प्रदेश १ मा १७५ जनप्रतिनिधिले रोजे एकीकृत समाजवादी, लोसपामा कसैले गरेनन् सनाखत

प्रदेश १ मा १७५ जनप्रतिनिधिले रोजे एकीकृत समाजवादी, लोसपामा कसैले गरेनन् सनाखत

A+ A A-

प्रदेश १ बाट प्रतिनिधिसभा सदस्य, प्रदेशसभा सदस्य र स्थानीय तहका जनप्रतिनिधिसहित एक सय ७५ जनाले नेकपा एकीकृत समाजवादी पार्टी रोजेका छन् ।

निर्वाचन आयोगले विभाजित दल रोज्न मंगलबारसम्म दिएको समयसीमा भित्र सो संख्यामा तीनै तहका जनप्रतिनिधिले एकीकृत समाजवादीमा देखिएका छन् । अन्य प्रदेशको तुलनामा राम्रो पकड भएको एमालेका अधिकांस जनप्रतिनिधिहरू विभाजनको पक्षमा देखिएनन् ।

१४ जिल्ला र एक सय ३७ स्थानीय तह रहेको प्रदेश १ मा अधिकांस स्थानीय तहमा एमालेले जितेको थियो । तर, प्रदेश १ मा एमाले विभाजनको असर सामान्य देखिएको छ ।

प्रदेश १ बाट एमाले विभाजित भएको एकीकृत समाजवादीमा दुई जना प्रतिनिधिसभा सदस्य, १० जना प्रदेश सांसद, दुई जिसस प्रमुख, दुई जिसस उपप्रमुख, दुई नगरप्रमुखले सनाखत गरे । यस्तै दुई नगर उपप्रमुख, तीन गाउँपालिका अध्यक्ष, तीन गाउँपालिका उपाध्यक्ष, ३४ वडाध्यक्ष, १३ कार्यपालिका सदस्य र एक सय दुई वडा सदस्यले सनाखत गरेका छन् ।

प्रतिनिधिसभाका दुई सदस्यले भने पार्टी विभाजनकै बेला सनाखत गरिसकेका थिए ।

त्यस्तै प्रदेश सांसदहरू राजेन्द्र राईसहित राजन राई, उपेन्द्र घिमिरे, सावित्री रेग्मी, खिनु लङ्वा लिम्बू, गणेश काङमाङ, कृष्णकुमारी राई, पदमकुमारी गुरुङ, सुनिता चौधरी र सरिता थापा नयाँ दलमा सनाखत गरेका छन् । उनीहरू सबैले १६ भदौमा एकीकृत समाजवादीमा सनाखत गरेका थिए ।

त्यस्तै नेकपा एमालेबाट निर्वाचित खोटाङ जिल्ला समन्वय समितिका प्रमुख बबी चाम्लिङ र संखुवासभा जिसस प्रमुख सुमन शाक्यले एकीकृत समाजवादीको पक्षमा सनाखत गरेका छन् ।

ताप्लेजुङ, धनकुटा र इलाम जिल्ला समन्वय समितिका उपप्रमुखले पनि नेकपा एमाले त्यागेर नेकपा एकीकृत समाजवादी पार्टी रोजेका छन् । इलाम जिससका उपप्रमुख चित्रकला बराइली, धनकुटाका उपपमुख बंगला राई र जिसस ताप्लेजुङका उपप्रमुख देवीमाया नेपालीले एकीकृत समाजवादी रोजे ।

सो क्षेत्रका दुई नगरपालिका प्रमुख र दुई उपप्रमुखले मात्र नेकपा एकीकृत समाजवादी रोजेका छन् । यस्तै तीन गाउँपालिका अध्यक्ष र तीन उपाध्यक्ष एमाले छाडेर समाजवादीमा लागेका छन् । प्रदेश १ का विभिन्न स्थानीयतका ३४ जना वडाध्यक्षले एमाले छाडेर समाजवादी पार्टीमा सनाखत गरेका छन् । ताप्लेजुङबाट पाँच वडाध्यक्षहरुसहित २१ जना एमाले जनप्रतिनिधिले पार्टी छोडेका हुन् ।

पाँचथरमा दुई वडाध्यक्षसहित ११ जना जनप्रतिनिधिले नयाँ दल रोजेका छन् । इलामको सूर्योदय नगरपालिकाका प्रमुखुसहित नौ जना वडाध्यक्ष, माइजोगमाई गाउँपालिका अध्यक्ष र एक जना वडाध्यक्षसहित इलामका ५८ जना जनप्रतिनिधिले नयाँ दल रोजेका छन् ।

तेह्रथुममा एक पालिका अध्यक्ष, एक वडाध्यक्षले एमाले छोडेर समाजवादीमा सनाखत गरेका छन् । धनकुटामा जिसस उप्रमुखसहित आठ जनाले एकीकृत समाजवादी पार्टी रोज्दै सनाखत गरे । सनाखत गर्नेमा ३ वडाध्यक्ष र ४ जना वडा सदस्य छन् ।

भोजपुरबाट एक उपप्रमुखसहित ६ जना नयाँ पार्टीमा लागेका छन् । खोटाङ जिल्लामा जिसस प्रमुखसहित ११ जनाले एकीकृत समाजवादीको पक्षमा सनाखत गरेका छन् । सनाखत गर्नेमा एक वडाध्यक्ष र सात वडा सदस्यहरू छन् ।

ओखलढुंगामा एक जना कार्यपालिका सदस्यले मात्र एकीकृत समाजवादीको पक्षमा सनाखत गरेका छन् भने सोलुमा नेकपा एकीकृत समाजवादी निर्वाचित जनप्रतिनिधिविहीन बनेको छ । सोलुबाट कसैले पनि नयाँ पार्टी नरोजेको जिल्ला निर्वाचन कार्यालयका प्रमुख नम्रता चुडालले जानकारी दिइन् ।

उदयरपुरमा त्रियुगा नगरपालिकाका प्रमुख र उदयपुर गाउँपालिकाका अध्यक्षसहित पाँच वडाध्यक्ष र २१ जना सदस्यले एमाले छोडेर नयाँ पार्टीको पक्षमा सनाखत गरेका छन् ।

झापा, मोरङ र सुनसरीमा नेकपा एमालेको विभाजनको प्रभाव न्यून देखिएको छ । एमालेका अध्यक्ष केपी शर्मा ओलीको गृहजिल्ला झापामा एक जिल्ला समन्वय समिति सदस्य पदम लिम्बू र एक वडाध्यक्षसहति ७ जनाले मात्र नेकपा एमाले छोडेर एकीकृत समाजवादी रोजेका छन् । यता मोरङमा तीन प्रदेश सांसद, चार वडाध्यक्ष र चार वडासदस्यसहित ११ जनाले विभाजनको पक्षमा सनाखत गरेका छन् ।

सुनसरीको इटहरी गाउँपालिकाका कार्यपालिका सदस्य र स्थानीय तहका पाँच वडा सदस्यसहित ६ जनाले मात्र एकीकृत समाजवादी पार्टी रोजेका छन् । प्रदेशबाट पाँच जिल्ला समन्वय समिति सदस्यहरुले एमाले छोडेर समाजवादीको पक्षमा सनाखत गरेका छन् ।

यस्तै जनता समाजवादी पार्टी विभाजन भएर महन्थ ठाकुरको नेतृत्वमा बनेको लोकतान्त्रिक समाजवादी पाटी (लोसपा) को प्रभाव प्रदेश १ का देखिएको छैन । प्रदेश १ मा जनता समाजवादी पार्टीबाट निर्वाचित कुनैपनि सदस्यले विभाजनपछि बनेको लोकतान्त्रिक समाजवादी पार्टी नरोजेको प्रदेश निर्वाचन कार्यालयले जनाएको छ ।

प्रकाशित मिति: मंगलबार, भदौ २२, २०७८ २२:४४