एमाले अध्यक्ष ओली र एमसीसी उपाध्यक्ष फातिमाबीच भेटवार्ता, के भयो कुराकानी ?

A+ A A-

प्रमुख प्रतिपक्षी दल नेकपा एमालेका अध्यक्ष केपी शर्मा ओली र एमसीसीकी उपाध्यक्ष फातिमा सुमारबीच भेटवार्ता भएको छ ।

बिहीबार दिउँसो एमसीसी उपाध्यक्ष सुमार, सहायक उपाध्यक्ष जोनाथन ब्रुक्ससहितको टोलीले बालकोट पुगेर एमाले अध्यक्ष ओलीलाई भेटेको हो । भेटमा उनीहरूबीच एमसीसीका विषयमा कुराका भएको अध्यक्ष ओलीको सचिवालयले जनाएको छ ।

बिहीबार बिहानमात्रै नेपाल आइपुगेको एमसीसी उपाध्यक्ष सुमारसहितको टोलीले सुरुमै प्रमुख प्रतिपक्षी दल एमालेका अध्यक्ष ओलीलाई भेटेको हो । भेटमा अध्यक्ष ओलीसहित स्थायी कमिटी सदस्य विष्णु रिमाल, विदेश विभाग प्रमुख भट्टराई र प्रचार विभाग उपप्रमुख सूर्य थापा सहभागी थिए भने एमसीसी उपाध्यक्ष सुमारसँगै सहायक उपाध्यक्ष जोनाथन ब्रुक्स लगायतको एमसीसी प्रतिनिधिमण्डल सहभागी थियो ।

एमसीसी पास गर्ने विषयमा प्रमुख दलहरूबीच विवाद छ । ओलीसँगको भेटपछि एमसीसी उपाध्यक्ष सुमार नेतृत्वको टोली एमसीसीको टोली याक एण्ड यति होटलमा रहेको एमसीसी नेपालको कार्यालयमा पुगेको छ ।

यसअघि बुधबार नेपाललाई जवाफ पठाउँदै एमसीसीले अमेरिकी सहयोग परियोजना सैन्य प्रयोजनको लागि नभएको बताएको थियो । सरकारका तर्फबाट अर्थमन्त्री जनार्दन शर्माले पठाएको पत्रको जवाफ पठाउँदै एमसीसीले अनुदान कोषको उपयोग सैन्य प्रयोजनमा गर्न कानुनले रोकेको उल्लेख गर्दै यो विशुद्ध गरिबी न्युनीकरणका लागि दिइने सहयोग रहेको प्रष्ट पारेको थियो ।

नेपालमा पछिल्लो समय एमसीसीको माध्यमबाट नेपालमा अमेरिकी सैनिक आउने प्रचार भइरहेको थियो । यही सम्बन्धमा सरकारले सोधेको प्रश्नको जवाफ एमसीसीले दिएको हो । एमसीसी सम्झौताको विवादका पाटामध्ये एमसीसी परियोजनाबाट प्राप्त हुने बौद्धिक सम्पत्तिमा नेपाल सरकारको स्वामित्व रहने जनाउँदै एमसीसीको कुनै पनि हक नहुने जवाफ पठाएको छ ।

एमसीसीले निर्धारित समयभित्रै परियोजना सम्पन्न गर्न एमसीसी कम्प्याक्टमा सर्तहरू राखेको पनि बताएको छ । नागरिकस्तरबाट उठाइएका प्रश्नहरूसहित नेपाल सरकारले पठाएको पत्रको जवाफ फर्काउँदै एमसीसीले परियोजनामा विनियोजित रकमको दुरुपयोग रोक्न र पाँच वर्षभित्रै काम सिध्याउन सर्तहरू राखेको बताएको हो ।

परियोजना लागू भइसकेका अरू देशमा पनि सर्त र मापदण्डहरू यस्तै रहेको एमसीसीको भनाइ छ । कम्प्याक्टका सर्तहरूको उल्लंघन हुनेगरी अनुदान रकमको दुरुपयोग नभएमा यो रकम फिर्ता गर्न नपर्ने पनि एमसीसीले जनाएको छ । नेपाललाई गरिबी न्यूनीकरणमा साथ दिनु नै एमसीसी नेपाल कम्प्याक्टको उद्देश्य भएको जवाफ बुधबार एमसीसीले पठाएको थियो ।

प्रकाशित मिति: बिहीबार, भदौ २४, २०७८ १५:१५