अवैध क्रिप्टोकरेन्सीको कारोबार बढेको भन्दै राष्ट्र बैंकले दियो चेतावनी

A+ A A-

नेपाल राष्ट्र बैंकले क्रिप्टोकरेन्सीको कारोबार गैरकानुनी भएको जनाएको छ । यस्तो करेन्सीको कारोबार गरे कानुनअनुसारको कारबाही हुने चेतावनी राष्ट्र बैंकले दिएको छ ।

क्रिप्टोकरेन्सीको कारोबार, प्रयोग वा माइनिङसम्बन्धी कार्य नगर्न केन्द्रीय बैंकले अपिल गरेको छ । त्यस्ता कार्य गरे विदेशी मुद्रा विनिमय ऐनअनुसार कारबाही गर्ने राष्ट्र बैंकले भनेको छ । नेपालमा यस्‍तो कारोबार गरे मुद्रा अपचलनअन्तर्गतको मुद्दा लाग्छ ।

पछिल्लो समय क्रिप्टोकरेन्सीको कारोबार बढ्दै गएको र यस कार्यमा संलग्नता बढाउन प्रोत्साहित गर्न थालेको घटना बढेको भन्दै यसबाट टाढा रहन राष्ट्र बैंकले अपिल गरेको छ ।

क्रिप्टो करेन्सी' विश्वव्यापी भुक्तानी प्रणाली हो । यसलाई अर्को शब्दमा 'बिटक्वाइन' पनि भन्ने गरिन्छ । विनिमयका माध्यमका रूपमा काम गर्ने संकेताक्षर (कोड वा क्रिप्टोग्राफी) द्वारा सुरक्षित विद्युतीय वा भर्चुअल मुद्राका रूपमा यसलाई लिइन्छ । विश्‍वबजारमा यसलाई विनिमयको साधनको रूपमा हेरिन्छ ।

क्रिप्टोकरेन्सी एक देशमा निश्चित मूल्यमा खरिद गरेर अर्को देशमा सोहीबराबर भुक्तानी लिन सकिने बताइन्छ । पैसाको क्वाइन वा नोटको जस्तो उपस्थिति यसको नभए पनि कम्प्युटरबाट पजलहरू हल गरेर विद्युतीय मुद्रा वा क्रिप्टो करेन्सी उत्पादन गर्ने काम गरिन्छ, जसलाई माइनिङ भन्ने गरिन्छ ।

नेपाल राष्ट्र बैंकले बिटक्वाइनलगायत जुनसुकै डिजिटल मुद्रालाई २९ साउन २०७४ मा अवैध घोषणा गरेको थियो । २०७४ असोजमा नै बिटक्वाइनको अवैध माइनिङ गरेको आरोपमा नेपाल प्रहरीको केन्द्रीय अनुसन्धान ब्यूरोले काठमाडौंबाट सात जना अपरेटरहरूलाई पक्राउ गरेको थियो ।

नेपालका जस्तै बंगलादेश, चीन, बोलिभिया, भारत, रुस, भियतनामलगायतका देशमा यसलाई गैरकानुनी कारोबार मानिए पनि अमेरिका, क्यानडा, मेक्सिको, ब्राजिल, जापान, दक्षिण कोरिया, इजरायल, टर्की, दक्षिण अफ्रिका, मलेसियालगायत देशमा भने यसलाई वैधानिक कारोबारका रूपमा हेरिन्छ ।

एल साल्भाडोरले क्रिप्टो करेन्सीलाई दियो वैधानिकता

बुधबार नै मध्य अमेरिकी राष्ट्र एल साल्भाडोरले क्रिप्टोकरेन्सीलाई वैधानिकता दिने गरी कानुन निर्माण गरेको छ । यसले मुलुकलाई आर्थिक अस्थिरतातिर धकेल्ने भन्दै देशव्यापी प्रदर्शनसमेत भइरहेको छ ।

प्रकाशित मिति: बिहीबार, भदौ २४, २०७८ १९:०६