एकैदिनमा ५ खर्ब गुमाएका लगानीकर्तालाई प्रश्न- धैर्यता खोइ ?

A+ A A-

आइतबार पुँजीबजारमा लगानीकर्ताले ५ खर्ब रुपैयाँ गुमाए । कारोबार खुलेलगत्तै नेप्से ओरालो लाग्ने देखेर शेयर बिक्री गर्नेको चाप बढ्यो र समग्र सूचक राताम्मे बन्यो ।

अरु समय मूल्यमा प्रतिस्पर्धा गर्दै खरिद गरेका शेयर घाटामै बेचेर उम्किने लगानीकर्ताको सोचले यस्तो अवस्था आयो । नेप्से निरन्तर ओरालो लाग्दा लगानीकर्ताले देखाएको व्यवहारले बजारलाई तल झार्‍यो ।

यता लगानीकर्ताका नेता तथा ठूला लगानीकर्ता भने राष्ट्र बैंकको नीतिको विरोधमा भनाइ सार्वजनिक गर्नमा व्यस्त भए । उनीहरू राष्ट्र बैंकको नीतिले आफूलाई भन्दा पनि समग्र बजारलाई असर गर्ने र साना लगानीकर्ता अझ बढी मर्कामा पर्ने बताइरहेका थिए ।

आइतबार नै गभर्नर महाप्रसाद अधिकारीले राष्ट्र बैंकको नीतिको बचाउ गरेपछि बजार ओरालो लाग्ने गतिले तीव्रता पायो र ठूला लगानीकर्ताले भनेजस्तै साना लगानीकर्ता घाटामा पर्ने क्रम जारी रह्यो ।

आइतबार मात्रै नेप्से १ सय ८ अंकले घट्यो । लगानी डुब्‍न लागेको भन्दै लगानीकर्ता आत्तिन थालेको सामाजिक सञ्जालहरूमा प्रस्टै देखिन थाल्यो । पछिल्ला केही दिनदेखिको बजार घटाइले शेयर बजारको समग्र पुँजीकरणमा ठूलो ह्रास आयो ।

तर, सोमबार भने फरक अवस्था रह्‍यो । कारोबार सुरु भएसँगै हरियाली छाएको नेप्सेले दिनको अन्त्य सम्ममा करिब १ सय ६२ अंकको बढोत्तरी पायो । यसका पछाडि शेयर बजारमा अर्थमन्त्री जनार्दन शर्माको चासो र गभर्नर अधिकारीको लचिलो व्यवहार कारक बन्यो ।

नेप्से उकालो लागेसँगै बजारको पुँजीकरण पनि उकालो लाग्यो । तर, यो बीचमा हतार गर्दै सस्तोमा शेयर बेच्ने लगानीकर्ता भने घाटामा परे । सोमबारको हरियाली बजारले ती लगानीकर्तालाई पछुताउनुपर्ने अवस्थामा पुर्‍यायो । हुन त सोमबारको बजार बढाइले नै समग्र बजारको आगामी दिशानिर्देश नगर्ने भए पनि लगानीकर्ताले आइतबार देखाएको व्यवहारमा भने गम्भीर प्रश्नचिह्न खडा गरेको छ ।

लगानीकर्ता तथा इन्भेस्टर फोरमका पूर्वअध्यक्ष छोटेलाल रौनियार भने लगानीकर्ताले आत्तिएर कारोबार गर्ने प्रवृत्ति त्याग्‍नुपर्ने विचार राख्छन् । पुँजीबजारमा लगानी गर्नेमा धैर्यता हुनुपर्ने उनको भनाइ छ । ‘बजार घट्न थाल्नेबित्तिकै आत्तिएर शेयर बेच्‍ने लगानीकर्ताको जमात निकै ठूलो रहेछ भन्ने हिजोको बजारले नै देखाएको छ,’ उनले बजारको विश्लेषण गर्दै प्रश्न गरे, 'लगानीकर्तामा धैर्यता खोइ ?'

बजार ओरालो लाग्दा अधैर्य बनेका लगानीकर्ताले आइतबार मात्र ५ खर्ब गुमाउनुपरेको छ । रौनियार भने बजार घटाइको मुख्य कारण राष्ट्र बैंकको नीति मात्र नभइ लगानीकर्ताको मनोवृत्ति पनि रहेको ठोकुवा गर्छन् ।

यस्तै, अर्का लगानीकर्ता प्रकाश आचार्य पनि बजार घट्नु वा बढ्नुमा नियामक निकायको भूमिका रहने तर बजारको दिशा लगानीकर्ताको मनोविज्ञानमा भर पर्ने दाबी गर्छन् । उनी भन्छन्, ‘केही ठूला लगानीकर्ता राष्ट्र बैंकलाई देखाउने भन्दै बजार घटाउन लागि परे । तर, अरु लगानीकर्ता यस्तो बेलामा आतिएर गलत निर्णय गर्दा बजार थप घट्यो । राष्ट्र बैंकले समस्या समाधान हुन्छ भनिसकेको छैन, तर आजको आन्दोलन र अर्थमन्त्रीको चासोले नै लगानीकर्ताको मनोबल बढिहाल्यो ।’

आचार्य बजारको सूचक घट्नु वा बढ्नु सामान्य भएको भन्दै लगानीकर्ताले धैर्यता गुमाउन नहुनेमा जोड दिन्छन् । धैर्यता गुमाउनेलाई बजारबाट बढी घाटा हुने उनको विश्लेषण छ ।

आइतबार र सोमबार बजारमा यस्तो उचारचढाव

आइतबार र सोमबारको बजारको उतारचढाव रोचक छ । आइतबार सर्किट लाग्ने गरी घटेका कम्पनीकै भाउ सोमबार सर्किट लागेर बढेका छन् ।

नेसनल हाइड्रोपावर,गोर्खाज फाइनान्स, श्री इन्भेस्टमेन्ट फाइनान्स, सेन्ट्रल फाइनान्स, समृद्धि फाइनान्स, गुह्येश्वरी मर्चेन्ट बैंक एण्ड फाइनान्स, एक्सेल विकास बैंकको शेयर मूल्यले एकै दिन यति फरक व्यवहार देखाएको हो ।

यस्तै एनटीसी, लुम्बिनी विकास बैंक, मितेरी विकास बैंक, गरिमा विकास बैंक, ज्योति विकास बैंक, कर्णाली विकास बैंक, महालक्ष्मी विकास बैंक, कामना विकास बैंक, सांग्रिला विकास बैंक, साइन रेसुंगा विकास बैंक, मुक्तिनाथ विकास बैंक, सिन्धु विकास बैंकले पनि एकै दिनमा यति ठूलो उचारचढाव देखाए ।

यीबाहेक रिलायन्स फाइनान्स, सानिमा माई हाइड्रो, वरुण हाइड्रो, अपि पावर, एचआईडीसीएल, ङादी ग्रुप पावर, ग्रिन डेभलपमेन्ट बैंक, दिव्यश्वरी हाइड्रो, सिनर्जी पावर विकास बैंक, युनाइटेड मोदी, छ्याङदी हाइड्रो हिमालयन पावर पार्टनर, नेपाल हाइड्रो डेभलपर्स, राधी जलविद्युत, पंचकन्या माई हाइड्रो, कालिका पावर, आँखुखोला जलविद्युत्, जोशी हाइड्रो, माथिल्लो तामाकोसी, घलेम्दी हाइड्रो,पाँचथर पावर, रसुवागढी हाइड्रो, सप्तकोशी विकास बैंक, हिमाल दोलखा हाइड्रो, लिवर्टी इनर्जी, युनाइटेड आईडीआई मार्दी आरबी हाइड्रोको १० प्रतिशतले शेयरमूल्य बढ्न पुग्यो ।

प्रकाशित मिति: सोमबार, भदौ २१, २०७८ १७:०६