भारत जोड्ने व्यापारिक मार्ग निर्माण तीव्र

A+ A A-

पूर्व–पश्चिम राजमार्गदेखि भारतको जटही नाकासम्म जोडने ४० किलोमिटर व्यापारिक मार्गको निर्माणले तीव्रता पाएको छ । जनकपुरधामलाई जोड्ने सो सडक ६ लेनको बनाइँदै छ ।

त्यसमध्ये जनकपुरधाम–जटही १४ किलोमिटर सडक यही वर्ष सञ्चालनमा ल्याउने लक्ष्य रहेको सडक विभागमा आयोजना प्रमुख देवेन्द्रप्रसाद साहले बताए ।

जनकपुर–जटही १४ किलोमिटरअन्तर्गत सोनामाई स्थानदेखि देउपुरासम्मको ७ किलोमिटर सडक कालोपत्रे गरिसकेको छ । धेरैजसो पुल निर्माण पूरा भइसकेका छन् । अधिकांश भागमा ठेक्का सम्झौता गरी निर्माणलाई तीव्रता दिइएको छ ।

आयोजना प्रमुख डिभिजन इन्जिनियर साहका अनुसार दोस्राे खण्ड देउपुरादेखि जटही नाकासम्म निर्माण हुँदै छ । आगामी असारसम्म जनकपुरधाम–जटही खण्डको निर्माण पूरा भई सञ्चालनमा आउने विश्वास आयोजनाको छ ।

सडकमा पर्ने देपुरा, रुपैठा, गंगुली र नगराइन गाउँवासीले समयमा घर टहरा नभत्काउँदा योजना पूरा गर्न दुई वर्षभन्दा बढी ढिलो भएको इन्जिनियर साहले जानकारी दिए ।

यो खण्डको २०७२ जेठमा सम्झौता भएको थियो । यता, जनकपुरधाम–ढल्केवर खण्डको २६ किलोमिटर सडक निर्माण पनि धमाधम हुँदै छ । ढल्केवर–सपही १४ किलोमिटर खण्ड पनि निर्माणाधीन छ । सपही–जनकपुरधाम १२ किलोमिटर सडक कालोपत्रे गरिँदै छ । ढल्केवर–सपही खण्डको निर्माण लंगियान र आशिष निर्माण कम्पनी र सपही–जनकपुर खण्ड जि पप्पु गौरी पार्वती निर्माण सेवाले ठेक्का पाएका छन् ।

संयुक्त कम्पनीले २०७४ जेठमा ठेक्का सम्झौता गरेको सडक ५० प्रतिशत निर्माणको काम पूरा भइसकेको इन्जिनियर साहले जनाए । उनले तोकिएको अवधिमा निर्माण पूरा गर्ने प्रतिबद्धता जनाए । भारतको पिपरौन नाकादेखि सीमावर्ती जटही हुँदै पूर्वपश्चिम राजमार्ग जोड्ने जटही–जनकपुरधाम–ढल्केवर ४० किलोमिटर सडक ७ अर्ब ५० करोड रुपैयाँ लगानीमा निर्माण हुन लागेको हो ।

निर्माणाधीन सडक पहिलो खण्ड जनकपुरधाम–जटही, दोस्रो खण्ड जनकपुरधाम–ढल्केबर २०७२ मा सम्झौता भएको थियो । ६ लेनको सडक आगामी माघसम्म निर्माण पूरा गर्ने लक्ष्य छ ।

पूर्व–पश्चिम राजमार्ग जोड्ने फराकिलो सडक निर्माण भएपछि सीमावर्ती जटहीदेखि ढल्केबर आसपासको क्षेत्रमा औद्योगिक क्षेत्रका रूपमा विकास गर्ने लक्ष्य राखिएको छ ।

जनकपुरधाम–ढल्केवर खण्डमा विभिन्न उद्योग धन्दा, होटल रेस्टुरेन्ट तथा निजी घर निर्माण भइरहेका छन् । सडकको चौडाइ ६ लेन हुने भएपछि सडक छेउको जग्गाको मूल्य पनि बढेको स्थानीयवासी बताउँछन् ।

’६ लेनको सडक निर्माणपछि सडक दायाँबायाँ उद्योगको संख्या बढ्नु स्वाभाविकै हो,’ होटेल व्यवसायी प्रकाश मिश्र भन्छन्, ’यो क्षेत्र सुविधायुक्त भएकाले बसोबासका लागि पनि उत्तम हुन्छ ।’ मिश्रले सो सडकमा बाबाको धावा नाउँको धावा होटेल खोलेका छन् ।

भारतको कोलकातादेखि काठमाडौंलगायत मुलुकका विभिन्न सहरमा व्यापारिक सामग्री पुर्याउन छोटो दूरी र सजिलो मार्ग हुनेछ । भारत सरकारले सीमावर्ती पिपरौनमा आफ्नो भन्सार नाका सञ्चालनमा ल्याएपछि मालसामान आयात निर्यात गर्नसमेत सजिलो हुनेछ ।

प्रकाशित मिति: बिहीबार, जेठ २३, २०७६ २३:५२