देउवाको गृहजिल्लाका सभापति भन्छन्- राणा शासनभन्दा क्रुर तरिकाले महाधिवेशन हुँदैछ [अन्तर्वार्ता]

देउवाको गृहजिल्लाका सभापति भन्छन्- राणा शासनभन्दा क्रुर तरिकाले महाधिवेशन हुँदैछ [अन्तर्वार्ता]

A+ A A-

आन्तरिक विवादका बीच सभापति शेरबहादुर देउवाको गृहजिल्ला डडेल्धुरामा कांग्रेसको वडा अधिवेशन सुरु भएको छ । डडेल्धुराका निर्वाचन अधिकृत लोकेन्द्र बमका अनुसार आज बिहान ८ बजेदेखि नै निर्वाचन प्रक्रिया प्रारम्भ भएको हो । अहिलेसम्म विरोध वा अवरोधको खबर नआएको उनले बताए ।

तर, डडेल्धुराका जिल्ला सभापति कर्णबहादुर मल्ल निर्वाचन अधिकृतले राणा शासनकालको जस्तो व्यवहार प्रदर्सन गरेको आरोप लगाउँछन् । सुरक्षाकर्मीको घेरामा निर्वाचन गरिएको बताउँदै मल्लले आफूले यसअघि यस्तो अधिवेशन नदेखेको प्रतिक्रिया दिएका छन् ।

गन्यापधुरा गाउँपालिका- २ का वडा सभापति हरिप्रसाद पनेरुका अनुसार २२ गते डडेल्धुरा जिल्ला कमिटीले विवाद समाधान नभइ निर्वाचन प्रकृया अगाडि नबढाउने सहमति गरेको थियो । २३ गते २६ जना वडा सभापतिहरूको भेलाले पनि सोही निर्णय अनुमोदन गरेको अवस्थामा बिनासहमति अधिवेशन सुरु गरिएको छ । गन्यापधुरा पार्टी सभापति शेरबहादुर देउवाको वडा पनि पनि हो । कुल ५२ जना वडासभापतिमध्ये २६ जनाले यो अधिवेशन वहिस्कार गरेको मल्लले बताए ।

सभापति देउवाको दबाबमा वडा तहबाट प्रक्रिया पुर्‍याएर पठाइएका पाँच सय क्रियाशील सदस्यको नाम काटिनुका अतिरिक्त प्रक्रियाबाहिर गएर तीन सय नयाँ सदस्य थपिएकाले विरोध भएको मल्ल पक्षको दाबी छ । यही विषयमा केन्द्रीत रही मल्लसँग शिलापत्रका लागि केशवराज जोशीले गरेको कुराकानीः

हिजोसम्म तपाईंहरू डडेल्धुरामा आज हुने अधिवेशनको विरोध गर्दैै हुनुहुन्थ्यो । तर, अधिवेशन सुरु भइसकेको छ । सहमति जुटेको हो ?

होइन । कुनै किसिमको सहमति भएको छैन । राणा शासनको भन्दा पनि क्रुर तरिकाले कडा सुरक्षा घेराको बीच महाधिवेशन हुँदैछ । यसमा हाम्रो कुनै सहमति हुने कुरै भएन । ५० प्रतिशतभन्दा बढी क्रियाशील सदस्यहरूको विरोधका बाबजुद यो निर्वाचन प्रक्रिया अगाडि बढेको छ । यो दुर्भाग्यपूर्ण हो ।

निर्वाचन अधिकृतले सौहार्दपूर्ण तरिकाले अधिवेशन भइरहेको जानकारी दिनुभएको छ, तपाईं र उहाँको कुरामा विरोधाभाष देखियो नी ?

यी निर्वाचन अधिकृत भनेका राणाकालका कारिन्दाभन्दा तल्लो स्तरका व्यक्ति हुन् । उनले सुदूरपस्चिमभरिका जनपथ र शशस्त्र प्रहरीको घेरामा निर्वाचन गराउँदै छन् । गन्यापधुरा- १ पार्टी सभापतिको वडा हो । गन्यापधुरा- २ मेरो वडा हो । यी दुवै वडाका ७० प्रतिशतभन्दा बढी क्रियाशील सदस्य अनुपस्थित छन् । यी दुवै वडाका वडा सभापतिले नियमविपरीत गरिने अधिवेशन बहिष्कार गरेका छन् । तर, यी दुई वडामा निर्वाचन हुँदैछ । यसरी गरिने निर्वाचन कस्तो होला ? तपाईं आफैँ अनुमान लगाउनुस् ।

भनेपछि डडेल्धुरामा जिल्ला सभापति र केन्द्रीय सभापतिको भिडन्त हुने देखियो हैन त ?

म भिडन्त गर्ने मुडमा छैन । तर, पार्टी सभापतिले भिडन्तको स्थिति निम्त्याएका हुन् । मैले साथीहरूलाई पनि तपाईंको ब्रह्मले जे उचित सम्झन्छ त्यही गर्नुहोला भनेर सम्झाएको छु । उहाँहरूले अन्यायविरुद्ध लड्ने निर्णय गर्नुभयो । त्यहीअनुरूप हामीले यो अधिवेशन बहिष्कार गरेका हौँ ।

म पार्टीका कार्यकर्ताको सहयोगबाट दुई पटक जिल्ला सभापति भएको मान्छे हुँ । पार्टी सभापति शेरबहादुर देउवाको दयामाया र आशिर्वादबाट यो ठाउँमा पुगेको होइन । म आफ्नै बलबुताले आज यहाँ छु ।

राजनीतिमा लागेका सबै मन्त्री वा प्रधानमन्त्री नै हुन्छन् भन्ने छैन । तर लोकतान्त्रिक पार्टीमा सबै काम लोकतान्त्रिक तरिकाले हुनुपर्‍यो भन्ने मात्रै मेरो माग हो । पहिले अन्यायका विरुद्ध हामीलाई लड्न सिकाउने सभापति शेरबहादुर देउवाकै नेतृत्वमा आज अन्याय हुँदैछ ।

यसरी निर्वाचन गराउनुका पछाडि सभापति देउवाको स्वार्थ के हो ?

त्यही थाहा नपाएर म पनि अलमलमा छु । थाहा पाएको भए म पनि बाधक बन्ने थिइनँ ।

प्रकाशित मिति: शुक्रबार, भदौ २५, २०७८ १३:२९