डा. केसीको चेतावनी- स्वास्थ्य राज्यमन्त्री श्रेष्ठलाई पदमुक्त नगरे अनशन बस्छु

डा. केसीको चेतावनी- स्वास्थ्य राज्यमन्त्री श्रेष्ठलाई पदमुक्त नगरे अनशन बस्छु

A+ A A-

चिकित्सा शिक्षा सुधारका अभियन्ता डा. गोविन्द केसीले स्वास्थ्य राज्यमन्त्री उमेश श्रेष्ठलाई पदमुक्त नगरे अनशन बस्ने चेतावनी दिएका छन् ।

सोमबार विज्ञप्ति जारी गरी डा. केसीले स्वास्थ्य राज्यमन्त्री श्रेष्ठलाई पदमुक्त नगरे अनशन बस्ने चेतावनी दिएका हुन् । डा. केसीले आफूसँग गरेका पाँचबुँदे सहमति प्रधानमन्त्री शेरबहादुर देउवाले कार्यान्वयन नगरेको प्रति पनि आपत्ति जनाएका छन् ।

'स्वास्थ्य राज्यमन्त्रीलाई पदमुक्त गर्नेलगायतका हामीसँग भएका समझदारीका बुँदाहरू तत्काल कार्यान्वयन गर्न पनि माग गर्दछौँ । यी मागहरू पूरा नगरी सरकारले अहिलेकै निष्क्रियता, लाचारी र अनियमितता कायम राखेमा कुनै पनि बेला सत्याग्रह सुरु गर्ने जानकारी पनि गराउन चाहन्छौं,' उनले भनेका छन् ।

डा. केसीले बीपी प्रतिष्ठानका हकमा भएका सम्झौता कार्यान्वयनलगायतका विषयमा प्रधानमन्त्री देउवासँग भएको सहमति तीन साता बितिसक्दा पनि कार्यान्वयन नभएको बताएका छन् ।

'बीपी प्रतिष्ठानका हकमा भएका सहमति कार्यान्वयनलगायत हामीसँगको भेटमा प्रधानमन्त्रीले समझदारी गरेको तीन साता बितिसक्दा पनि त्यस अनुसार कुनै काम भएको छैन । उल्टै माफियाहरूको स्वार्थमा बारम्बार चिकित्सा शिक्षा आयोगका पदाधिकारीहरूलाई दबाब दिएर आयोगको आकस्मिक बैठक बोलाउने प्रयास गरिएको छ,' उनले भनेका छन्, 'स्वार्थको द्वन्द्व हुने गरी नियुक्त भएका स्वास्थ्य राज्यमन्त्रीलाई अहिलेसम्म पदबाट हटाइएको छैन । यसबाट सरकार मेडिकल शिक्षा क्षेत्रका समस्या समाधान गर्नेभन्दा पनि झनै बल्झाउने दिशामा गएको देखिन्छ ।'

डा. केसीले आफूसँग भएका पाँचबुँदे सहमति कार्यान्वयन गर्न पनि माग गरेका छन् ।

'बीपी प्रतिष्ठानको आन्दोलनको पहिलो चरण टुंग्याउने बेला भएको सहमति र हामीसँग प्रधानमन्त्रीले गरेका स्वार्थको द्वन्द्व रोक्न कानुनी व्यवस्था गर्ने र पदाधिकारी नियुक्तिका नयाँ मापदण्ड बनाउनेलगायतका पाँचबुँदे समझदारी तत्काल कार्यान्वयन गर्न तथा विभिन्न स्वार्थ समूहहरूको तर्फबाट चिकित्सा शिक्षा आयोगलाई नाजायज दबाब नदिन समेत सरकारको ध्यानाकर्षण गराउँछौँ,' विज्ञप्तिमा भनिएको छ ।

प्रकाशित मिति: सोमबार, भदौ २१, २०७८ १५:३७