधनमा अन्तःशुल्क र सडक निर्माण दस्तुर बढाउनु ग्राहकको हितमा नभएको यामाहा नेपालका प्रमुख कार्यकारी अधिकृत राजु क्षेत्रीले बताए ।

‘अहिले तत्काल सबै कम्पनीले एसेम्बल प्लान्ट नेपालमा राख्न सम्भावना छैन । आयातीत दुुईपाङ्ग्रे सवारीसाधनमा अन्तःशुल्क र सडक निर्माण दस्तुर बढाउनु ग्राहकलाई आफ्नो रोजाइबाट कुण्ठित गर्नु हो,’ उनले भने ।

कोरोना महामारीको समयमा सार्वजनिक सवारीसाधनहरू प्रयोग गर्न प्राय: मान्छेहरू डराइरहेको अवस्थामा सरकारले मोटरसाइकलको सडक निर्माण दस्तुर र अन्तःशुल्क महसुल दुवैमा वृद्धि गर्नुु निराशाजनक भएको अटोमोबाइल्स एसोसिएसन अफ नेपालका अध्यक्ष कृष्णप्रसाद दुलालले बताए ।

‘सामाजिक दूरी बनाएर हिँड्नुपर्ने अवस्थामा सरकारले मोटरसाइकलमा यसरी अन्तशुल्क र सडक निर्माण दस्तुर बढाउनु उचित होइन,’ उनले भने ।

प्रकाशित मिति: मंगलबार, भदौ २९, २०७८ १४:०३