कैलाली र कञ्चनपुरका ६४ जनप्रतिनिधि एकीकृत समाजवादीमा

A+ A A-

कैलाली र कञ्चनपुरका ६४ जनप्रतिनिधिले नेकपा एकीकृत समाजवादीमा सनाखत गरेका छन् ।

निर्वाचन आयोगको कार्यालय पुगेर सोमबारसम्म कैलालीका ३२ र कञ्चनपुरका ३२ जनाले सनाखत गरेका हुन् । उनीहरूले नेकपा एमाले छाड्दै माधवकुमार नेपाल नेतृत्वको नेकपा एकीकृत समाजवादी पार्टी रोजेका हुन्।

जिल्ला समन्वय समिति कैलालीकी उपप्रमुख सुन्दरीदेवी चौधरी, गोदावरी नगरपालिकाकी उपमेयर रत्ना कडायत र मोहन्याल गाउँपालिकाकी उपाध्यक्ष पुजादेवी बुढामगरले एकीकृत सामाजवादीमा सनाखत गरेका छन्।

धनगढी उपमहागरपालिका-१४ का अध्यक्ष रामबजारी चौधरी, गौरीगंगा नगरपालिका-५ का अध्यक्ष जंगबहादुर विक, गोदावरी नगरपालिका-५ का अध्यक्ष कर्णसिंह बोहोरा, मोहन्याल गाउँपालिका-४ का अध्यक्ष टेकेन्द्र बोगटी, टीकापुर नगरपालिका-१ का अध्यक्ष गंगाराम आचार्यले एकीकृत समाजवादीको पक्षमा सनाखत गरेका छन् । कैलालीका २४ जना वडा सदस्यले पनि सो पार्टीको पक्षमा सनाखत गरेका हुन् ।

यस्तै कञ्चनपुरको पुनर्वास नगरपालिकाका मेयर जीवनबहादुर थापासहितका ३२ जना जनप्रतिनिधिले नेकपा एकीकृत समाजवादी पार्टी रोजेका हुन् । सनाखत गर्ने वडाध्यक्षको संख्या ६ पुगेको छ । बेल्डाँडी गाउँपालिका–१ का वडाध्यक्ष अमर खत्री, पुनर्वास नगरपालिका–१ का प्रताप चन्द, ३ का वडाध्यक्ष कृष्ण तामाङ, कष्णपुर नगरपालिका–३ का वडाध्यक्ष सुन्दर चौधरी र भीमदत्त नगरपालिका–६का वडाध्यक्ष हर्कबहादुर धामी र १८ का वडाध्यक्ष राजेन्द्र पाण्डेले सनाखत गरेका हुन् ।

पछिल्लो समय सुदूरपश्चिममा स्थानीय तहका जनप्रतिनिधिहरू एकीकृत समाजवादी पार्टीमा आउने क्रम बढेको छ ।

सुदूरपश्चिम प्रदेशमा सोमबारसम्म एकीकृत समाजवादी रोज्ने प्रदेश सांसदको संख्या १४ पुगेको छ । सोमबार प्रदेश सांसद माया तामाङ (बोहरा) ले एकीकृत समाजवादीको पक्षमा सनाखत गरेकी हुन्। उनले सनाखत गरेसँगै एकीकृत समाजवादी पार्टी सुदूरपश्चिम प्रदेशसभाको सबैभन्दा ठूलो दल बनेको छ ।

यसअघि दीर्घ सोडारी, प्रकाश रावल, पूर्णा जोशी, लालबहादुर खड्का, चुनकुमारी चौधरी, मनाकुमारी साउद, दुर्गाकुमारी कामी, माया भट्ट, सुशीला बुढाथोकी, कुलवीर चौधरी, अमर साउद, तारा लामा तामाङ र बलबहादुर सोडारीले एकीकृत समाजवादीका पक्षमा सनाखत गरेका थिए ।