स्वास्थ्यबीमा सूचना प्रणालीसँग जोडिने पहिलो कम्पनी बन्यो कोजेन्ट हेल्थ

A+ A A-

कोजेन्ट हेल्थले भक्तपुर अस्पताल र मेची अञ्चल अस्पतालबाट बीमा व्यवस्थापन सूचना प्रणाली (आईएमआईएस) सँग एकीकृत स्वास्थ्य बीमा व्यवस्थापन प्रणाली सुरु गरेको छ । यससँगै कोजेन्ट हेल्थ स्वास्थ्य बीमा बोर्डद्वारा प्रवर्द्धित आईएमआईएस प्रणालीमा जोडिने पहिलो इलेक्ट्रोनिक हेल्थ रेकर्ड सेवा प्रदायक कम्पनी बनेको छ ।

एकीकृत प्रणालीको सुरुवातसँगै स्वास्थ्य बीमामा आबद्ध सेवा प्रदायक स्वास्थ्य संस्थाहरूले बिरामीहरू स्वास्थ्य बीमा योजनामा आबद्ध भए/नभएको जाँच गर्न र आबद्ध भएका बिरामीहरूको हकमा स्वास्थ्य बीमासम्बन्धी आवश्यक विवरणको जानकारीका लागि कोजेन्ट हेल्थको इलेक्ट्रोनिक हेल्थ रेकर्ड प्रणालीको उपयोग गर्न सक्नेछन् ।

साथै, स्वास्थ्य संस्थाहरूले सफ्टवेयरमार्फत डिजिटल रूपमै बिरामीको बीमा दाबी गर्न सक्नेछन् । यो प्रविधिको प्रयोगले स्वास्थ्य सेवा प्रदायक र बीमित दुवैको समय बचत हुनेछ । इलेक्ट्रोनिक हेल्थ रेकर्ड र बीमा सूचना प्रणालीजस्ता दुई महत्त्वपूर्ण प्रणाली एकीकृत हुँदा नेपालमा अत्यावश्यक डिजिटल स्वास्थ्य इकोसिस्टम निर्माणमा सहयोग पुगेको कम्पनीले बताएको छ ।

कोजेन्ट हेल्थले पहिले नै फिनटेक र भुक्तानी प्रणालीसँग आफ्नो प्रणालीलाई एकीकृत गरिसकेको छ र डिजिटल स्वास्थ्यको क्षेत्रमा आवश्यक पर्ने प्रविधि निर्माण गर्दै आएको छ । कोजेन्ट हेल्थले इलेक्ट्रोनिक (विद्युतीय) हेल्थ रेकर्ड (ईएचआर) मा आधारित अस्पताल तथा स्वास्थ्य संस्थाका व्यवस्थापनलाई पूर्ण रूपमा डिजिटलाइज गर्नका लागि प्रविधि निर्माणको काम गर्दै आएको छ ।

कोजेन्ट हेल्थद्वारा निर्मित कोजेन्ट ईएमआर, कोजेन्ट ईएमआर वेब, ई–एप्वाइन्टमेन्ट र स्मार्ट स्वास्थ्यजस्ता प्रविधिहरू नेपालभरका ५० भन्दा बढी अस्पताल र स्वास्थ्य संस्थाहरूमा प्रयोग भइरहेका छन् ।